Тыа сирин үлэһит дьонугар анаммыт дьоро киэһэ «Дьулуур» спортсаалаҕа ыытылынна, аныгы олох сиэринэн инстаграмм сирэйигэр быһа көрдөрүүгэ таҕыста. «Аартык» бааһынай хаһаайыстыба салайааччыта, үлэ бэтэрээнэ А.Д. Софронова бэйэтэ иитэн-харайан улаатыннарбыт сүөһүлэрин, кроликтарын, бройлердарын уонна оҥорон таһаарбыт бородууксуйаларын лотереята үрдүк таһымҥа ааста. Атын нэһилиэктэртэн кэлэннэр, көхтөөхтүк оонньоотулар. Лотерея ылбыт дьон, олохтоохтор сүүйэн илии тутуурдаах, өттүк харалаах тарҕастылар. Оттон куйаар ситимин нөҥүө ылбыт лотерея сүүйүүлээхтэрэ бу күннэргэ сүүйүүлэрин тутан үөрүөхтэрэ.
Көхтөөх күрэхтэһиигэ олохтоохтор түөрт хамаандаҕа арахсаннар, викторина таайдылар, туйах сүлүүтүгэр, эти эрийиигэ итиэннэ ким идэһэтэ кутуруга уһунугар, муоһа улаханыгар, муҥхаҕа ким бөдөҥ собоҕо тиксибиигэр уо.д.а. күөн көрүстүлэр. Элбэх ыалдьааччылаах, ыһыылаах-хаһыылаах күрэхтэһии түмүгэр аҕам саастаахтар хамаандалара кыайыылаах тахсан кубогынан, мэтээлинэн, грамотанан наҕараадаланна.
Атыы-эргиэн түһүлгэтигэр олохтоох бааһынай хаһаайыстыбалар, ол иһигэр Ф.Р. Софронов убаһа этин, иһин, хаанын, быарын, М.П. Аввакумова быырпах, минньигэс бурдук астары, дырыһааҥкы астаан аҕалан батардылар. Маны таһынан эриллибит эт, эттэн оҥоһуллубут бородууксуйалар, сайын хомуллубут араас эмтээх оттор, чэйдэр, күөх луук атыыга хамаҕатык бардылар. Дьоро киэһэни кэрэ куоластаах Анна Канаева ырыата киэргэттэ. Дьон-сэргэ астынан, сэргэхсийэн тарҕаста диэн Тааттаттан биһиги уопсастыбаннай кэрэспэндьиэммит Вера Морхоева иһитиннэрэр.
-
0
-
0
-
0
-
0
-
0
-
0
