Бу бэлиэ күнү көрсө “Ыллыым ээ, ыллыым” хоһооно 32 омук тылынан тылбаастанан, антология киэбинэн кинигэ буолан таҕыста. Кинигэни Саха сирин суруйааччыларын сойууһа көҕүлээн, иилээн-саҕалаан таһаарда. Идиэйэ ааптардара – Наталья Харлампьева уонна Гаврил Андросов. “Якутскэнерго” тэрилтэ (дириэктэр А.А. Стручков) өйөөһүнүнэн күн сирин көрдө, “Саха сирин суруйааччылара” ассоциация (сал. О.Г. Сидоров) бэйэтин кылаатын киллэрдэ. Кинигэ дьоҕус эрээри, тупсаҕай көрүҥнээх. Бүгүн, сэтинньи 14 күнүгэр, күнүс 3 чаастан Саха тыйаатырын Алампа саалатыгар “Ыллыым ээ, ыллыым” кинигэ сүрэхтэниитэ буолуоҕа. Бу эрэ күн кинигэ 700 солкуобайга атыыланыаҕа. Антология тахсыбыт тираһа аҕыйах – 500 экземпляр.
Маны тэҥэ Саха литературатын төрүттээччилэртэн биирдэстэрэ, талааннаах драматург, бэйиэт, публицист, эрэдээктэр Анемподист Иванович Софронов-Алампа аатын үйэтитэр сыаллаах, ускуустуба араас эйгэтин талааннаах дьонун бэлиэтиир «Алампа» уопсастыбаннай бириэмийэ суруйааччы төрөөбүт күнүгэр — сэтинньи 14 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр, киэһэ 18.30 ч., туттарыллыаҕа.
Ыспыраапка
Анемподист Иванович Софронов - Алампа - 1886 сыл сэтинньи 14 күнүгэр Боотур Уус улууһугар (билиҥҥитэ — Таатта улууһа) сэниэ ыалга төрөөбүтэ. Ийэтэ суох улааппыт. Түөрт кылаастаах таҥара дьиэтин оскуолатын иккис кылааһын бүтэрбит.
1907 сыллаахха «Якутский край» хаһыакка наборщигынан үлэҕэ киирбит. Онтон Кирилэ Дабыыдап диэн үөрэҕэ суох балыксыт, балыгынан эргинэр киһиэхэ суруксутунан үлэлээбитэ. «Саха саҥата» сурунаалга үлэлээбит, 1912 сыллаахха «Төрөөбүт дойдум» диэн аатырбыт хоһооно бэчээттэммит.
Олоҕун устата талааннаах драматург быһыытынан биллибитэ, кини драмалара саха театра олохтоноругар улахан төһүү буолбуттара, кини «Дьадаҥы Дьаакып» (1914), «Таптал» (1916) пьесалара киэҥник биллибиттэрэ. 150 ырыа уонна хоһоон ааптардара. Кэпсээннэрэ билиҥҥэ дылы саха литературатыгар холобур буола сылдьаллар. Тылбаасчыт быһыытынан эмиэ биллибит киһи. «Манчаары» диэн ааттаах саха бастакы хаһыатын бастакы эрэдээктэрэ. «Чолбон» сурунаал уонна Саха тыйаатырын бастакы салайааччытынан үлэлээбитэ. ЯЦИК дьокутаатынан талылла сылдьыбыта.
2012 сыллаахха атырдьах ыйын 15 күнүгэр Анемподист Иванович Софронов — Алампа көмүс уҥуоҕа, Таатта улууһун олохтоохторун уонна аймахтарын көрдөһүүлэринэн, Ытык-Күөлгэ Хадаайы диэн сиргэ иккистээн көмүллүбүтэ.
Тахсыбыт кинигэлэрэ: Дьадаҥы Дьаакып, Манчаары, Оонньуулар: Пьесалар., Бүдүрүйбүт көммөт: Пьеса , Таптал: Пьеса. ,Төрөөбүт дойду: Хоһоон. — Дьокуускай: Кинигэ кыһата, Талыллыбыт айымньылар, Туллук-туллук доҕоттор: Кыра оҕолорго хоһооннор, Хоһооннор, поэмалар, Куоратчыт: кэпсээннэр, уо.д.а.
-
2
-
0
-
0
-
0
-
0
-
0
