Маны туһанарга бастакынан баскыырдар туруннулар. Баскыырыйа тыатын хаһаайыстыбатын министиэристибэтин салайар бырабыыталыстыба бэрэссэдээтэлин солбуйааччы Ильшат Фазрахманов ааспыт сыл сэтинньигэ этии киллэрбитэ. Бааһынай хаһаайыстыбалары уонна тыа хаһаайыстыбатын тэрилтэлэрин биир кэлим нолуоктан үс сылга босхолуур туһунан сокуон барылын оҥорон, парламеннарыгар олунньу ыйга киллэрдилэр. Ону сааскы сиэссийэлэртэн биирдэстэригэр көрөллөрө күүтүллэр.
Бу түмүгэр Баскыырыйа Өрөспүүбүлүкэтин бүддьүөтэ 300 мөл. солкуобайы сүтэриэ гынан баран, тыа хаһаайыстыбатын оҥорон таһаарыытын кээмэйин улаатыннарыы суотугар сабарга суоттаналлар эбит. Бу экэниэмикэни өйүүр дьаһал эрэгийиэн бырабыыталыстыбата олунньу саҥатыгар кириисиһи утары ылыммыт үһүс бакыатыгар киирэр. БӨ парламенын бэрэссэдээтэлэ Константин Толкачев бэлиэтииринэн, тыа хаһаайыстыбатын табаарын оҥорооччулар “босхоломмут” үптэрин бэйэлэрин сайдыыларыгар угуохтара: тиэхиньикэ атыылаһыахтара, фермаларын саҥалыы туттуохтара, эргииргэ сылдьар үптэрин хаҥатыахтара, о.д.а. үтүө өрүтэ элбэх буолуоҕа.
Үлэ дьоно нолуоктан босхолонуута хамсык кэминээҕи кириисис охсуутун оһорунарыгар тирэх буолара чуолкай. Итиэннэ эрдэ нолуок төлөөмөөрү саһа-кистэнэ сылдьыбыттар күлүктэн сырдыкка тахсыахтара, дохуоттарын киһилии көрдөрөн, баантан кирэдьиит ылар кыахтаныахтара. Ол түмүгэр эрэгийиэн оҥорон таһаарыыта үрдүүрүгэр Баскыырыйа салалтата саарбахтаабат. Саҥа дьаһал олоххо киирэн үс сылынан көдьүүһүн көрдөрдөҕүнэ, өссө өр болдьоххо уһатарга былаанныыллар эбит.
-
0
-
0
-
0
-
0
-
0
-
0
