Оҕо саас чаҕылхай күннэрэ туругурдуннар!
Издательский дом Редакция Подписка
Погода в Якутске: . 25 oC

Үөрэх кэмэ түмүктэнэрэ чугаһаата. Маныаха төрөппүттэр сайыҥҥы кэмҥэ оҕолорун ханна уонна хайдах сынньатар, тугунан дьарыктыыр туһунан толкуйдаан эрэр буолуохтаахтар.

Үөрэх кэмэ түмүктэнэрэ чугаһаата. Маныаха төрөппүттэр сайыҥҥы кэмҥэ оҕолорун ханна уонна хайдах сынньатар, тугунан дьарыктыыр туһунан толкуйдаан эрэр буолуохтаахтар.

СӨ Үөрэххэ уонна наукаҕа министиэристибэтэ иһитиннэрэринэн, 2022 сылга сайыҥҥы кэмҥэ оҕо дьарыктаах буолуута уопсай ахсааннарыттан 76%-ын ылыахтаах. Оттон сынньанар уонна чэбдигирдэр лааҕырдарынан 50,5%  оҕо хабыллыахтаах, итинтэн олох очурдарыгар оҕустарбыт дьиэ кэргэн оҕолоро  63,5%-на буолуохтаах.

Өрөспүүбүлүкэбит иһигэр

Билиҥҥи туругунан өрөспүүбүлүкэ үрдүнэн реестргэ киирбит 537 лааҕыр аһыллара былааннанар, онно 37 643 оҕо сылдьара сабаҕаланар:

 - 439 күнүскү лааҕырга -- 27 280 оҕо;

- куорат таһынааҕы стационарнай 39 лааҕырга, ол иһигэр сылы эргиччи үлэлиир «Сосновый бор» кииҥҥэ -- барыта холбоон 7600 оҕо;

- үлэ уонна сынньалаҥ 39 лааҕырыгар -- 1865 оҕо;

- балаакканан базаланар 20 лааҕырга -- 898 оҕо.

Бүгүҥҥү күҥҥэ СӨ Үөрэххэ уонна наукаҕа министиэристибэтин, итиэннэ Роспотребнадзор эрэгийиэннээҕи управлениетын бирикээстэригэр олоҕуран, санитарнай-эпидемиологическай түмүктэри ылыыга сайабылыанньа биэрии түмүктэнэн эрэр.

булуус9 сайт

Соҕуруу сынньаныахтара

2022 сылга өрөспүүбүлүкэ тас өттүгэр 1449 оҕо доруобуйаны чэбдигирдэр лааҕырдарга сынньана барыаҕа:

--Краснодарскай уонна Приморскай кыраайдар лааҕырдарыгар 976 оҕо, ол иһигэр 644 – СӨ судаарыстыбаннай бырагырааматын чэрчитинэн, 332 оҕо -- федеральнай субсидия харчытынан.

-- Норуоттар икки ардыларынааҕы «Артек» (Ялта), Бүтүн Арассыыйатааҕы «Океан» (Владивосток) кииннэригэр, «Смена» (Анапа), «Орленок» (Туапсе) лааҕырдарга 473 квота өрөспүүбүлүкэҕэ дуогабар быһыытынан бэриллэр.

Аны туран, соҕуруу сынньалаҥ федеральнай субсидиянан эмиэ тэриллэр. Ол курдук, СӨ үөрэҕирии сайдыытыгар бырагырааматынан, "Аартыка оҕолоро" бырайыак чэрчитинэн, 473 квота кэллэ. Ол иһигэр "Артек", "Океан", "Смена", "Орленок" лааҕырдарга путевкалар бааллар. Саха Сириттэн уопсайа 1449 оҕону ыытыахтара.

2022 сылга оҕо сайыҥҥы сынньалаҥын тэрийиигэ барыта 301 мөл. 173 тыһ. 747, 00 солкуобай көрүлүннэ. Ол иһигэр “СӨ үөрэҕириитин 2020-2024 сылларга уонна былааннаах 2026 сылга диэри” судаарыстыбаннай бырагыраама чэрчитинэн 271 мөл. солкуобайтан тахса солк. Маны тэҥэ федеральнай бүддьүөттэн софинансированиелаах «Аартыка оҕолоро» бырагырааманан 30 мөл.172 тыһ. 450 солкуобай көрүлүннэ.

