СӨ Бырамыысыланнаска уонна геологияҕа министиэристибэ иһитиннэрбитинэн, 2022 сыл түмүктэниэр диэри Саха сиригэр 11 тыһыынча киһи дьиэтин тиэргэнигэр диэри гаас ситимин босхо тардыахтара.
Санатар буоллахха, саҥа дьаһалынан гаас утаҕа тардыллыбыт нэһилиэнньэлээх пууннарыгар баар дьиэлэр учаастактарыгар диэри гаас ситимин босхо тардыллыахтаах.
«Билиҥҥи кэмҥэ социальнай гаастааһын бырагыраамата биир саамай суолталааҕынан буолар. Муниципалитеттары, гаас хампаанньаларын кытары дьиэлэр ахсааннарын, ситэри гаастааһын былаанын, кыраабыгын оҥоробут», -- диэн миниистир Максим Терещенко эппит.
Дьокуускай куоракка гаас ситимин кыамтата тиийбэт кыбаарталлара бааллар. Холобур, Марха мкрй-гар, Покровскай тыраакка. Гаас ситимин кыамтата тиийбэтин кыһалҕатын туоратыыга уопсайа 900 мөл. солк. наада.
От ыйыгар Өрөспүүбүлүкэ бырабыыталыстыбата олорор дьиэлэри гаастааһыҥҥа субсидия көрөр туһунан уураах барылын ылыммыта. Бырайыакка гаас ситимин тардарга субсидия бэриллэр пилотнай нэһилиэнньэлээх пууннарынан Чурапчы улууһун Дириҥ, Толоон, Туора Күөл, Үрүҥ Күөл, Чурапчы сэлиэнньэлэрэ, Бүлүү улууһун Эбэ нэһилиэгэ, Горнай улууһун киинэ уонна Ленскэй куорат ыйыллыбыттар.
-
0
-
0
-
0
-
0
-
0
-
0
