Бу күн бастакы аҥарыгар Амма улууһун дьаһалтатыгар тыа хаһаайыстыбатын бородууксуйатын оҥорооччулары кытта төгүрүк остуол ыытылынна. Былааннаммытын курдук, бу көрсүһүүгэ Саха Сиригэр тыа хаһаайыстыбатыгар боломуочуйалары улуустарга биэрии туһунан сокуон тула киэҥ кэпсэтии ыытылынна. Улуус хаһаайыстыбаларын салайааччылара, үлэһиттэрэ төһө да түбүктээх үлэҕэ сырытталлар, норуот дьокутааттарын иннигэр дьоһун этиилэрин оҥордулар, туруорустулар.
Сэргэ Бэскэ дьокутааттар 65 гектарга хортуоппуйу киэҥник үүннэрэр, 200 -тэн тахса сүөһүнү, 600 сылгыны иитэн турар Константин Фомин салайар тыа хаһаайыстыбатын кээпэрэтиибигэр сылдьан үлэни-хамнаһы билистилэр. Ол иннинэ Абаҕаҕа Емельяновка учаастагар И. Я. Строд аатынан тыа хаһаайыстыбатын кээпэрэтибин сүөһү комплексыгар уонна сүүрүк сылгы баазатыгар сырыттылар.
Салгыы Соморсун сэлиэнньэтигэр тохтоон, нэһилиэк актыыбын кытта көрүстүлэр, тыа сирин олохтоохторун этиилэрин, туруорсууларын ылыннылар.
Ол кэннэ киэһэлик Чурапчы Мындаҕаайытыгар ынах сүөһү комплексыгар уонна хортуоппуй, сүөһү аһылыгын үүннэриинэн дьарыктанар хаһаайыстыба оҕуруот аһын харайар улахан баазатыгар сылдьан балаһыанньаны көрдүлэр - иһиттилэр.
Бүгүн сарсыарда бөлөх Чурапчы Одьулуунугар баар хаһаайыстыбаҕа сырытта уонна 10 чааска Чурапчыга улуус актыыбын, хаһаайыстыбаларын кытта төгүрүк остуолу ыытыаҕа.
Хаартыскалар Алексей Матвеев түһэриитэ
-
1
-
0
-
0
-
0
-
0
-
0
