2025 сыл Арассыыйаҕа аҕа дойдуну көмүскээччи сылынан, оттон Саха Өрөспүүбүлүкэтигэр – ийэ дойдуну көмүскээччи сылынан биллэрилиннэ. Кэлэр сылга дойдубутугар сүҥкэннээхэй бэлиэ даатаны – Аҕа дойду Улуу сэриитигэр Кыайыы 80 сылын бэлиэтиибит.
Саҥа 2025 сылы көрсө норуот дьокутааттара бу ааһан эрэр сылы хайдах түмүктээбиттэрин билиһиннэрэллэр уонна Саҥа Дьылынан эҕэрдэлэрин тириэрдэллэр.
Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов:
– 2024 сылга былааннаабыт сорукпутун барытын толордубут. Өрөспүүбүлүкэбит сайдыытыгар туһалаах сокуоннары ылынныбыт. Быйыл сис кэмитиэккэ Саха Өрөспүүбүлүкэтин 13 сокуонун барыла киирдэ, онтон бүтэһик ааҕыыга 10 сокуону ылынныбыт. Саамай сүрүннэрин аҕыннахха:
2758-З № 191-VII нүөмэрдээх 2024 с. бэс ыйын 26 күнүгэр тахсыбыт «Хаһаайына суох хамсыыр харамайы көрөр-истэр уонна өрөспүүбүлүкэҕэ тустаах тэрээһиннэри ыытар» туһунан сокуон.
Бу сокуон бэйдиэ сылдьар дьиэ кыылларын бэрээдэктииргэ, кинилэр дьоҥҥо, юридическай сирэйдэргэ буортуну оҥороллорун, доруобуйаларын эмсэҕэлэтэллэрин тохтотор туһугар оҥоһуллубута. Нэһилиэнньэни көмүскүүргэ бу саамай сөптөөх сокуон дии саныыбыт.
2787-З № 247-VII нүөмэрдээх 2024 с. ахсынньы 16 күнүгэр тахсыбыт «Тыа хаһаайыстыбатын бородууксуйатын оҥорон таһаарааччылары өйүүргэ Саха Өрөспүүбүлүкэтин муниципальнай тэриллиилэрин уонна куорат уокуруктарын бэйэни салайыныы уорганнарыгар боломуочуйаны биэрии» туһунан сокуон. Бу сокуон чэрчитинэн тыа хаһаайыстыбатын өйүүргэ, бүддьүөт харчытын тиэрдиигэ муниципальнай оройуоннар боломуочуйалара кэҥэтилиннэ. Онон улуустарга тыа хаһаайыстыбата сайдарыгар бу сокуон саҥа олугу ууруо.
2802-З № 279-VII нүөмэрдээх 2024 с. ахсынньы 16 күнүгэр тахсыбыт «Хаһаайына суох хамсыыр харамайы көрөргө-истэргэ Саха Өрөспүүбүлүкэтин муниципальнай тэриллиилэрин бэйэни салайыныы уорганнарыгар боломуочуйаны биэрии» туһунан сокуон.
Өрөспүүбүлүкэ Бырабыыталыстыбатын, тустаах министиэристибэлэри кытта бииргэ үлэлээһин түмүгэр 2024 с. тыа хаһаайыстыбатын сайдыытын судаарыстыбаннай бырагырааматын үбүлээһин 15 740 000 солк. тиийдэ.
2025 с. бүддьүөтү ылынарга урукку сылларга курдук Бырабыыталыстыбаны, Тыа хаһаайыстыбатын министиэристибэтин кытта биир кэлим үлэни ыыттыбыт.
Санатан эттэххэ, бүддьүөтү ылыныы бастакы ааҕыытыгар, алтынньы 22 күнүгэр ыытыллыбыт парламент тохсус пленарнай мунньаҕар судаарыстыбаннай бырагырааманы үбүлээһин кээмэйэ 8 023 467 солк. этэ. Иккис ааҕыыга Бырабыыталыстыба уонна Ил Дархан Айсен Николаев, Ил Түмэн Бэрэссэдээтэлэ Алексей Еремеев өйөбүллэринэн судаарыстыбаннай бырагыраама үбүлээһинэ 15 315 000 солк. диэри үрдээбитэ.
Саҥа сылга бүддьүөккэ киирэр уларытыыларга эбии үбүлээһин эмиэ көстүө диэн эрэнэбит.
Ил Түмэн тыа сиригэр уонна аграрнай бэлиитикэҕэ сис кэмитиэтэ 15 мунньаҕы, 2 парламент истиитин, 3 Бырабыыталыстыба чааһын, 1 төгүрүк остуолу ыытта. Мунньахтарга сүрүннээн олохтоох оҥорон таһаарыыны сайыннарыы, хороҕор муостаах уонна сыспай сиэллээх кыстыгын хааччыйыы, искусственнай сиэмэлээһин, «Туймаада» агрохолдинг сайдыытын тосхоллорун боппуруостарын көрдүбүт.
Оттон Саҥа Дьыл туһунан этэр эбит буоллахха, хас биирдии киһи оҕо сааһын умнуллубат кэрэ түгэннэрэ: киэргэммит харыйа, Тымныы Оҕонньору күүтүү. Оҕо аймахха Саҥа дьыл саамай кэтэһиилээх, сырдык бырааһынньык. Минньигэс кэһии кэлэрин, дьаабылыканы, мандарины күүтэрбит, дьиэ кэргэнинэн, оскуолаҕа харыйаны киэргэтэрбит саамай үөрүүлээх түгэн буолааччы.
Хас биирдии киһи саҥа сылтан тугу эрэ күүтэр, иһигэр бүччүм баҕа санаалаах. Ыра санаа туоларыгар бэйэни истиэххэ, бэйэҕэ эрэллээх буолуохха наада. Куруук инникигэ эрэллээх сылдьан, былааннарын туолалларыгар күүскүн, кыһамньыгын, сыраҕын, санааҕын ууран туран ылыстаххына, баҕа санааҥ туолар.
-
0
-
0
-
0
-
0
-
0
-
0
