Мунньахха тыа хаһаайыстыбатын салаатыгар дойду учуонайдара, Бүтүн Арассыыйатааҕы научнай-чинчийэр институттар, агробиисинэс түмсүүлэрэ, агробырамыысыланнай тэрилтэлэр бэрэстэбиитэллэрэ кыттыыны ыллылар. Сүөһү иитиитигэр уонна тыа хаһаайыстыбатыгар оҥорон таһаарыы кластернай көрүҥэр болҕомто уурулунна. Холобур, Уһук Илиҥҥэ сүөһү иитиитин кластера Бурятия өрөспүүбүлүкэтигэр тэриллибитэ уонна үлэлиир. Арассыыйа эрэгийиэннэрин экэнэмиичэскэй сайдыытын, социальнай хонтуруолу өйүүр уонна тыа сирин олоҕун уйгутун тупсарар соруктары быһаарыыга анаммыт мунньаҕы Арассыыйатааҕы наука академиятын вице-бэрэсидьиэнэ, РАН акадьыамыга Петр Чекмарев салайан ыытта.
– Чуолаан бүгүҥҥү дьүүллэһии практическай суолталаах. Тыа сиригэр дохуот да, бырамыысыланнай тэрилтэлэргэ үлэлиир да кыах суох, онон нэһилиэнньэ атын дойдуларга көһүүтэ маассабайдык бэлиэтэнэр. Ол эрээри, дойдуга былыр-былыргыттан дьиэ кыылын иитиитинэн дьарыктаммыттара.
Кэнники сылларга бэйэ оҥорон таһаарар бородууксуйабыт ахсаана биллэрдик мөлтөөтө, ол оннугар атын дойдулартан тиэйэн киллэриибит үрдүүр. Мөлүйүөнүнэн иэннээх ходуһалардаахпыт, хонуулардаахпыт даҕаны үлэҕэ, туһаҕа туһаныллыбат, үүнээйи бородууксуйатыгар наадыйыы үрдээбэт. Маны барытын хайдах эрэ гыныахха наада. Тыа сирэ – биһиги ас-үөл бородууксуйатын оҥорон таһаарыыбытыгар куттала суох буолууну, бырамыысыланнаска сырье баар буолуутун хааччыйар. Манна дьарыктаах буолууну хааччыйыахтаахпыт, нэһилиэнньэни тыа хаһаайыстыбатыгар сыһыарыыны үрдэтиэхтээхпит.
– Саха Сиригэр сүөһү иитиитин сайыннарыыта инники күөҥҥэ турар. Ырыынак сыһыаннаһыыларыгар бу хайысханы тыа хаһаайыстыбатын кластернай көрүҥүнэн сайыннарыахха наада. Инфраструктура сайдыбыт, ырыынак баар сирдэригэр ынах сүөһү иитиитин сайыннарыахтаахпыт. Оттон инфраструктурата мөлтөхтүк сайдар нэһилиэктэргэ эти оҥорон таһаарыыга сүөһү иитиитин сайыннарыахтаахпыт. Тыа хаһаайыстыбатын салаатыгар хаачыстыбаҕа дьулуһуохха наада. Сүөһү төбөтүн ахсаанын элбэтиитин эккирэппэккэ, валовай бородууксуйа тахсыытын улаатыннарыахха. Хаачыстыбалаах түмүгү ситиһэргэ науканы туһаныахха уонна сыһыарыахха. Манна биир тиһик үлэни тэрийэн ыытыахха наада, - диэн бэлиэтээтэ Иван Слепцов.
-
3
-
0
-
0
-
0
-
0
-
0
