Ити сырыы кэмигэр Уһук Илини уонна Арктиканы сайыннарыы миниистирэ Алексей Чекунков «Саюри» хампаанньа кыһыннары үлэлиир тэпилииссэ комплексын үлэтин-хамнаһын билистэ. Бу бырайыак Арассыыйа Японияны кытары бииргэ үлэлээһинин чэрчитинэн, Уһук Илин уонна Арктика сайдыытын пуондатын өйөбүлүнэн, «Хаҥалас» урутаан сайдар территория бырагырааматынан тэриллибитэ. Бастакы 0,1 гектар иэннээх тэпилииссэ 2016 сыллаахха үлэҕэ киирбитэ. Салгыы 2019 сыл сааһыгар 1,2 гектар иэннээх иккис тэпилииссэ тутуллубута. Комплекс үһүс уочарата икки түһүмэхтээх. Бастакы түһүмэҕэ былырыын балаҕан ыйыгар үлэҕэ киирбитэ.
Билигин «Саюри» күн аайы 3-5 туонна сибиэһэй оҕуруот аһынан уонна күөх үүнээйинэн куорат сабыылаах тэрилтэлэрин уонна маҕаһыыннарын хааччыйар, ону таһынан клубникалары үүннэриигэ ылыста. Быйыл ахсынньыга 1,2 гектар иэннээх алта блоктаах тэпилииссэ үлэтин саҕалыаҕа, оччотугар комплекс сылга 2,3 тыһ. туонна оҕуруот аһын үүннэрэр буолуоҕа.
– Лаборатория чинчийиитэ көрдөрөрүнэн, биһиги оҕуруоппут аһа үрдүк хаачыстыбалаах. Үүнээйилэри көрүү-истии технологиятын сыл аайы саҥардан иһэбит, натуральнай уоҕурдууну эрэ туһанабыт, онон экологическай өттүнэн ыраас, сибиэһэй уонна удамыр сыаналаах бородууксуйабытын бастатан туран оҕо саадтара ылаллар, – диэтэ хампаанньа генеральнай дириэктэрэ Сергей Балнайтис.
Юрий Трутнев эрдэ эппитин курдук, Уһук Илиҥҥи федеральнай уокурук социальнай-экономическай сайдыытыгар анаммыт бырабыыталыстыба хамыыһыйатын президиумун кэлэр мунньаҕар «Саюри» хампаанньаны өйөөһүн боппуруоһа көрүллүөхтээх. Бу туһунан Ил Дархан уонна Бырабыыталыстыба пресс-киинэ иһитиннэрэр.
Павел Иванов хаартыскаҕа түһэриилэрэ
- 0
- 0
- 0
- 0
- 0
- 0