Ыстатыыстыканы көрдөххө, урукку өттүгэр нэһилиэнньэ дьадайыыта тыа сиригэр бэлиэтэнэрэ, оттон билигин куоракка олорор, бүддьүөт тэрилтэтигэр алын хамнаска үлэлиир дьон дьадайыыга киирдилэр.
Итиниэхэ ас-таҥас, туттар тэрил сыаната хас да төгүл үрдүү турарын хамнас кыайан сиппэтэ охсор, ону таһынан, куорат дьоно кэтэх хаһаайыстыба тутан, ынаҕы-сылгыны иитэн, эбэтэр балыктаан эбии дохуоттанар кыахтара суох.
Куорат кытыытыгар уоттаах, гаастаах аҥаардас сир учаастагын сыаната 3,5-4,5 мөл. солк., Бүлүүлүүр суолга сайын эрэ олорорго аналлаах даача сыаната 3-5 мөл. солк., Сэргэлээххэ баар дьиэлэри 10-25 мөл. солк. атыылыыллар. Биллэн турар, алын хамнаска үлэлии сылдьар дьон, учаастак атыылаһан, дьиэ тутталлара, даача оҥостон, оҕуруот аһын олордоллоро күчүмэҕэй. Кирэдьиит бырыһыана үрдээн, баантан иэс ылар даҕаны уустугурда.
Өрөспүүбүлүкэҕэ дьон дьадайыытын тохтоторго туох миэрэ ылылларын туһунан Ил Түмэн XVIII пленарнай мунньаҕар бырабыыталыстыба чааһыгар дьүүллэспиттэрэ.
РФ Бэрэсидьиэнэ Владимир Путин 2030 с. диэри нэһилиэнньэ дьадайыытын 7% диэри кыччатарга сорук туруорбута. Ил Дархан Айсен Николаев өрөспүүбүлүкэҕэ дьон дьадайыытын тохтоторго таһаарбыт стратегическай ыйааҕынан амбициознай сыалы туруоран, 2029 с. дьадайыыны икки төгүл кыччатан, кырата 70 000 киһини олох дьэбэрэтиттэн өрө таһаарыахтаахтар. Былырыын өрөспүүбүлүкэҕэ нэһилиэнньэ дьадайыыта 12,6% этэ, дьадайыы боруогуттан кыра дохуоттаах дьон ахсаана 2022 с. – 2025 с. 2,6% кыччаабыт.
Василий Кононов хаартыскаҕа түһэриитэ.
-
0
-
0
-
0
-
0
-
1
-
0