Лааҕырдарга араас интэриэһинэй тэрээһиннэр ыытыллыахтара. Оҕолорго анаан аралдьытар-сайыннарар, сааратар оонньуулар, куонкурустар, күрэхтэһиилэр, о.д.а. ыытыллыахтара. Онуоха «Вожатые саха» диэн педагогическай этэрээттэр хамсааһыннарыгар сылдьар устудьуоннар күүс-көмө буолуохтара. Көхтөөх ыччат хас биирдии оҕо сайыҥҥы күнүн туһалаахтык, умнуллубаттык, чаҕылхайдык атаарарыгар кыһаллыахтара. Ону таһынан мэдиссиинэ уонна педагогика үлэһиттэрэ көрүөхтэрэ-истиэхтэрэ,  уһуйуохтара. “Куттала суох оҕо саас” диэн аахсыйа чэрчитинэн ыарахан дьылҕалаах оҕолорго улахан болҕомто ууруллуоҕа. Социальнай өйөбүлгэ наадыйар уонна төрөппүт көрүүтэ-истиитэ суох хаалбыт тулаайах оҕолор иллэҥэ суох араас туһалаах дьарыгынан үлүһүйүөхтэрэ. Маны таһынан, өрүү буоларын курдук, хамнастаныан баҕарар үрдүкү кылаас оҕолорун үлэнэн хааччыйыахтара.

булуус сайт море

 

Путевка аҥаара төннөр

Кешбэк – ол аата тылбаастаатахха, “кеш” – харчы, “бэк” – төнүннэрии. Сайдыылаах дойдуларга маннык дьону тардар-угуйар финансовай ньыма киирбитэ быданнаата, оттон биһиэхэ бу кэнники 5 сылтан бэттээх тэнийэн эрэр. Быйыл оҕо сайыҥҥы сынньалаҥар уонна лааҕырдарга кешбэк бырагыраамата үлэлиэҕэ.

Ол курдук, туризм федеральнай агентствота дойду иһинээҕи туристическай хайысхаларга бу кешбэк бырагырааматын үлэлэтэн саҕалаата.

 Бырагыраамаҕа сурулларынан, оҕо лааҕырын путевкатыттан 50 %-нын төнүннэриэххэ сөп. Онуоха кешбэк муҥутаан 20 тыһ. солкуобай эрэ буолар. Баҕар, эн 300 тыһыынчаны бараа, син биир итиччэни эрэ ылар бырааптааххын.

Аныт туран, булгуччу «Мир» картанан төлөөбүт буолуохтааххын. Бу картаҕар кешбэк 5 үлэ күнүн иһинэн төннөр.

“Биһиги бу саас “Измайлово” гостиницаҕа 2 хонукка 2 киһи 5 тыһыынчаны төлөөбүппүт. Өйүүнүгэр тута 1000 солк. кешбек быһыытынан картабар түспүтэ. Абыраллаах эбит”, -- диир Анна диэн төрөппүт.

 Кешбэктээх лааҕырдарга оҕо ханнык баҕар сменаҕа сылдьыан сөп. Хас даҕаны оҕолоох дьиэ кэргэн хас биирдии сынньаммыт оҕотун путевкатын 50%-ын төнүннэрэр кыахтаах.

Биһиэхэ кешбэктээх лааҕыр баар дуо?

Саха Сиригэр оҕону сынньатарга уонна чэбдигирдэргэ кешбэк бырагырааматынан үлэлиир лааҕырдар испииһэктэрэ бигэргэннэ. Маныаха 15 стационарнай лааҕыр хабыллыбыт, ол иһигэр 4 лааҕыр улуустарга, 2 -- куорат уокуруктарыгар. Холобура, Сунтаарга – 1, Ленскэйгэ - 1, Алдаҥҥа - 1, Хаҥаласка - 1,  Жатайга - 1, Дьокуускайга - 10.

