Туона үктээччи Мохначевскай Егор Семенович ыйыытынан, муҥханы дьаһайааччылар Бродников Илья Николаевич, Захаров Михаил Ларионович, Черкашин Михаил Николаевич, баһылык Куприянов Александр Валерьевич салайыыларынан, Алаҕарга Уйбаанчык эбэтин, Харбала, Дьоху, Нөөрүктээйи, Ыстаҥалас күөллэригэр дьон-сэргэ мустан муҥхалаатылар.
Эбэлэрбит сыл аайы "көмүс хатырыктааҕынан" күндүлүүллэр. Күөх Боллох мичик гынан, бэрсибит балыгыттан муҥхаҕа кыайан сылдьыбат, сааһырбыт нэһилиэк олохтоохторугар, дойдуларыттан ыраах олорор биир дойдулаахтарыгар олохтоох дьаһалтабыт өлүүскэ балык түҥэтэн, дойдуларын минньигэс соботун амсатар буолтара үтүө үгэскэ кубулуйан, элбэх дьон муҥхаһыттарга, салалтаҕа махталларын этэллэр.
Маны таһынан, сэтинньи 13 күнүгэр, улуустааҕы ыччат муҥхатын тэрийдилэр. Балыктаах, Майа, Даркылаах, Тиэлиги, Тарат, Төҥүлү, Матта, Бэстээх, Табаҕа, Бырама, Суола эдэр ыччаттара, 94 киһи көрсүһэн, бэрт сэргэхтик оонньоон-көрүлээн, билсиһэн муҥхалаатылар.
Дохунаев Петр Владимирович кэлбит ыалдьыттары алгыстаан-арчылаан көрүстэ. Итии чэй өрүнэн үөрэ-көтө чэйдээтилэр. Таарыйакүрэх тэрийэн, уолаттар тоҥуу хаарынан сүүрүүгэ күрэхтэстилэр. Бу күрэххэ 1-миэстэни Афанасьев Эдуард (Майа), 2-миэстэни Атласов Иван (Чыамайыкы), 3-миэстэни Васильев Алексей (Чыамайыкы) ыллылар. Көхтөөх үлэ түмүгүнэн, 54 куул балыгы, үллэһиннилэр. Бэрт сэргэх көрсүһүүттэн бары астынан тарҕастылар.
-
14
-
1
-
0
-
0
-
0
-
1
