Соторутааҕыта дойду Бэрэсидьиэнэ Владимир Путин Арассыыйаҕа духуобунай сыаннастары чөлүгэр түһэриигэ уонна бөҕөргөтүүгэ судаарыстыбаннай бэлиитикэ төрүтүн ыйааҕынан бигэргэппитэ. Докумуон сүрүн ис хоһоонугар дьиэ кэргэн, киһи бырааба уонна көҥүлэ, патриотизм, историческай пааматынньык уо.д.а. этиллэр. Бу ыйаах губернатордарга киһи быраабын уонна көҥүлүн мэктиэлииргэ, эрэгийиэннэринэн суолдьут буолар. Кинилэр чопчу оҕолоох дьиэ кэргэттэргэ, ийэлэргэ социальнай өйөбүллэринэн, аныгы олоххо анал байыаннай дьайыыга ыҥырыллыбыттарга уонна кинилэр чугас дьонноругар көмөлүүр кыһамньыларын көрдөрөр.
Саха Сирин национальнай уратыта - дьиэ кэргэн үрдүк сыаннаһа. Өрөспүүбүлүкэ таһымыгар, Бүтүн Арассыыйатааҕы бырааһынньыктартан ураты, сыл ахсын алтынньы ый үһүс өрөбүлүгэр Ийэ күнэ бэлиэтэнэр. Ону таһынан, Ил Дархан Айсен Николаев өрөспүүбүлүкэ үбүлүөйдээх сылын Ийэ сылынан биллэрбитэ.
«Биһиги дьахтарга, ийэҕэ ытыктабыллаах сыһыаны уһугуннарыахтаахпыт» - диэн Николаев сүрүн соругун бэлиэтээбитэ.
Саха Сиригэр 33 тыһ. тахса элбэх оҕолоох, 2 тыһ. тахса биэс уонна онтон элбэх оҕолоох ыал олорор. Ийэ сылыгар «Үйэ оҕолоро» хапытаалынан тохсунньу 1 күнүттэн ахсынньы 31 күнүгэр диэри үбүлүөйдээх сылга 100 тыһ. солк. ананар. Уон ыйга 9,5 тыһ. оҕо төрөөтө, ол курдук быйыл өрөспүүбүлүкэ мөлүйүөннээх олохтооҕо баар буолуо диэн эрэл баар. Оҕо төрөөһүнүн коэффициенынан, Саха Сирэ Уһук Илин уокурукка инники күөҥҥэ сылдьар уонна Арассыыйаҕа сэттис миэстэни ылар.
Күн күбэй ийэлэрбитин Ийэ күнүнэн итиитик-истиҥник эҕэрдэлиибит. Баҕарабыт чэгиэн доруобуйаны, чөл туругу, дьиэ кэргэҥҥитигэр байылыат олоҕу, сир үрдүгэр баар бары үтүөнү, кэрэни!
-
1
-
0
-
0
-
0
-
0
-
0