булуус сосн бор сайт

Сиһилии сырдаттахха:

1. Дьокуускай куоракка «Сосновый бор» оҕо сынньанар уонна чэбдигирэр киинэ;

2. Дьокуускай куорат таһыгар баар «Бинго» стационарнай чэбдигирдэр лааҕыр;

3. Дьокуускай куорат таһынааҕы «Кэскил» стационарнай чэбдигирдэр лааҕыр;

4. Дьокуускай куорат таһынааҕы «Связист» стационарнай чэбдигирдэр лааҕыр;

5. Дьокуускай куорат таһынааҕы «Каландаришвили» стационарнай чэбдигирдэр лааҕыр;

6. Дьокуускай куорат таһынааҕы «Спутник» стационарнай чэбдигирдэр лааҕыр;

7. Жатайга «Орленок» стационарнай чэбдигирдэр лааҕыр;

8. Дьокуускайга норуоттар икки ардыларынааҕы Аартыка оскуолатын сайыҥҥы лааҕыра;

9. Дьокуускай куорат таһынааҕы «Радуга» стационарнай чэбдигирдэр лааҕыр;

10. Дьокуускай куорат таһынааҕы «Энергетик» стационарнай чэбдигирдэр лааҕыр;

11. Дьокуускай куорат таһынааҕы «Родничок» стационарнай чэбдигирдэр лааҕыр;

12. Сунтаарга «Сир уустара» өрөспүүбүлүкэтээҕи үөрэтэр-чэбдигирдэр киин;

13. Алдаҥҥа «Берег дружбы» үөрэҕирии муниципальнай бүддьүөт тэрилтэтэ;

14. Ленскэйгэ «Сэргэ» муниципальнай хааһына тэрилтэтэ;

15. Хаҥаласка «Булуус уһаайбата» стационарнай чэбдигирдэр лааҕыр.

Сиһилии информацияны баҕалаахтар саха-отдых-детей.рф порталга, СӨ Үөрэххэ уонна наукаҕа министиэристибэтин саайтыгар киирэн билсиэххитин сөп. Маны тэҥэ оҕо сынньалаҥын эрэ боппуруостарыгар хоруйдуур итии лииньийэны арыйдылар: 8 (800) 550-14-21.

Босхонон  ким туһаныан сөбүй?

Элбэх оҕолоох дьиэ кэргэн оҕолоро; Доруобуйаларыгар хааччахтаах эбэтэр инбэлиит оҕолор; Тулаайах оҕолор;Биир киһиэхэ тииһинэн олоруу алын кээмэйиттэн кыра дохуоттаах дьиэ кэргэн оҕолоро; Төрөппүттэн биирэ сэрии эбэтэр байыаннай дьайыылар бэтэрээнэ, биитэр I уонна II группалаах инбэлиит буоллаҕына; Уустук балаһыанньалаах дойдулартан куотан кэлбиттэр (беженецтэр) эбэтэр күһэйиллэн көһөн кэлбит дьиэ кэргэн оҕолоро;Араас олимпиадалар, куонкурустар уонна күрэхтэһиилэр кыайыылаахтара.

Хайдах суруйтарабыт?

2022 сыл ыам ыйын 1 күнүттэн «Е-услуги. Образование» үөрэх порталын нөҥүө лааҕырдарга суруйтарыы саҕаланна.

  1. Муниципальнай лааҕырдарга суруйтарыы (үлэ уонна сынньалаҥ, куорат таһынааҕы стационарнай, балаакканан түһэн олоруу, күнүскү лааҕырдарга) http://gosuslugi.ru судаарыстыбаннай өҥөлөр порталыгар муус устар 1 күнүттэн саҕаламмыта. Путевка сыанатын муниципальнай оройуоннар үөрэххэ управлениеларыттан ыйытыахха сөп.

