Издательский дом Редакция Подписка
Погода в Якутске: . -10 oC

Сэтинньи 17 күнүгэр “Сэргэлээх уоттара” култуура киинигэр Гаврил Торотоев 50 сааһыгар аналлаах “Санааттан санаа саҕыллар” кинигэ сүрэхтэниитэ буолла.

Сэтинньи 17 күнүгэр “Сэргэлээх уоттара” култуура киинигэр Гаврил Торотоев 50 сааһыгар аналлаах “Санааттан санаа саҕыллар” кинигэ сүрэхтэниитэ буолла.

Ил Түмэн наукаҕа, үөрэххэ, култуураҕа, иһитиннэриини киэҥник тарҕатыыга уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева үбүлүөйдээҕи эҕэрдэлээтэ:

-Ытыктабыллаах Гаврил Григорьевич! Эйиэхэ билигин саамай үчүгэй саас үүннэ. Тоҕо диэтэххэ, ааспыт сылларыҥ – баайыҥ, оттон инники сылларыҥ – кэскилиҥ буолаллар. Ис-искиттэн наһаа култууралааххын бэлиэтээммин этиэхпин баҕарабын. Хаһан даҕаны улаханнык саҥарбаккын, олуйсан, мөккүһэн турбаккын. Бэйэҥ идэлээх быһыытынан билиигин олус үрдүктүк тутаҕын. Айар дьоҕурдааххын кэнники саҥа биллим. “Санааттан санаа саҕыллар” кинигэҕин тиһэҕэр дылы аахпатым буолан баран, арыйталаан көрдүм. Өссө хоһоон суруйаҕын, ырыа айаҕын, атын да өттүттэн арылынныҥ. Сахабыт тыла, литературата, култуурата чөл кэмигэр эн тирэх ылбыккын. Оттон билигин отой атын кэмҥэ олоробут. Сайдыыбыт, биир курдук, баар. Иккис курдук, ол сайдыыбыт тылбытыгар улахан сабыдыаллаах. Саха кылаассык суруйааччыларын нэһилиэстибэтигэр, эйигин үөрэппит саха чулуу дьонун билиитигэр бигэнэн улахан бэлэми ылбыккын. Уруккута – Дьокуускай судаарыстыбаннай универистета, билиҥҥитэ – Хотугулуу-Илиҥҥи федеральнай университет туох баар ыччаппытын, интэлигиэнсийэбитин иитэн таһаарбыта. Билигин интэлигиэнсийэни иитэргэ анаан күн аайы үлэлиигин. Биһиги элбэхтик көрсөбүт. Тылбытын хайдах чөл илдьэ сылдьарбытын, литературабытын хайдах сайыннарарбытын, култуурабытын атын таһымҥа хайдах таһаарарбытын, онтубутун киэҥ эйгэҕэ хайдах билиһиннэрэрбитин, ыччакка хайдах тиэрдэрбитин кэпсэтэбит. Билигин институтуҥ исписэлиистэрин көмөлөрүнэн, саха тылын, литературатын уонна култууратын үөрэтэргэ аналлаах кэнсиэпсийэ аан бастаан оҥоһулла сылдьар. Манна улахан сыалы туруордубут – оҕо төрүөҕүттэн идэлээх үөрэҕи бүтэриэр дылы туох билиини ылыахтааҕын, туох сатабыллаах тахсыахтааҕын быһаарыы. Онон Хотугулуу-Илиҥҥи федеральнай университет үлэһиттэригэр махтаныахпын баҕарабын. Саха Өрөспүүбүлүкэтин бырабыыталыстыбатын бэрэссэдээтэлин солбуйааччыта Сергей Местников кэнники сылларга күүскэ ылсан, бырагыраамабыт үптэннэ-харчыланна. Өрөспүүбүлүкэ Ил Дархана Айсен Николаев былырыын өйөөн, судаарыстыбаннай тылбыт чөл, научнай төрүттээх буоларын туһугар СӨ Наука Академиятын иһинэн Тылы үөрэтэр, харыстыыр, сайыннарар киин тэрилиннэ. Бу киин арылларыгар күүс-көмө буолбуккар махтанабын. Инникитин ол киин Хотугулуу-Илиҥҥи федеральнай университеты кытта сүбэнэн үлэлиэҕэ. Эн сүбэҕэр-амаҕар сүрдээҕин наадыйабыт. Кэмитиэппитигэр тылбаасчыт наада буолла даҕаны, тыл боппуруоһугар мунаардыбыт даҕаны – “Торотоевтан ыйытыахха” диибит. Онон өссө даҕаны бииргэ үлэлэһиэхпит диэн эрэнэбин. Саҕахтарыҥ арылла турдуннар, санаабытыҥ барыта туоллун!

Түмүккэ Феодосия Васильевна кэмитиэт аатыттан бочуоттаах грамоталары итиэннэ “Саха филологиялаах наукатын сайыннарыыга уонна төрөөбүт тыл, литература үрдүк квалификациялаах исписэлиистэрин бэлэмнээһиҥҥэ кылаатын иһин” Ил Түмэн бэрэссэдээтэлин солбуйааччы Антонина Григорьева ыыппыт махтал суругун Гаврил Григорьевичка туттарда.

  • 1
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением