Быыстапкаҕа барыта 40-ча үлэ турда: уруһуйдаммыт хартыыналар, төрүт иис оҥоһуктара, оҕуруолаах киэргэллэр, мулиненан быысыпка, макраме ньыматынан баайыллыбыт паннолар...
Дьаһалта бэтэрээннэрэ Анна Ильинична Ефимова, Валентина Иннокентьевна Михайлова төрүт иискэ дьоһун үлэлэрдээхтэр. Иккиэн сииктэрэ көнөтүнэн, уурбут-туппут курдук тупсаҕай тигиилэринэн, өҥү-дьүһүнү сатаан дьүөрэлииллэринэн дьон биһирэбилин ылаллар.
Хатаспытын уонунан сылга салайан олорбут, төрөөбүт төрүт сирэ сайдарын туһугар билиитин-көрүүтүн, сатабылын биэрэн туран үлэлээбит Парасковья Афанасьевна Козлова «Кыһыҥҥы киэһэ» диэн үлэтигэр чүмэчи уота салгыҥҥа хамсыыра субу курдук ойуулааммыта сөхтөрдө.
Өр сылларга сири бас билии араас көрүҥүн докумуоннааһыҥҥа тахсыылаахтык үлэлэспит Маргарита Кимовна Скрыбыкина бу быыстапкаҕа 7 хартыынатынан кытынна. Кини дьүһүйүүлэрэ уоскулаҥ уйан тыыныгар киллэрэр күүстээхтэр. Ааҕар-суоттуур идэлээх Екатерина Николаевна Тарабукина киһиттэн ураты болҕомтолоох, кыраҕы харахтаах буолууну, чуолкай хамсаныыны эрэйэр оҕуруонан үлэни баһылаабыт. Кини кыыс кэрэ көстүүтүн тиһэн таһаарбыт. Розалия Николаевна Керегяева холобура киһи олоҕун ханнык баҕарар кэрчик кэмигэр сайдар, сатыыр кыахтааҕын туоһулуур. Ол курдук, айылҕаны оҕуруонан дьүһүйбүтэ кэрэхсэбиллээх.
Дьаһалта үлэтэ бүтэн биэрбэт түбүктээҕин, эбиитин кэлин хааччах кэминэн сибээстээн, өссө уустугурбутун бары көрө-билэ сылдьабыт. Ол эрээри кэлэктиип онтон санаатын түһэрбэккэ, күн бүгүн үлэ үөһүгэр сылдьар, нэһилиэнньэ олоҕун тупсарар туһугар үлэлиир-хамсыыр. Тыа хаһаайыстыбатын исписэлииһэ Шелковникова Надежда Ивановна куукула, брошь оҥорор, буҕаалтырдар Ольга Никитична Осипова макраме ньыматынан панно, Екатерина Дмитриевна Реева уруһуйдуур эбиттэр.
Дьэ, ити курдук дьаһалтаҕа урут да үлэлээбит, билигин да үлэлии сылдьар дьон биир тыыҥҥа, биир тэтимҥэ киирэн, бииргэ буолууттан биһирэми, кэккэлэһэ сылдьартан кэрэхсэбили ыллылар.
Наталья Руфова,
Хатас .
-
0
-
0
-
0
-
0
-
0
-
0
