Бүгүҥҥү сиэссийэҕэ Саха Сирин бүддьүөтэ көрүллүбүтүн кэнниттэн өрөспүүбүлүкэ үпкэ миниистирин эбээһинэһин толорооччу Иван Алексеев бу сыл тоҕус ыйдааҕы туолуутун туһунан быһааран биэрдэ. Төһө да аан дойду экэниэмикэтин уонна оҥорон таһаарыы сыанатын кытта сибээстээх кутталлар баар буолалларын үрдүнэн, дохуот киириитэ этэҥҥэтин уонна сорох нолуоктарга былааны куоһарыы баарын туһунан эттэ.
«2026 сыл тоҕус ыйын көрөр буоллахха, дохуоттарбыт киириитэ этэҥҥэ. Сорох нолуоктар киириилэригэр быйылгы былааны куоһарыы баар. Манна биири өйдүөххэ наада, нолуок сүрүн чааһын барыстан уонна сир баайын хостооһунуттан киирэр нолуоктар ылаллар. Олор аан дойду экэниэмикэтин: оҥорон таһаарыы сыанатын, сир баайын сыанатын, солкуобай АХШ дуолларыгар сыһыаннаах кууруһун кытта ситимнээхтэр. Биһиги ону учуоттуубут», -- диэн Иван Алексеев быһаарда.
Иван Алексеев өрөспүүбүлүкэ бүддьүөтүн улахан аҥаара социальнай-култуурунай эйгэҕэ: үөрэҕириигэ, доруобуйа харыстабылыгар, култуураҕа, успуорка уонна социальнай бэлиитикэҕэ ыытылларын тоһоҕолоон ыйда.
Хаартыска Василий Кононов түһэриитэ.
-
0
-
0
-
0
-
0
-
0
-
0
