Издательский дом Редакция Подписка
Погода в Якутске: . -12 oC

 Таатта улууһун култууратын үлэһиттэрэ тохсунньу 27 – олунньу 6 күннэригэр Москубаҕа ыытыллыбыт Бүтүн Арассыыйатааҕы «Ураты Арассыыйа» быыстапка-форумҥа «Саха Сирэ: былыргыттан билиҥҥэ диэри» диэн ааттаах бырагырааманан кыттан кэллибит.

 Таатта улууһун култууратын үлэһиттэрэ тохсунньу 27 – олунньу 6 күннэригэр Москубаҕа ыытыллыбыт Бүтүн Арассыыйатааҕы «Ураты Арассыыйа» быыстапка-форумҥа «Саха Сирэ: былыргыттан билиҥҥэ диэри» диэн ааттаах бырагырааманан кыттан кэллибит.

Улуустааҕы Норуот айымньытын дьиэтин дириэктэрэ Гаврил Вырдылин салайааччылаах 21 киһилээх дэлэгээссийэ 10 хонук устата быыстапкаҕа эрэ кыттыынан муҥурдаммакка, Саха Өрөспүүбүлүкэтин 100, Таатта улууһа төрүттэммитэ 110, саха литэрэтиирэтин төрүттээччи А.Е.Кулаковскай-Өксөкүлээх Өлөксөй төрөөбүтэ 145, хомусчут Лука Турнин 105 сылларыгар сыһыары тутан, киэҥ хабааннаах үлэни-хамнаһы ыытта.   

        ывсе                     

Уран тарбахтаахтар түһүлгэлэрэ   

«Ураты Арассыыйа» уус-уран, бырамыысыланнай быыстапка-форумҥа 50-тан тахса эрэгийиэнтэн хомуллубут уран тарбахтаахтар үлэлэрин көрдөрдүлэр, уопут атастастылар, атыы-тутуу дьаарбаҥкатын тэрийдилэр.                  

Таатта улууһун түһүлгэтэ быыстапка киин сыанатын уҥа кынатыгар  олохсуйда. Уран тарбахтаах иистэнньэҥнэрбит, маһынан, тимиринэн, туойунан уһанар уустарбыт оҥоһуктарын көрбүт эрэ кэрэхсээтэ, сэргээтэ, абылаппыт атыыласта, баар маастардары кытта сэһэргэстэ. Барыта 42 маастар үлэтэ тардылынна.

Тату мастера

Киин куорат олохтоохторо барытын олус сирийэн көрдүлэр-иһиттилэр. Эдуард Тарабукин ытыс иһигэр батар хомустара, Федор Чярин уонна кини үөрэнээччитэ Василий Лопатин чороонноро, кытыйалара, тимир уустара Сарыал Билюкин, Иннокентий Татаринов, Сергей Тарабукин быһахтара, саха таҥаһыгар тус истиилин олохтообут Марианна Степанова дизайнерскай былааччыйалара, хаппардара, былааттара, Ульяна Матвеева туой иһиттэрэ үгүс биһирэбили ыллылар. Маастардар бэйэлэрин үлэлэрин көрдөрөрү таһынан,  атын омуктар маастардарын кытары уопут атастастылар. Сэттэ киһи Худуоһунньуктар Бүтүн Арассыыйатааҕы иис-уус сойуустарыгар киирдэ.  

7129d4a0 6e0f 4559 b297 05c76076d1a5                              

Быыстапка аһыллыытыгар П.А.Ойуунускай аатынан Таатта норуодунай тыйаатырын кылаабынай режиссера Валентина Бурнашева туруоруутунан, ЮНЕСКО шедеврэ буолбут олоҥхобут сүнньүнэн, Орто дойду олохтонуутун туһунан дьүһүйүү көрдөрүлүннэ. Маастардарбыт бары онно кыттан, быыстапкаҕа аҕалбыт оҥоһуктарын туһанан, төрөөбүт дойдубут кэрэ айылҕатын санатар көстүүлэри экранынан көрдөрөн, дьүһүйүү суолтата толору арылынна. Биир чаастаах култуурунай бырагырааманы улуустааҕы норуот айымньытын дьиэтин уус-уран салайааччыта Марина Федорова иилээн-саҕалаан ыытта. Москубаҕа олорор биир дойдулаахтарбыт: Этнология уонна антропология институтун үлэһитэ Ия Меккюсярова доллоһутар тойуга, Олена Подлужная-Уутай хомуһун тыаһа, Дарья Лаврова ыллам ырыалара бырагырааманы бэркэ киэргэттилэр.

Түмүккэ “Көстүүнэй олбуор” саалатын сахалыы оһуохай дуораана толордо.       

                   Өксөкүлээххэ сүгүрүйүү                 

Саха литэрэтиирэтин төрүттээбит А.Е.Кулаковскай-Өксөкүлээх Өлөксөй төрөөбүтэ 145 сылыгар аналлаах үбүлүөйдээх тэрээһиннэр сыл устата ыытыллаллара былааннанар. Олортон биир бастакынан Москуба куорат Даниловскай кылабыыһатыгар улуу киһибит көмүс уҥуоҕар сүгүрүйүү буолла. Култуура үлэһиттэрин сэргэ, Өксөкүлээх Өлөксөй сыдьааннара, киин куоракка устудьуоннуу сылдьар убайдыы бырааттыы Ян, Андрей Пермяковтар, эһэлэрин уҥуоҕар тахсан, тыыннаах сибэкки уурдулар. Олорор сирбититтэн кылабыыһаҕа барар-кэлэр айаммытын өрөспүүбүлүкэ Бастайааннай бэрэстэбиитэлистибэтэ  тэрийдэ.    