2. Судаарыстыбаннай лааҕырдарга (“Сосновый бор”, “Энергетик”, “Кэскил” уонна “Связист”) - https://edu.e-yakutia.ru үөрэх өҥөлөрүн порталларын нөҥүө суруйтараҕын. 2022 сыл ыам ыйын 1 күнүттэн саҕаланна (бүддьүөт путевкалара босхолор, онно ханнык категория оҕолоро хапсалларын үөһэ быһааран суруйбуппутун аах, маны тэҥэ кэмиэрчэскэй путевкалар эмиэ бааллар).

3. Кэмиэрчэскэй путевкалары, кешбек федеральнай бырагырааматынан, сорох чааһын эмиэ төнүннэриэххэ сөп. Бэйэҕит атыылаһар буоллаххытына, мирпутешествий.рф, СӨ уонна РФ лааҕырдарын саайтарыгар кэшбэк бырагырааматыгар киирбит лааҕырдар испииһэктэрин көрөн, бэрэбиэркэлээн баран ылаарыҥ.

Краснодарскай уонна Приморскай кыраайдар лааҕырдарыгар судаарыстыба бүддьүөтүнэн сынньанар путевкалары муниципальнай оройуон үөрэххэ управлениеларыгар түҥэппиттэр. Ол бэриллибит квоталары туһаныахха сөп.Норуоттар икки ардыларынааҕы «Артек» оҕо лааҕырыгар «Путевка» АИС портал эбэтэр артек.дети https://ais.artek.org нөҥүө суруйтараҕыт.Уһук Илин уокурук «Океан» оҕо киинигэр эмиэ «Путевка» АИС портал эбэтэр https://spa-okean.pba.su саайт нөҥүө сайабылыанньаҕытын биэрэҕит.

Ыам ыйын 1 күнүттэн оҕо сынньалаҥын боппуруостарыгар итии лииньийэ үлэлиир: 8-800-550-14-21 (үлэ бириэмэтинэн).

булуус 3 сайт

Дьокуускай лааҕырдарыгар

Ыам ыйын 18 күнүттэн Дьокуускай куорат муниципальнай лааҕырдарыгар суруйтарыы саҕаланна. Сайабылыанньаны куорат үөрэххэ управлениетын саайтын нөҥүө биэриэххэ сөп.

Барыта 45 лааҕыр үлэлиэҕэ. Онно 5278 оҕону хабар сорук турар.

Итинтэн 38 лааҕыра күнүскү киэбинэн тэриллэр. Оскуола уонна эбии үөрэхтээһин базаларыгар тэриллиэхтэрэ. Барыта 3955 оҕо сылдьарыгар суоттаналлар.

Куорат таһыгар 5 чэбдигирдэр лааҕыр үлэлиэ. 1060 оҕо сылдьара былааннанар.

Сүрүннүүр киин аһылынна

Оҕо сынньалаҥын уонна чэбдигириитин кииннэрин, лааҕырдарын сүрүннүүр киин СӨ Үөрэххэ уонна наукаҕа министиэристибэтин 2022 с. кулун тутар 17 күнүнээҕи бирикээһигэр олоҕуран тэрилиннэ.

 Киин муниципалитеттарга уонна куораттарга баар лааҕырдары хонтуруоллуо уонна үөрэх тэрилтэлэригэр араас консультациялары биэриэҕэ. Үлэни «Сосновый бор» оҕо сынньалаҥын уонна чэбдигириитин киинэ сүрүннүө.

--Өрөспүүбүлүкэтээҕи ресурснай киин оҕо сайыҥҥы каникулун туһалаахтык атаарарыгар уонна доруобуйатын чэбдигирдэригэр муниципалитеттар, биэдэмистибэлэр икки ардыларыгар судаарыстыбаннай-уопсастыбаннай мэхэньиисимнэр көдьүүстээхтик үлэлииллэрин хааччыйыа. Куорат уокуруктарыгар уонна муниципальнай оройуоннарга Өрөспүүбүлүкэтээҕи ресурснай киин спутниктара тэрилиннилэр. Олор оҕо сынньалаҥар туһалаах быраактыкалары билиһиннэриэхтэрэ. Сайыҥҥы сынньалаҥ кэмэ оҕо айар дьоҕурун сайыннарарыгар, духуобунай эйгэтин байытарыгар, билиитин-көрүүтүн таһымын үрдэтэригэр төһүү күүс буолуохтаах. Оҕолор доруобуйаларын бөҕөргөтөллөрүгэр, саҥа доҕордоноллоругар, сонуну билэллэригэр табыгастаах усулуобуйа тэриллэр. Билиҥҥи балаһыанньа судургута суох кэмигэр бу уһулуччу суолталанна. Оттон уһуйуу хаачыстыбата педагогтар идэтийиилэриттэн уонна киһи быһыытынан үтүө өрүттэриттэн улахан тутулуктаах, - диир Ирина Любимова, үөрэх уонна наука миниистирэ.

Сүрүннүүр киин биир соругунан үөрэх тэрилтэлэригэр информационнай, консультациялыыр, тэрийэр, экспертнэй-анаарар өйөбүлү оҥоруу буолар. Маны тэҥэ оҕо сынньалаҥын тэрийэр урбаанньыттарга араас хайысхалаах докумуоннары толорууга көмөлөһүөхтэрэ.

Итини таһынан киин биир кэлим хайысхалаах, анал тиэмэлээх сменалар бырагыраамаларын бэлэмнээн, өрөспүүбүлүкэ лааҕырдарыгар көмө босуобуйа быһыытынан ыыталыахтара. Аан дойдуга уонна Арассыыйаҕа үлэлиир бастыҥ лааҕырдар уопуттара улуустарга тарҕанара бэрт бөҕө буоллаҕа дии! Оҕо сынньалаҥын тэрийэр дьоҥҥо анаан эрэгийиэннэр икки ардыларынааҕы сэминээрдэр, “төгүрүк остуоллар” буолуохтара.

 

Дьаарбаҥка тэрилиннэ

Өрөспүүбүлүкэтээҕи ресурснай киин ыам ыйын 12 күнүгэр “Арассыыйа устудьуоннарын этэрээттэрэ” эрэгийиэннээҕи салаатын, итиэннэ Арассыыйа үөрэнээччилэрин хамсааһынан үлэһиттэрин кытары Дьокуускайга Ф.И. Авдеева аатынан Оҕо дыбарыаһыгар сайыҥҥы лааҕырдар дьаарбаҥкаларын тэрийдэ.

Уопсайа 100 киһилээх педагогтар этэрээттэрэ кыттыыны ыллылар. Устудьуоннарга баһаатай үлэтин туһунан билиһиннэрдилэр, оҕо сынньалаҥын тэрийии туһунан кэпсээтилэр.

Дьаарбаҥкаҕа 12 сайыҥҥы лааҕыр бэйэлэрин былаһааккаларын сырдаттылар, баһаатайдары үлэҕэ ыҥырдылар.

Булуус оҕолору күүтэр

булуус 7 сайт

--Хаҥаласка баар “Булуус уһаайбата” лааҕыр быйыл эмиэ үлэлиир. Бэс ыйын 15 күнүттэн от ыйын 5 күнүгэр диэри «Fantasy Camp» диэн маҥнайгы сезон арыллыа. Оҕолор омук тылыгар, ырыаҕа дьарыктаныахтара. Сүрүн болҕомтону оҕо фантазията, айар дьоҕура сайдарыгар ууруохпут.

Иккис сезон от ыйын 9-тан 29-гар диэри үлэлиэ. Живописька, скетчиҥҥа уонна акрилынан таҥаска уруһуйдуурга үөрэтиэхтэрэ. Аныгы хореографияҕа, йогаҕа маастар-кылаастар, ырыаҕа, английскай тылга интегрированнай уруоктар буолуохтара.

Атырдьах ыйын 2-тэн 22 күнүгэр диэри «Киинэ уонна муусука» сезона оҕолору күүтэр. Манна актерскай маастарыстыбаҕа, режиссураҕа, инсценировка туруоруутугар, сценарий суруйууга, социальнай ситимнэри сайыннарыыга, гитараҕа оонньуурга дьарыктар ыытыллыахтара. Бу сезон оҕолоро кылгас киинэ устуохтара, онуоха саундтрегын эмиэ бэйэлэрэ суруйуохтара.

