Томпо оройуонугар турар кэрэ айылҕалаах Мэҥэ Алдан нэһилиэгин Николай Иванович Колодезников аатынан култууратын дьиэтэ бу харантыынынан сибээстээн, ыраахтан үлэлииргэ күһэллибитэ. Ол да буоллар үлэтэ-хамнаһа, былаана киэҥ.
Ол курдук, култуура дьиэтин уус-уран салайааччыта Роман Тырахинов этэринэн, быйылгы былааҥҥа улахан тэрээһиннэр бааллар. Чуолаан, Саха сирин норуодунай суруйааччыта Егор Петрович Неймоховка анаммыт үбүлүөйдээх киэһэ, Николай Иванович Колодезников төрөөбүтэ 100 сылыгар, Улуу Кыайыы 75 сылыгар аналлаах араас хабааннаах тэрээһиннэр ыытыллаллара күүтүллэр.
«Маны таһынан, саамай улахан тэрээһин -- былыргы үс Байаҕантай нэһилиэктэрин ыһыаҕа буолуохтаах этэ. Ол да буоллар, докумуон, сынаарыйдар, балаһыанньалар, таҥас эскизтэрэ бэлэмнэнэллэр, реквизиттэри дьиэҕэ олорон оҥоробут, үлэлэһэбит. Итиэннэ нэһилиэги кытта Инстаграм уонна араас социальнай ситим нөҥүө араас тэрээһин күрэх оҥорон ыытан эрэбит. Холобур, бэйэбит сирэйбитин Инстаграмҥа арыйан, урукку-хойукку үлэлэрбитин сырдатыыны саҕалаатыбыт. Сибээспит куһаҕан буолан Интернеппит мөлтөх. Аны уот барар буолан, эмиэ моһуоктуур. Ол да буоллар санаабытын түһэрбэккэ, үлэбитин салгыы ыытабыт. Бу уустук кэмҥэ түмсүүнэн ыарыыны кыайыахпыт диэн эрэнэбит», -- диэн Роман Егорович былаанын үллэстэр.
-
0
-
0
-
0
-
0
-
0
-
0