982598                               

Лука Турнин суолунан                   

Саха хомуһун аҕата дэппит улуу хомусчут, биир дойдулаахпыт, «Үлэ Кыһыл Знамята» уордьаннаах Лука Николаевич Турнин быйыл төрөөбүтэ 105 сыла, ону сэргэ Таатта хомусчуттарын Москуба куоракка илдьэ кэлэн, хомус дьүрүскэн тыаһа дойдубут тэбэр сүрэҕэр дуораччы тыаһаабыта 65 сыла. Онон биир дойдулаахтара буолан туран, улуу хомусчуппутугар сүгүрүйэн, Москубаҕа  быйыл саха хомуһа, чопчулаан эттэххэ, Турнинныы тардыы дьүрүскэн тыаһа иһиллиэхтээх диэн санааттан хомуспутун илдьэ тиийбиппит.

b7a123d0 6f0e 43eb 9d61 3fefd853f46e

Быыстапкаҕа турарбыт тухары сахалар түһүлгэлэригэр хомус тыаһа тохтообокко кэриэтэ иһилиннэ. Эрдэттэн баҕа санаабыт – “Лука Турнин 1948 сыллаахха аан бастаан хомус тыаһын иһитиннэрбит Колоннай саалатыгар киирэн, хомус тардыбыт киһи” диэн этэ. Кэлэрбит биир хонук хаалбытын кэннэ, бэрт дьиктитик быыс-хайаҕас көстөн, салайааччыбыт Гаврил Вырдылин Судаарыстыбаннай Дуума дьокутаатын көмөлөһөөччүтэ Сергей Ивановтуун кэпсэтэн, субуота күн Сойуустар дьиэлэрин Колоннай саалатыгар киирэн, хомустуур дьолго тигистибит. 1774 сыллаах баараҕай тутуу архитектуратын сөҕө-махтайа көрдүбүт, историческай суолталаах Колоннай саала үрдүкү сыанатыгар ис-испититтэн долгуйан туран, Лука Турниммыт аатын киэн тутта ааттаан дьүрүһүтэ хомустаатыбыт.    

26277797 11d6 4b03 b012 010509471961                          

Санкт-Петербург куоракка                        

Биир күммүтүн Санкт-Петербург куоракка анаатыбыт. Түүннэри поеһынан айаннаан, сарсыарда эрдэ тиийдибит. Былыргы куорат эриэккэс архитектуратын сөҕө-махтайа көрө, Невскай проспегынан хаамтыбыт. Кэрэ-бэлиэ миэстэлэригэр өйдөбүнньүк хаартыскаҕа түстүбүт, аатырбыт Исаакиевскай собуорга, Эрмитажка сырыттыбыт.    

8a6fbe58 73e7 458f bf18 e86f3d167e49            
Борис Федорович Неустроев-Мандар Уус сорудаҕынан, Арассыыйа  этнографиятын мусуойугар «Моҕол ураһа» кинигэни туттардыбыт. 2025 с.  Тааттаҕа ыытыллыахтаах Манчаары оонньууларын көрсө, саха чаҕылхай киһитэ В.В.Никифоров-Күлүмнүүр 1913 с. «Манчаары» айымньытын аахпыт сиригэр, «Бродячая собака» арт-кафеҕа, анаан сырыттыбыт. Бэлиэтээн эттэххэ, бу айымньыны Дьохсоҕонтон төрүттээх Мария Николаева, Боотурускай улуус кулубатын Егор Дмитриевич Николаев-I кыыһа, нууччалыы тылбаастаабыта.  
Күммүтүн Питергэ олорор сахалары кытта көрсүһүүнэн түмүктээтибит.     

Арассыыйатааҕы Норуот айымньытын дьиэтигэр

XVIII үйэҕэ тутуллубут, эмиэ историческай суолталаах ураты архитектуралаах дьиэҕэ экскурсияттан саҕалаан баран, “төгүрүк остуол” тула олорон, үлэбит сүнньүнэн кэпсэтиинэн түмүктээтибит.

Арассыыйатааҕы Норуот айымньытын дьиэтин дириэктэрин бастакы солбуйааччы Мери Русанова быйыл дойдуга култуурунай нэһилиэстибэ сыла биллэриллибитинэн, ити хайысхаҕа үгүс үлэ ыытыллаары турарын сырдатта. Сыллата ыытар бэстибээллэрин, куонкурустарын туһунан кэпсээтэ. Өрөспүүбүлүкэтээҕи Норуот айымньытын дьиэтин дириэктэрэ Сергей Семенов үлэлэһэн, саха хомуһа Арассыыйа норуоттарын матырыйаалынай сыаннастарын реестригэр киирбитин эттэ. Түгэни мүччү туппакка, маастар Эдуард Тарабукин хомустаан иһитиннэрбитигэр, Мери Вахтанговна: “Эспиэртиир хамыыһыйа сөпкө быһаарбыт эбит”, -- диэн санаатын үллэһиннэ.      

              Тату М.Федорова.jp111g

Бэртээхэй 10 хонук

Уон хонуктаах командировка бары өттүнэн үтүө түмүктээх буолла. Хас биирдиибитигэр саҥа санааны сахта.                    
Түгэнинэн туһанан, бу айаны тэрийбит, өйөөбүт салайааччыларбытыгар, улууспут баһылыга Михаил Соровка, быыстапкаҕа тус ыҥырыы тутан, улууспут уустарын кытыннарбыт Марианна Степановаҕа уо.д.а. барҕа махталбытын биллэрэбит. Инникитин аартык арыллан, маннык айаннар сыллата ыытылла туралларыгар баҕарабыт.

                                     
Галина ПОЛУСКИНА,
Л.Н.Турнин аатынан

«Алгыс» норуот айымньытын дьиэтин уус-уран салайааччыта,

Таатта, Тыараһа

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением