Улуустарга социальнай эбийиэктэр, олорор дьиэлэр уонна инфраструктура эбийиэктэрэ тутуллар бырагырааматын чэрчитинэн, өрөспүүбүлүкэҕэ үгүөрү үп көрүллэр. Быйылгы 2021 сылга 2 млрд солк., ол иһигэр 1,8 млрд федеральнай бүддьүөттэн көрүллүбүтэ. Бу бырагырааманан Нам уонна Мэҥэ Хаҥалас улуустарыгар эдэр исписэлиистэр олорор дьиэлэрэ, Намҥа «Мымах», Чурапчыга «Сайдыы» кыбаарталлар тутуллаллар. Ону таһынан социальнай эбийиэктэри тутууга Бүлүү, Нам, Өлүөхүмэ, Уус Алдан, Үөһээ Бүлүү, Сунтаар, Чурапчы, Хаҥалас, Эдьигээн улуустарыгар субсидия бэриллибитэ.
Айсен Николаев бэлиэтээбитинэн, бу бырагыраама доруобуйа харыстабылыттан уонна үөрэхтээһинтэн саҕалаан, суолу оҥорууга тиийэ олох бары эйгэтин киэҥник хабар.
– Дьэ ити иһин, бырагыраама тыа сирин өйүүр атын мэхэньиисимнэри кытары алтыһыахтаах, ол иһигэр социальнай гаастааһын, дьарыктаах буолуу, нэһилиэнньэ дохуотун үрдэтии бырагыраамаларын итиэннэ суолу-ииһи оҥоруу бырайыактарын кытары, – диэтэ Ил Дархан.
Бырагырааманы олоххо киллэриигэ муниципальнай тэрээһиннэри кытыннарыы, бүддьүөт бары таһымынан көрүллэр үбү, киирэр нолуогу, судаарыстыбаннай хампаанньалартан, аахсыйалаах уопсастыбалартан тардыллар харчыны түмэн, көдьүүстээхтик туһаныы улахан оруоллаах.
– Бүддьүөт үбүн туһаныы түмүгүн үрдэтэргэ уонна угуллубут үп көдьүүһүн улаатыннарарга, Тыа хаһаайыстыбатын министиэристибэтэ муниципалитеттары кытары территориялары сайыннарыыга былааннааһын хаачыстыбатын үрдэтиигэ этии бэлэмнии сылдьар, – диэн иһитиннэрдэ Бырабыыталыстыба Бэрэссэдээтэлэ Андрей Тарасенко.
Ити этиилэр «2022-2030 сс. тыа сирин территорияларын кэлимник сайыннарыы» федеральнай судаарыстыбаннай бырагырма барылыгар киллэриэхтэрэ диэн Ил Дархан уонна Бырабыыталыстыба пресс-сулууспата иһитиннэрэр.
-
0
-
0
-
0
-
0
-
0
-
0
