Анна Титовна Cеменованы мин аан бастаан Хатастааҕы музыкальнай оскуола төрөппүттэрин уопсай мунньаҕар көрбүппүн өйдүүбүн. Оччолорго уолаттарым иккиэн музыкальнай оскуолаҕа үөрэнэллэрэ.
Онно мунньахха кинини наһаа да олохтоохтук бэлэмнэммит диэн санаабыппын өйдүүбүн. Ол курдук үгүс-элбэх видео-матырыйаал баарын сөхпүтүм, төрөппүттэр кэлэн, оҕолорун ситиһиилэрин, тугу сатаабыттарын бу тутан олорон көрөн, төһөлөөх астыммыттара буолуой?
Өссө биир түгэни кэпсиэхпин баҕарабын. Арай биирдэ биһиги, хатастар, Тулагыга баран кэнсиэрдиир буоллубут. Аҕыс уонтан тахса киһи кыттыылаах улахан тэрээһин этэ. Бачча элбэх дьону илдьиэххэ-аҕалыахха диэтэххэ, манан аҕай дьыала буолбатах буоллаҕа дии. Куорат дьаһалтата биэрбит оптуобуһугар баппатыбыт, инньэ гынан чааһынай массыыналары эмиэ наймыластыбыт. Ол үрдүнэн Анна Титовна оркестрын уолаттарын кытта хаалан хаалла. Аны кинилэр Тулагыга тиийэн, болдьоммут чаас саҕаланна да, хара маҥнайгыттан фойеҕа оонньуу олорор буолуохтаахтар этэ.
Сэмээр Анна Титовнам сирэйин-хараҕын кэтэһэбин. Биһиги, дьаһалталар (оччолорго Хатас нэһилиэгин дьаһалтатыгар үлэлиирим), тырааныспар боппуруоһун хааччыйыахтаах буоллахпыт дии. Дьэ, ол түгэҥҥэ Анна Титовна олох ыгылыйбакка, долгуйбакка, кыыһырбакка-уордайбакка, уолаттарын кытта кэпсэтэн-ипсэтэн, Тулагыга тиийэн тугу оонньуохтаахтарын ырытан, аралдьытан, ыһыллан хаалыы тахсыбатаҕа. Тиийбиттэрэ да, буолуохтааҕын курдук оонньообутунан барбыттара. Инньэ гынан элбэх киһи ол тыҥааһыннаах түгэн буолбутун да билбэккэ хаалбыта.
Өссө биир түгэн 90-с сыллар бүтүүлэрэ, хамнас суох, үлэ суох, номоххо киирбит ырыынак ыар сылларыгар буолбута. Улахан куонкурус буолаары турара. Киирии-тахсыы, кэтэһии-манаһыы, олох, били этэргэ дылы, салгыҥҥа кытта долгуйуу тыына баара. Анна Титовна куонкуруска кыттыахтаах элбэх оҕолоох соҕотох ийэ улахан уолун аан айаҕар көрүстэ, кэбиниэтигэр киллэрэн, кылбаччы сууйуллубут муус маҥан сорочкатын, баанчыгын бу турар диэн көрдөрдө уонна суумкатыттан сып-сылаас эттээх бурдук аһын таһааран биэрдэ, итии чэй кутта. Оҕо барахсан итинник сылаас сыһыантан төһөлөөх санаата күүһүрбүтэ буолуой? Итии сибиэһэй аһы аһаан, күүһүгэр күүс эбиннэҕэ…
Онтон быйыл Анна Титовна 55 сыл үлэлээбит (онтон 35 сыла Хатаска) сылларыгар мунньуммут матырыйаалларын мунньан, кинигэ тахсыытыгар үлэлэһэрбэр, кинигэтин хас биирдии саҥаттан саҥа баһа саҕаланыытын аайы сөрү диэн сөҕөн, убаастыырым, ытыктыырым өссө дириҥээн, силистэнэн – мутуктанан биэрдэ.
Бэйэм анал музыкальнай үөрэҕим суох да буоллар, музыканы, мелодияны нотаҕа ууруу диэн уустугун, куоласка араарыы эҥин диэни син удумаҕалатабын буоллаҕым дии. Оттон Анна Титовна суруллубут айымньыны оркестрга анаан, оркестровка диэн ааттаан, хас биирдии үнүстүрүмүөн элбэх тыаска-ууска сүтэн-иҥэн хаалбакка, бэйэтин ураты тыынын сүтэрбэккэ, күргүөм оонньууну киэргэтэрин, байытарын курдук кумааҕыга түһэрэн, үтүмэн үлэни оҥорбут! Аны «Сандал» норуодунай үнүстүрүмүөннэр оркестра оонньообутуттан сүүрбэттэн тахса айымньыны НВК устуудьуйатыгар уүултаран үйэтиппит үтүөлээх. Ол доҕуһуолдьуттар бары -- Хатас нэһилиэгин дьоно-сэргэтэ, оҕото-уруута. Тоҕус ырыа «Сандал» доҕуһуолунан уһуллан, эмиэ НВК-ҕа үйэтитиллибитэ. Билигин ол оҕолор бэйэлэрэ суоллаах-иистээх, аналлаах үлэлээх, үөрэхтээх, оҕолоох-уруулардаах, дьиэлээх- уоттаах дьон. Дьэ, дьоһун бэлэх буолбатах дуо, култуура сайдыытыгар, нэһилиэк дьонун үйэтитиигэ?
Үлэлиирин тухары сүрүн үлэтигэр үрдүк таһымы ылар туһугар онно сөптөөх көмөлтө үлэни оҥорон кэлбит. Үтүө түмүктэрдээх ааптарыскай бырайыактардаах. Үлэлээбит үлэтин чөкөтөн, ырытан, чаас чааһынан арааран, сааһылаан наардаан, ураты уйаҕас, сылаас тыыннаах кинигэ буолан таҕыста. Манна кини үлэлээбитин тухары хараҕын харатын курдук харыстаан мунньубут фото, видео матырыйааллара, суруммута төһүү күүс буоллулар. Анна Титовна олох тэтимигэр киирсэн, аныгы технологиялары баһылаан, Интернет уйаара-кэйээрэ биллибэт илимиттэн наадалааҕын булан, сүрдээх үчүгэйдик туһанар, компьютерга бэчээттиир. Бу эмиэ туһугар кыайыы, тургутууну ааһыы дии саныыбын. Этэргэ дылы: “Браво, маэстро!”
Түмүкпэр үтүөнү, кэрэни үксэтэр, киһи киһитэ Анна Титовнаҕа барыта үчүгэйи баҕарабын. Этэҥҥэ буол.
Наталья Руфова
-
0
-
0
-
0
-
0
-
0
-
0
