Сурунаал маҥнайгы нүөмэрэ 1926 сыл сэтинньи 2 күнүгэр тахсыбыта.
Онтон ыла күн бүгүнүгэр диэри ситимин быспакка, тутулун уларыппакка, ый аайы тахсарын туһугар сурунаал эрэдээксийэтэ айымньылаахтык үлэлээн кэллэ.
“Чолбон” сурунаалы төрүттээччинэн Саха сирин маҥнайгы драматура, прозаига, поэта Анемподист Иванович Софронов-Алампа буолар. Манна эбии бэлиэтээн эттэххэ, Анемподист Иванович быйыл төрөөбүтэ 135 сылын туолла.
Үбүлүөйдээх тэрээһин маҥнайгы күнүгэр суруйааччылар уонна айар уопсастыбаннас Алампа Соппуруонап Дьокуускай эргэ куоратыгар турар мемориальнай дьиэтин таһыгар мустан, сибэкки дьөрбөтүн уурдулар. Улуу поэт олорбут олоҕун, оҥорбут үлэтин ахтан-санаан аастылар.
Салгыы тэрээһин чэрчитинэн иккис күн “Чолбон” сурунаал кэлэктиибэ уонна М.К. Аммосов аатынан түмэл-дьиэ үлэһиттэрэ сурунаал историятын кэрэһилиир быыстапканы арыйдылар.
Быыстапканы арыйыы үөрүүлээх лиэнтэтин култуура миниистирэ Юрий Куприянов, “Чолбон” сурунаал бас эрэдээктэрэ Гаврил Андросов уонна Ем. Ярославскай аатынан судаарыстыбаннай түмэл дириэктэрин солбуйааччы Айталина Решетникова быстылар.
Быыстапка М.К. Аммосов аатынан түмэл-дьиэҕэ ый кэриҥэ үлэлиэҕэ.
Сэтинньи 17 күнүгэр Башкортостан Өрөспүүбүлүкэтиттэн Арассыыйа суруйааччыларын сойууһун чилиэнэ, Башкортостан Өрөспүүбүлүкэтин култууратын үтүөлээх үлэһитэ, “Шонкар” уус-уран литературнай, уопсастыбаннай-бэлитиичэскэй ыччат сурунаалын сүрүн эрэдээктэрэ Айгиз Баймухаметов уонна Татарстаан Өрөспүүбүлүкэтин суруйааччыларын сойууһун чилиэнэ, “Казан Утлары” сурунаал кылаабынай эрэдээктэрэ Рустем Галиуллин күндү ыалдьыт буоллулар.
Сэтинньи ый 18 күнүгэр “Россия – мин историям” мусуой-пааркаҕа тэрээһин бүтэһик үөрүүлээх чааһа буолла. СӨ Ил Дарханын уонна Бырабыыталыстыбатын дьаһалтатын аппараатын салайааччы Афанасий Владимиров кэлэн эҕэрдэлээтэ.
Уһун кэмҥэ үлэлээбит дьон наҕараадаланнылар: Иван Осипов-Ойуур Уйбааҥҥа «Гражданскай килбиэн» бэлиэни туттардылар, Сэмэн Тумат СӨ бэчээтин туйгуна буолла, Николай Винокуров-Урсун СӨ Инновацияҕа, цифровой сайдыыга уонна инфокоммуникационнай технологиялар министиэристибэтин Бочуоттаах грамотатынан бэлиэтэннэ.
А.Д. Макарова аатынан Култуура уонна ускуустуба колледжын устудьуоннарын туруоруутугар “Чолбон” сурунаал историятын кэпсиир театрализованнай дьүһүйүүнү көрдүлэр.
-
0
-
0
-
0
-
0
-
0
-
0
