Издательский дом Редакция Подписка
Погода в Якутске: . -12 oC

Олунньу  15 күнүгэр «Арассыыйа - мин историям» Дьокуускайдааҕы түмэлгэ Кыайыы 75 сылыгар ананар Бүтүн Арассыыйатааҕы  хор бэстибээл-куонкурус регионнааҕы түһүмэҕин кыайыылаахтара уонна гран-при хаһаайына билиннилэр.

Олунньу  15 күнүгэр «Арассыыйа - мин историям» Дьокуускайдааҕы түмэлгэ Кыайыы 75 сылыгар ананар Бүтүн Арассыыйатааҕы  хор бэстибээл-куонкурус регионнааҕы түһүмэҕин кыайыылаахтара уонна гран-при хаһаайына билиннилэр.

Тэрээhин СӨ култууратын үтүөлээх үлэ­һитэ, «Үлэ Кыһыл Знамята»  уордьанын кавалера, биллиилээх хормейстер Семен Васильев 90 сыллаах үбүлүөйүгэр, «Кэнчээри» оҕо акадьыамыйатын тэрийээччитэ, хор кэлэктиибин салайааччыта, РФ уонна САССР култууратын үтүөлээх үлэһитэ, «Аҕа дойду иннигэр үтүөлэрин иһин» уордьан мэтээлин кавалера Василий Парников 75 сааһыгар, СӨ Судаарыстыбаннай Мунньаҕын (Ил Тумэн) 25 сылыгар анаан ыытылынна. Күрэххэ Нам, Уус Алдан, Таатта, Мэҥэ Хаҥалас, Чурапчы, Бүлүү, Ньурба улуустарыттан, Жатай бөһүөлэктэн, Тулагы, Маҕан сэлиэнньэтиттэн уонна киин куораттан уопсайа 23 хор ансаамбыла, ол иһигэр 676 ырыа куттаах дьон көхтөөх  кыттыыны ыллылар. Үөрүүлээх тэрээһин Арассыыйа уонна Саха сирин гимнарын ыллааһынтан саҕаланна.

Кыттылаахтары уонна кыайыылаахтары СӨ Судаарыстыбаннай Мунньаҕын (Ил Тумэн) бэрэсээдээтэлин бастакы солбуйааччы Александр Жирков, өрөспүүбүлүкэ парламенын вице-спикерэ Виктор Губарев, СӨ култуураҕа уонна духуобунаска миниистирин бастакы солбуйааччы Владислав Левочкин, Уус Алдан улууһун баһылыга Алексей Федотов, «Бүтүн Арассыыйатааҕы хор уопсастыбатын» Саха сиринээҕи салаатын бэрэссэдээтэлэ, СӨ композитордарын сойууһун бэрэссэдээтэлин солбуйааччыта, СӨ искусствотын үтүөлээх диэйэтэлэ, искусствоведение хандьыдаата Татьяна Павлова-Борисова эҕэрдэлээтилэр.

Ол курдук, Александр Жирков гран-при кыайыылааҕар бэлэх туттарыан иннинэ санаатын эттэ: «Мин Уус Алдан улууһун Найахы нэһилиэгин, САССР култууратын үтүөлээх үлэhитэ, «Үлэ Кыһыл Знамята» уордьан кавалера, саха самодеятельнай хорун Сойууска, Саха сиригэр үрдүк таһымҥа таһаарбыт Семен Гаврильевич Васильев аатынан  норуодунай хора гран-при хаһаайына буолуо дии санаабытым. Хомойуох иһин, кинилэр бары кыахтарын ситэри туһамматылар. Ол эрэн, түгэнинэн туһанан, Найахы хорун туһунан аҕыйах тылы этэрим наада. 1963 сыллаахха, 57 сыл анараа өттүгэр,  Семен Васильев Наайахы бөһүөлэгин холкуоһун үлэһиттэриттэн 55 кыттааччылаах хор ансаамбылын тэрийбитэ. Мин билэрбинэн,  55 кыттааччылаах хор иһигэр 23 холкуос үлэһитэ, 3 тыраахтарыыс, 17 ыанньыксыт, 3 медицинскэй сиэстэрэ, 5 кулууп үлэһитэ, 7  араас тэрилтэ үлэһиттэрэ (бэтэринээрдэр, бухгалтердар, учуотчуктар, уо.д.а). киирбиттэрэ.  Найахы кыра нэһилиэгиттэн тахсыбыт хор ансаамбыла 10 сыл ситиһиилээхтик үлэлээн баран, аан бастакынан ССРС тэриллибитэ 55 сылын бэлиэтиир бырааһынньыкка, Кремль дыбарыаһыгар хордар түмсүүлэрин улахан тэрээһинигэр кыттар чиэскэ тиксибитэ. Ону таһынан, дьүүллүүр сүбэ бу хор ансаамбылын талаанын бэлиэтээн, түмүктүүр тэрээһиҥҥэ хос кытталларыгар кыах биэрбитэ. Саха норуотун хордарыгар манныаха тэҥнээх ситиһиигэ ханнык да ансаамбыл тиийэ илик. Билигин бу куонкурус түмүгүн билбэппин. Түмүгү иһитиннэрии кэннэ гран-при наҕараадатын хаһаайыныгар туттарыам. Кыайыылааҕынан ким да буолбутун иһин, баҕарыам этэ, айар үлэлэрэ өссө баай буоллун, ону таһынан, ханна да, ханнык да өрөспүүбүлүкэ, дойду сыанатыгар кыттыбыккытын иһин, саха норуотун хор искусствотын уруйдаан-айхаллаан сылдьаргытыгар баҕарабын. Барыгытын бырааһынньыгынан эҕэрдэлиибин!».