Путевка сыаната 41000 солкуобай (кешбэк бырагыраамата үлэлиир). Бу төлөбүргэ олоруу, СанПин нуорматынан күҥҥэ биэстэ аһыыллара, култуурунай-сынньанар бырагыраамалар, эбии дьарыктар, мэдиссиинэ өҥөлөрө, Булуус ирбэт мууһугар сылдьыы, трансфер киирэр.

8(914) 220-65-67; 8(914) 232-83-72 нүөмэрдэринэн билсиҥ, сайаапканы Адрес электронной почты защищен от спам-ботов. Для просмотра адреса в вашем браузере должен быть включен Javascript. электроннай аадырыска ыытыҥ.

Биир оҕону хас даҕаны сезоҥҥа суруйтаран сынньатыахха сөп. Сменаҕа ортотунан 140-150 оҕо сынньанааччы. Сылдьыбыт оҕолор кэлэ тураллар, онон сыл аайы 100% туолабыт. Кэшбэк бырагырааматыгар киирбиппитинэн, урукку курдук чэпчэтиилэр көрүллүбэттэр, -- диэн кэпсээтэ лааҕыр координатора Мария Горохова.

Бассейннаах!

"Энергетик" лааҕыр Дьокуускай куорат Покровскайдыыр аартыгын 16-с км баар. Манна 9-тан 16 саастарыгар диэри оҕолору ылаллар. Алта куорпуһунан тарҕанан олороллор. 6-8 саастаах оҕолор икки этээстээх, толору хааччыллыылаах, 60 миэстэлээх дьиэҕэ киирэллэр. Хас биирдии сменаҕа 6-лыы куруһуок үлэлиир. Волейболлуур, баскетболлуур анал сирдэр, теннистиир корт, футболлуур хонуу, оҕо спортивнай былаһаакката баар.

Маны тэҥэ, саамай үчүгэйэ, ууну сылытардаах, икки таһымнаах бассейнаахтар! Өссө сылытыллар душтаахтар! 300 оҕо батар кулууба үлэлиир. Мэдиссиинэ пууна хааччылыыта бэртээхэй, тыа сирин элбэх балыыһата ымсыырыан сөптөөх.

Оҕолор күҥҥэ 5-тэ остолобуойга аһыыллар. Видео кэтэбиллээх харабыл бэрээдэги, куттала суох буолууну хааччыйар.

 булуус 8 айт

Идэҕэ үөрэниэхтэрэ

Дьокуускайга куорат таһынааҕы стационарнай чэбдигирдэр «Радуга» лааҕыр үөрэнээччилэри сайыны туһалаахтык атаарарга ыҥырар.

Ол курдук, 6-ларыттан 12 саастарыгар диэри оҕолорго «Живи! Твори! Мечтай!» сынньалаҥ бырагыраамата биллэриллэр. Оттон 13-тэриттэн 18 саастарыгар диэри обургуларга «PROFлето» диэн идэни талыыга туһуламмыт бырагыраама үлэлиир. Фотограф, видеооператор, компьютернай дизайнер, баһаатай, консультант идэлэригэр уһуйуохтара. Идэҕэ бэлэмнэнии кууруһун ааспытын туоһулуур судаарыстыбаннай докумуон туттарыллар.

Оҕолорго маастар-кылаастар, ханнык идэҕэ барсалларын быһаарар тестированиелар, идэ уратыларын билиһиннэрэр лиэксийэлэр, профориентационнай кэпсэтиилэр, биирдиилээн консультациялар буолуохтара, идэҕэ траектория оҥоһуллар.

Маҥнайгы смена бэс ыйын 15 күнүттэн от ыйын 5 күнүгэр диэри үлэлиэ. Иккис – от ыйын 9-27 күннэригэр

Удамыр сыаналаахтар

Бүддьүөт лааҕырдарын тэҥэ куоракка биирдиилээн кэмиэрчэскэй лааҕырдар эмиэ үлэлииллэр. Ол курдук, холобур, Тургенев уулуссатын 10-с дьиэтигэр 5 саастарыттан IV кылаас үөрэнээччилэрин хабар уһуйаан аанын арыйыаҕа.

