Ыстаап өрөспүүбүлүкэ үрдүнэн хас биирдии тутуу хайдах бара турарын нэдиэлэ аайы кэтээн көрөр буолуоҕа. Бу дьаһал федеральнай уонна өрөспүүбүлүкэ бүддьүөтүттэн үбүлэнэр тутууларга эрэ буолбакка, бүддьүөттэн үбүлэммэт атын эбийиэктэргэ эмиэ сыһыаннаах.
Айсен Николаев: “Өрөспүүбүлүкэҕэ социальнай суолталаах эрэ буолбакка, транспортнай инфраструктуралаах бөдөҥ эбийиэктэр тутулла тураллар. Сотору кэминэн тутуу тэтимэ өссө күүһүрүөҕэ. Олору хонтуруоллааһын тохтоон хаалбакка мэлдьи ыытыллыахтаах”, – диэн бэлиэтээн эттэ.
Саҥа тэриллибит ыстаап тутулла турар эбийиэктэр кыһалҕаларын ырытыаҕа, олору быһаарарга суолу тобулуоҕа. Ыстаап маҥнайгы мунньаҕар “2019-2025 сс. хаарбах туруктаах олорор дьиэттэн гражданнары көһөрүү” бырагырааманан тутулла турар элбэх кыбартыыралаах дьиэ тутуутун үлэтин көрдүлэр уонна Дьокуускай куоракка уопсай үөрэхтээһин тэрилтэлэригэр эбии миэстэни тэрийиини дьүүллэстилэр.
СӨ Дьиэ-уот тутуутун дириэксийэтин генеральнай дириэктэрэ Игорь Ткаченко иһитиннэрбитинэн, Билибин, Чернышевскай, Свердлов уулуссаларыгар, “Птицефабрика” уонна “Звезднай” түөлбэлэргэ анал бырагырааманан тутулла турар дьиэлэр бэлэмнэрэ араас-араас. Баларга хас биирдиилэригэр кыһалҕа баар эбит. Холобур, “Птицефабрика” түөлбэтигэр тутулла турар дьиэ 90 %-на бэлэм эрээри (былааннаммыт кэмин иннинэ эрдэ тутуллан бүтэн эрэр), уоту, ууну холбооһун үлэтэ өссө да ыытылла илик. Ил Дархан Олох-дьаһах, хомунаалынай хаһаайыстыба министиэристибэтигэр бу кыһалҕаны быһаарарга сорудахтаата. “Водоканал” ааксыйалаах уопсастыба дириэктэрэ А. Кырдьаҕааһап уонна “Якутскэнерго” тэрилтэ дириэктэрин солбуйааччы А. Слоик эмиэ кыттыһыах буоллулар.
Маны сэргэ үөрэх тэрилтэлэригэр эбии миэстэни тэрийии бырайыагын көрдүлэр. Бырайыак үс түһүмэҕинэн олоххо киириэҕэ. Маҥнай үс эбийиэккэ: Дьокуускай 5-с, 12-с №-дээх уонна Хатас орто оскуолаларыгар салгыы тутууну (пристройу) атыылаһыахтара. Эбийиэктэргэ салгыы тутууну 2022 сыл бүтүүтүгэр үлэҕэ киллэрэргэ былаанныыллар.
Анал ыстаап хас нэдиэлэ аайы мунньахтыыр буолуоҕа. Кэлэр мунньахха доруобуйа харыстабылын эбийиэктэригэр тутуу үлэтэ хайдах баран иһэрин көрүөхтэрэ.
Санатан эттэххэ, быйыл Саха сиригэр барыта 570 тыһ. кв. м иэннээх дьиэ тутуллуохтаах. Ити былырыыҥҥыттан 50 тыһ. кв. м элбэх. Ону таһынан киин куоракка “Уһук Илиннээҕи кыбаартал” чэрчитинэн 350 тыһ. кв. м иэннээх “Звезднай” кыбаарталы тутуохтара.
Бүгүҥҥү туругунан, Саха сиригэр дьиэ “кыбадыраата”, ортотунан, 106,5 тыһ. солкуобайга тэҥнэһэн турар. Ол эбэтэр, дьиэ сыаната былырыын баччалартан 30 %-нан үрдээбит.
-
0
-
0
-
0
-
0
-
0
-
0
