Киинэ эбээннии уонна нууччалыы тылынан таҕыста. Ону тэҥэ, «Кындыканы» YouTube-ка угуохтара. Ааптардар этэллэринэн, бу кылгас киинэ-сериал бастакы сезонун бастакы сиэрийэтэ буолар эбит. Барыта үс сезон тахсара былааннанар. Бырайыак үп өттүнэн ситиһиилэннэҕинэ, салгыытын устуохтаахтар. Оруоллары эбээн тылынан саҥартылар: Аксиния Ефимова, Ольга Подобашева, Варвара Кейметинова.
«Кындыкан» - хоту дойду сурдугар улааппыт эбээн кыыһын туһунан кылгас анимационнай киинэ. Сурт олохтоохторун барыларын уоспа ыарыыта кыдыйбытын кэнниттэн Кындыкан эрэ тыыннаах хаалбыт. Оттон бу ыарыыны мультикка хара санаалаах абааһы дьахтара курдук уобарастаан көрдөрбүттэр.
Билигин Арассыыйаҕа бобуллубут Instagram социальнай ситимҥэ «Кындыкан» диэн мааскалары туһаныахха сөп. Бырайыак спонсора «АЛРОСА» хампаанньа былырыын хостоммут 91,86 караттаах алмааһы “Кындыкан” диэбитэ. Аан дойдуга аатырбыт Покахонтас, Мулан персонажтарынан ааттаах алмаас суох, оттон биһиги Кындыкаммыт аата күндү тааска иҥэриллэн, култуурабыт туһунан өссө киэҥник биллэрдэ. Былырыын дьоппуон миллиардера Юсака Маэдзава ыйга көтөргө бэлэмнэнэ сылдьарын биллэрбитэ. Онно биһиги Кындыкан куукулабытын илдьэ барарыгар көрдөспүттэрин ылыммыта. Онон хотугу омуктар символлара космоска көтүө, эбээн омуга аан дойдуга биллиэ диэн эрэнэбит.
Эдэр суруйааччы Лидия Тарасова Кындыкан туһунан суруйбут остуоруйата кинигэ буолан тахсыбыта. Остуоруйаны эбээн тылыгар биллэр поэт, мелодист Анатолий Степанов-Ламутскай тылбаастаабыта. Кинигэ ойууларын эбэҥки худуоһунньуга Диана Корякина уруһуйдаабыта. Кинигэни “ЛитРес” саайка босхо ааҕыахха сөп.
Эбээн “Нимкан” эпоһын KitJah «Кындыкан» диэн ырыатыгар уонна мультикка бэйэтигэр истиэххэ сөп. “Нимканы” ытык кырдьаҕаспыт Анна Ивановна Хабаровская толорбута. Бу эпоһы этэр дьон билигин үстэр эрэ, Оннук сүтэр кутталлаах. “Онон Анна Ивановна толоруутун устан хаалбыппыт “Нимканы” сөргүтэргэ төһүү күүс буолуон сөп”, -- дииллэр.
Бэс ыйын 4 күнүгэр «Үрдэл» пааркаҕа «Кындыкан» бырайыак чэрчитинэн «Эбээн дэриэбинэтэ» диэн туристическай сир аһыллыахтаах. Анал тэлгэһэҕэ чордары (эбээн ураһаларын) туруоруохтара, эбээн култууратын көрдөрөр быыстапканы ыытыахтара. Сиэри-туому толоруу, оонньуулар, куонкурустар буолуохтара. Ыалдьыттар табаны кытта хаартыскаҕа түһэр фотозоналара тэриллиэҕэ.
Любовь Христофорова, СӨ Аҕыйах ахсааннаах хотугу омуктар ассоциациятын бастакы вице-бэрэсидьиэнэ:
- Биһиги ассоциациябыт 1989 сыллаахха тэриллибитэ. Онно Саха Сирин 5 хотугу омуга киирсэр: эбээннэр, эбэҥкилэр, чукчалар, долганнар, дьүкээгирдэр. «Кындыкан» диэн бырайыак туһунан истэн, ис хоһоонун сиһилии билсэн, сэҥээрэн бараммыт өйүүр буолбупппут. Тоҕо диэтэххэ, билиҥҥи кэмҥэ баар кыаҕы биһиги толору туһаммат эбиппит. Ол курдук, төрүт култуурабытын араас араҥаҕа, таһымҥа киллэрэр, эйгэтин кэҥэтэр ньыма билигин олус элбээтэ. Бырайыагы тэрийэр эдэр дьоҥҥо туох баар үтүөнү баҕарабын!
Маргарита Попова, «Кындыкан» бырайыак ааптара:
- Кындыкан диэн мин хос эбэм аата. Кини туһунан чахчы буолбут түбэлтэни билэн баран, олус уйадыйбытым уонна мультик оҥорорго санаммытым. Бу дьыаланан дьарыктанарым мин олоҕум анала дии саныыбын. Биһиэхэ, хотугу омуктарга, дьону көҕүлүүр уобарас баар буолуохтаах диэн санааттан бу бырайыагы олоххо киллэрэбит. Холобур, атын омуктар айымньыларыгар аан дойдуга биллибит дьоруойдаахтар. Ол курдук, индеецтэргэ – Покахонтас, индияларга – Маугли, кытайдарга – Мулан, маориларга – Моана. Оттон тоҥус култууратын символа – Кындыкан. Аны туран, биһиги табаһыттарбытын эмиэ аан дойдуга биллэр брэнд оҥоруохтаахпыт. Америкаҕа ковбойдар бааллар, оттон табаһыттар кинилэрдээҕэр өссө уһулуччу, хорсун дьон буоллахтара дии. Табаһыттар сирбитин-уоппутун, олохпут былыргы укулаатын харыстыыллар.
Ираида Попова, суруналыыс, суруйааччы, тылбаасчыт:
--Мин драматург уонна ускуустубаны үөрэтээччи быһыытынан «Кындыкан» матыыбынан испэктээк туруоруохха сөп диэн этиэм этэ. Сахалыы, нууччалыы тиэкиһин суруйан биэриэхпин сөп. Куораппыт тыйаатырдарыгар уонна улуустарга даҕаны көрдөрүө этибит. Өссө балекка анаан либретто суруйуохха диэн эмиэ этиилээхпин. Аҕыйах ахсааннаах төрүт омуктар судаарыстыбаннай тыйаатырдарын артыыстара оонньуохтара буоллаҕа дии. Кындыкан хайаан да тыйаатырга туруохтаах. Онон мин эһиэхэ ити өттүгэр көмөлөһөргө бэлэммин.
***
«Кындыкан» бырайыагы олус дьоһуннаахтык тэриллибит диэн көрдүм. Остуоруйатын суруйууга уонна киинэтин айыыга култуура, наука эйгэлэриттэн улахан исписэлиис дьон кытыннылар. Төрүт култуураларыгар харыстабыллаахтык сыһыаннаһар, этэргэ дылы, Кындыкан курдук күүстээх санаалаах дьон эбиттэр. Онон эбээн култууратын, ону ааһан, хотугу төрүт омуктар култуураларын инники көлүөнэҕэ тириэрдэр соруктаах бырайыакка инникитин өссө да үрдүк ситиһиилэри баҕарыаҕыҥ!
Денис Попов хаартыскалара
-
0
-
0
-
0
-
0
-
0
-
0