Сынньанааччылар омук тылыгар, дуобакка эрчиллиэхтэрэ, квест-оонньууларга, экскурсияларга сылдьыахтара. Маны тэҥэ маастар-кылаастар буолуохтара. Уопсайа биэс смена былааннанар: 6-17/06, 27/06-8/07, 11/07-22/07, 25/07-5/08, 8/08-19/08. Лааҕыр сарсыарда 9 чаастан киэһэ 18.30 ч. Диэри үлэлиир. Толору күн сылдьыытыгар сыаната -- 10 тыһыынча солкуобай, күн аҥаарыгар – 6 тыһ. солк.

Элбэх оҕолоох ыалларга 10% чэпчэтии көрүллэр. Сиһилии: 89142355784 нүөмэринэн билсиэххэ сөп.

Аартыкалар абыраммыттар

Ыам ыйын 16 күнүгэр СӨ Бырабыыталыстыбатын Бэрэссэдээтэлэ Андрей Тарасенко оҕо сайыҥҥы сынньалаҥын тэрийии боппуруостарыгар мунньах ыытта.

Премьер оҕо сайыҥҥы сынньалаҥар төһө бэлэмнэрин туоһуласта, санитарнай-эпидемиологическай ирдэбиллэр толоруллуулара хайдаҕын сураста, Аартыка оҕолоругар бэриллэр босхо путевкалары туһаныы мэхэньиисимин ырыттылар.

СӨ Бырабыыталыстыбата 2021 сыл ахсынньы 30 күнүгэр РФ Уһук Илинин уонна Аартыкатын сайыннарыы министиэристибэтин кытары түһэрсибит 350-09-2022-009 №-дээх сөбүлэҥэр олоҕуран, Аартыкаҕа олорор оҕолор сайыҥҥы сынньалаҥнарын тэрийиигэ федеральнай субсидия көрүллэр буолбута.

Субсидияны биэрии Быраабылалара РФ Бырабыыталыстыбатынг уурааҕынан бигэргэммитэ. Докумуонунан көрдөххө, Аартыка оҕолоро буор-босхо Арассыыйа бастыҥ лааҕырдарыгар сынньанар кыахтаннылар. Маныаха сылын ахсын федеральнай бүддьүөттэн 500 млн солкуобай көрүллүө.

Эрэгийиэммитигэр эмиэ тустаах Бэрээдэк олохтоммута. Онно олоҕуран, СӨ Аартыкатын оҕолорун ахсааннарыгар сөп түбэһиннэрэн, путевкалары улуустарынан түҥэтии тэриллэр. V-VIII кылаас үөрэнээччилэрэ хабыллаллар.

Субсидия харчытынан путевка уонна сынньалаҥ сиригэр диэри кэлии-барыы ороскуота төлөнөр. Лааҕырдар Краснодарскай кыраай Хара муоратын кытылыгар, Крым кэрэ айылҕатыгар, Азов, Каспий, Дьоппуон муоралар биэрэктэригэр, маны тэҥэ Адыгея Өрөспүүбүлүкэтигэр, Кавказ хайаларын минеральнай уутун куруортарыгар бааллар. 

Аартыка оройуоннарын 322 оҕото ити путевканан сынньана барыаҕа. Оттон ол дьоллоохтор ахсааннарыгар кимнээх тиксэллэрин олохтоох салайыныы уорганнара бэйэлэрэ сүүмэрдээн быһаарыахтара.

***

Икки сыл хааччахтааһынынан дьиэҕэ хаайыллыбыт, хамсык ыарыытыгар сутуллан ааспыт, былырыын сайын күнү буруо быыһынан көрбүт оҕолорбут барахсаттар быйыл сынньалаҥнара табылыннын, оҕо саас чаҕылхай кэмэ буолан, умнуллубаттык аастын!

  • 1
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением

Другие новости