Тустаах уларытыылар «РФ Гражданнарын доруобуйаларын харыстааһын төрүтүн туһунан» уонна «РФ Үөрэҕин туһунан» сокуоннарга киириэхтээхтэрин туһунан бырайыак барылын оҥорооччулартан биирдэстэрэ -- Саха сириттэн РФ Госдуматын дьокутаата, «Биир ньыгыл Арассыыйа” баартыйа фракциятын чилиэнэ Галина Данчикова иһитиннэрдэ.
Парламентарий быһаарбытынан, тустаах сокуоннарга сөптөөх уларыытылар киирэн эрэллэрэ сокуону оҥорооччулар, учууталлар, төрөппүттэр, мэдиссиинэ үлэһиттэрэ бииргэ ситимнээхтик үлэлээбиттэрин үтүө түмүгэ буолар. Санатар буоллахха, оскуолаларга мэдиссиинискэй кэбиниэттэри арыйыы боппуруоһа идэлээх уопсастыбаҕа уонна эспиэртэр ортолоругар 2016 сылтан быһа дьүүллэһиллэр.
Икки сыллааҕыта РФ Бэрэсидьиэнэ Владимир Путин РФ Бырабыыталыстыбатыгар үөрэх тэрилтэлэригэр мэдиссиинискэй көмөнү оҥорууга баар кыһалҕаны быһааралларыгар сыал-сорук туруорбута. Галина Данчикова тустаах сокуоннары саҥардан, кэлэр көлүөнэ доруобуйата чөл буоларын туһугар сөптөөх усулуобуйа тэриллиэхтээҕин ыйда. Бу РФ Төрүт сокуонунан быһаччы мэктиэлэнэн дьиэ кэргэн, бастакы уочарат оҕо доруобуйата чөл туруктаах буолалларыгар аналлаах судаарыстыбаннай бэлиитикэ буоларын туһунан эттэ. Тустаах сокуон бырайыага социальнай өттүнэн улахан суолталааҕынан сибээстээн, Саха сирэ дойду бастакы биэс эрэгийиэннэрин ахсааныгар киирэн, 2016-2018 сылларга, «Оскуола мэдиссиинэтэ» экспериментальнай федеральнай бырайыагы бэркэ үлэлэтэн, олоххо киллэрбитэ.
«РФ оҕо быраабын гарантиялыыр төрүттэрин туһунан» диэн сокуоҥҥа үөрэх тэрилтэлэригэр үөрэнээччи доруобуйатын харыстыырга тэрээһиннэри ыытар туһунан нуорма киириэхтээх. Ол аата доруобуйаны харыстааһыҥҥа оҕо быраабын тутуһуу диэн. Итини тэҥэ, «РФ Үөрэҕин туһунан» сокуоҥҥа үөрэнээччилэргэ бастакы суһал көмө оҥоһуллуохтааҕын туһунан эбээһинэс киириэхтээх. Ол аата бастакы көмө оҥоһулларыгар аналлаах усулуобуйа тэриллиэхтээх. Ити киириэхтээх нуормалар эбии сокуон аахталарынан бигэргэнэллэр, тоҕо диэтэххэ, итиннэ тэрилтэлэр бииргэ алтыһан үлэлиэхтээхтэригэр далаһа быраҕар аналлаах. Итини сэргэ, сокуон бырайыагар эбии физкултуура уруогар оҕо доруобуйатын туруга эрдэттэн быһаарыллан эрэ баран эрчиллиэхтээх. Итиннэ эбии тустаах сокуоҥҥа төрөппүт оҕотун доруобуйатын туругун хайаан да иһитиннэриэхтээҕин туһунан киирэн биэриэҕэ.
Галина Данчикова Госдумаҕа доруобуйа харыстабылын кэмитиэтин бэрэссэдээтэлэ Дмитрий Морозов оскуола мэдиссиинэтэ күүскэ үлэлээтэҕинэ, оҕо доруобуйатын харыстааһыны сайыннарыыга улахан көдьүүстээх буолуохтааҕын туһунан этиитигэр сөпсөһөрүн эттэ. Дмитрий Морозов быһаарарынан кэлиҥҥэ сылларга эрэгийиэннэргэ перинитальнай кииннэри тутуу, оҕо поликлиникаларын саҥардыы күүскэ ыытыллыбыт. Онон билигин оскуола мэдиссиинэтин сайыннарыыга күүскэ ылсыахтара.
Саха сиригэр оҕо доруобуйата өрүү инники күөҥҥэ турара биллэр. Ил Түмэн наукаҕа, үөрэххэ, култуураҕа, иһитиннэриилэри киэҥник тарҕатар сириэстибэлэргэ уонна уопсастыбаннай дьыалаларга сис кэмитиэтин бэрэссэдээтэлэ Феодосия Габышева «Оскуола мэдиссиинэтэ» экспериментальнай федеральнай бырайыак өссө сөргүтүллэн үлэлииригэр сөптөөх үлэни ыытар. Феодосия Габышева ити боппуруос РФ Федерациятын Сэбиэтин былааныгар киллэриллибитинэн сибээстээн, салгыы Госдума таһымыгар өйөбүлү ыларыгар, Галина Данчикова сөптөөх үлэни ыытарыгар көрдөспүтэ.
Галина Данчикова ити боппуруоска сокуон бырайыага Госдума сааскы сиэссийэтигэр хайаан да ылыллан, быйылгы үөрэх саҥа дьылыттан үлэлээбитинэн барыа диэн эттэ.
-
0
-
0
-
0
-
0
-
0
-
0
