Ааспыт сыл устата буолбут, холобур, «Якутия миру” этнофестиваль, “Ньурба көмүс күһүнэ”, Ньурба к. уонна хас нэhилиэк аайы сыл устата ыытыллыбыт култуура араас тэрээһиннэрэ “Ньурба алгыстаах аартыга” диэн ааттанан, үрдүк таhымңа ыытыллыбыттара.
2022 сыл - Саха Автономнай Өрөспүүбүлүкэтэ тэриллибитэ 100 сыла - биһиги улууспутугар уонна бүтүн өрөспүүбүлүкэҕэ даҕаны култуура эйгэтигэр историяҕа хаалар кэрэ бэлиэ түгэннэрдээх ааста: Ньурбаҕа драматическай тыйаатырбыт кэтэһиилээх саҥа дьиэҕэ киирдэ. Саха норуотун ураты дириҥ суолталаах ытык үҥкүүтэ – оһуохай – киһи аймах өйүнэн айбыт үйэлээх баайын кылаан чыпчаала буолла, о.д.а.
Биһиги култуурабыт үйэ тухары төрүт үгэстэри, сиэри-туому, норуот олоҕун укулаатын сүтэрбэккэ тутан сылдьар, көлүөнэттэн-көлүөнэҕэ тириэрдэр, сайдар уонна чэчириир аналлаах. Култуура эйгэтэ мэлдьи болҕомтону, утумнаах уонна боччумнаах үлэни эрэйэр.
100 сыл устата биhиги улууспутугар элбэх сүдү талааннаах дьон, уопсастыбаннай-бэлитиичэскэй диэйэтэллэр, кыраайы үөрэтээччилэр, фольклору чинчийээччилэр, култуура уонна искусство диэйэтэллэрэ, олоҥхоһуттар, тойуксуттар, оһуохайдьыттар, норуот ырыаһыттара, киинэ кэрэ эйгэтигэр сыраларын ууран үлэлээбит ытык дьоммут, худуоһунньуктар, артыыстар, онтон да атыттар төрөөбүт Ньурбабыт инники күөҥҥэ сылдьарын туһугар үлэлээн-хамсаан ааспыттара, кэрэ эйгэтэ сайдарыгар бэйэлэрин сүдү кылааттарын киллэрбиттэрэ. Кинилэр уонна билигин айа-тута сылдьар кэрэ эйгэтин үлэһиттэрин күүстэринэн Ньурбабыт култуурата салгыы сайдар, кини историята суруллар.
Култуура ытык-мааны үлэһиттэрин, бэтэрээннэрин, өйөөччүлэрин, сүгүрүйээччилэрин ис сүрэхпиттэн эҕэрдэлээн туран, баҕарабын эһиэхэ умсулҕаннаах айар үлэҕитигэр өссө үрдүк чыпчааллары, үгүс кыайыылары, истиҥ көрөөччүлэргит ахсаана өссө да элбии турдуннар!" — диэн Антонина Григорьева эҕэрдэлээтэ.
Түмүккэ Антонина Афанасьевна ССРС култууратын туйгунугар, Саха АССР култууратын үтүөлээх үлэһитигэр, Саха Өрөспүүбүлүкэтин композитордарын сойууһун чилиэнигэр Афанасий Моргусовка өрөспүүбүлүкэ култууратын сайдыытыгар тус кылаатын иһин Ил Түмэн Бэрэссэдээтэлин аатыттан махтал бэлиэни туттарда.
Юлия Васильева, Юлия Кириллова, Василий Петров, Марианна Попова, Маргарита Ноева, Наталья Трофимова Ил Түмэн Бэрэссэдээтэлин солбуйааччытын махтал суругунан бэлиэтэннилэр.Бу тэрээһиннэргэ Россия норуодунай артыыһа, биллиилээх режиссер, Саха Өрөспүүбүлүкэтин Судаарыстыбаннай Сүбэһитэ Андрей Борисов кыттыыны ылла.
Антоновкатааҕы "Түһүлгэ" норуот айымньытын дьиэтин уус-уран салайааччыта Ньургуйаана Матвеева туруоруутугар "Айуу, чэ!" норуодунай тыйаатыр артыыстарын уонна бөһүөлэк олохтоохторун толоруутуугар "Ойуун түүлэ" испэктээкил көрөөччүлэр биһирэбиллэрин ылла. Ньурбаҕа култуура сылын түмүктүүр тэрээһиннэр ити курдук үрдүк таһымнаахтык, туһалаахтык ыытылыннылар. Инникитин саҥа бырайыактар, элбэх сонун үлэлэр торумнаннылар.
-
0
-
0
-
0
-
0
-
0
-
0