Бэстибээл-куонкурус гран-притын хаһаа­йынынан Мэҥэ Хаҥалас улууһун Төҥүлү нэһилиэгин норуодунай хорун биллэрдилэр. Гран-при наҕараадатын парламент вице-спикерэ Александр Жирков туттарда. Хор салайааччытынан Галина Варламова буолар. Ансаамбыл бу сылга 45 сыллаах үбүлүөйүн бэлиэтиир. Кэлэктиип  Владивосток куоракка ыытыллар Бүтүн Арассыыйатааҕы  хор  бэстибээлигэр кыттар  чиэскэ тигистэ.

Санатар буоллахха, Уус Алдан улууһун Найахы бөһүөлэгин С.Г. Васильев ааты­нан норуодунай хора 1967 сыллаахха Бүтүн Арассыыйатааҕы бэстибээл уус-уран само­деятельнаһын лауретынан буолбута уонна 1972 сыллаахха Москваҕа П.И. Чайковскай аатынан кэнсиэртиир саалатыгар кыттыыны ылбыта.

Куонкуруска икки көрүҥ матыыбынан ыллаатылар – акадьыамыйалаах уонна норуодунай матыыбынан. Акадьыамыйалаах ыллыыр матыып бырагыраамата икки араас айымньылартан турар. Бу айымньылар акапелланан ылланар уонна Арассыыйаҕа байыаннай ырыалары айхаллааһыҥҥа анаммыттар. Оттон норуот матыыбын бырагырымаата үс араас айымньылартан турда.

Кыайыылаахтарга  дипломнар, сертификаттар уонна бэлиэ сувенирдар  туттарылыннылар. Түмүккэ хор кэлэктииптэрэ гала-кэнсиэркэ кытыннылар. Кинилэри тэҥэ РФ  үтүөлээх артыыһа, СӨ норуодунай артыыһа, САССР үтүөлээх артыыһа, Саха сирин комсомол бириэйэмиэтин лауреата, ырыаһыт Александр Самсонов, СӨ култууратын үтүөлээх үлэһитэ Николай Спиридонов уонна СӨ үтүөлээх артыыһа Александр Емельянов ыллаатылар. Салгыы, үһүс түһүмэх бүтүүтэ, Бүтүн Арассыыйатааҕы  хорга бэстибээл-куонкурус регионнааҕы эстафетата Красноярскай куоракка бэриллиэҕэ.

Кыайыылаахтар

— «Акадьыамыйалаах матыыбынан толоруу» номинацияҕа норуодунай кэлэктииптэр ортолоругар I истиэпэннээх лауреат дипломунан наҕараадаланна Семен Васильев аатынан Наайахы норуодунай хора (Балыктаах сэл, Уус Алдан улууһа (оройуона);  — «Акадьыамыйалаах матыыбынан толоруу» номинацияҕа норуодунай кэлэктииптэр ортолоругар I истиэпэннээх лауреат дипломунан наҕараадаланна Семен Васильев аатынан Наайахы норуодунай хора (Балыктаах сэл, Уус Алдан улууһа (оройуона);  — «Акадьыамыйалаах матыыбынан толоруу» номинацияҕа самодеятельнай  хор кэлэктииптэрин ортолоругар  I истиэпэннээх лауреат дипломунан наҕараадаланна  Степана Гоголев аатынан Дьокуускайдааҕы педагогическай колледж эр дьонун устудьуон хора; — «норуодунай матыыбынан толоруу» номинацияҕа норуодунай кэлэктииптэр ортолоругар I истиэпэннээх лауреат дипломунан наҕараадаланна казачье норуодунай хора; — «норуодунай матыыбынан толоруу» номинацияҕа самодеятельнай  хор кэлэктииптэрин ортолоругар  I истиэпэннээх лауреат дипломунан наҕараадаланна М.К.Аммосов аатынан ХИФУ «Алгыс» устудьуоннарын хора.

Ыспыраапка

Арассыыйатааҕы  хорга бэстибээл-куонкурус регионнааҕы түһүмэх тэрийээччилэрэ - СӨ Судаарыстыбаннай Мунньаҕа (Ил Тумэн), СӨ култуураҕа уонна духуобунаска министиэристибэтэ, Өрөспүүбүлүкэтээҕи норуот айар үлэтин уонна социальнай-култуурунай технологияларын дьиэтэ, «Модун күүс» бырайыак көҕүлүүр бөлөҕө уонна «Бүтүн Арассыыйатааҕы хор уопсастыбатын» Саха сиринээҕи салаата.

Бэлиэтээн эттэххэ

Бэстибээл 2019 сыл ахсынньы 11 күнүттэн 2020 сыл муус устар 27 күнүгэр диэри ыытыллар. Үс түһүмэхтээх.  Бэстибээл 2019 сыл ахсынньы 11 күнүттэн 2020 сыл муус устар 27 күнүгэр диэри ыытыллар. Үс түһүмэхтээх.  I түһүмэх (кэтэхтэн) – 2019 сыл ахсынньы 1 күнүттэн 2020 сыл тохсунньу 17 күнүгэр диэри.II түһүмэх(сирэй) – 2020 сыл олунньу 15 күнүгэр.III түһүмэх (телевидениенэн) – 2020 сыл муус устар 1-25 күннэригэр.Кыайыылаахтары наҕараадалааһын муус устар 27 күнүгэр буолар.

Василий ПРОКОПЬЕВ

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением