Дьиҥэр, бу бырагыраама болдьоҕо быйыл сэтинньи 1 күнүгэр бүтэр. “Экономика чөлүгэр түһэн эрэр гынан баран, быһыы-майгы уустугуран, дьон олоҕор-дьаһаҕар уонна экономика сорох салааларыгар, ол иһигэр тутууга, ыарахаттар өссө даҕаны баалларынан, чэпчэтиини, сатаатар, кэлэр сыл ортотугар диэри уһатыахха”, -- диэтэ судаарыстыба баһылыга премьер-миниистир Михаил Мишустиҥҥа.
Бырабыыталыстыба баһылыга Бэрэсидьиэн сорудаҕынан быйыл саас муус устартан үлэлээбит бырагыраама кириисиһи утары дьаһаллартан биир саамай көдьүүстээхтэрэ буолбутун бэлиэтээтэ. Ол курдук, 630 млрд. солк. суумалаах 220 тыһ. кирэдьиит бэриллибит, ити саҥа тутуллар дьиэлэртэн кыбартыыра атыылаһар сыаллаах ылыллар кирэдьиит бүттүүн кээмэйин 90 бырыһыаныгар тэҥнэһэр. Бырабыыталыстыба бэрэссэдээтэлэ этэринэн, чэпчэтиилээх ипотека дьон олоҕун эрэ чэпчэппэтэ, пандемия кэмигэр тутуу салаатын биллэрдик өйөөтө. Онон, Михаил Мишустин бырагырааманы эһиил от ыйын 1 күнүгэр диэри уһатыы улахан суолталаах буолуоҕун бэлиэтээн туран, туһааннаах дьаһалы суһаллык таһаарарга бэлэмнэрин эттэ. Владимир Путин ити этиигэ толору сөбүлэһэрин биллэрдэ.
-
0
-
0
-
0
-
0
-
0
-
0
