«Связист» лааҕыр «Быстрее! Выше! Сильнее!» иккис сменатыгар спортивнай ориентирование, уопсай физическэй бэлэмнээһин, волейболга, аэробикаҕа, көҥүл тустууга уонна ГТО нормативтарын туттарыыга үөрэтии бырагыраамалара киирэллэр. Лааҕыр начаалынньыга Яна Алексеева этэринэн, оҕолор лааҕырга сынньаналларын таһынан эбии үөрэхтээһин бырагыраамаларынан саҥа билиини уонна сатабылы ылаллар. Ол курдук, оҕолор спортивнай сиэксийэлэргэ эрэ буолбакка, Валентина Николаева «Я и Право» правоведение куруһуогар уонна Олег Милюков «Ума палата» социальнай-гуманитарнай хайысхалаах куруһуогар сылдьаллар.
Оттон «Кэскил» лааҕырга «Лабиринт открытий» айар-техническэй смена аһылынна. Бу сезоҥҥа идэлээх исписэлиистэр оҕолор ис кыахтарын арыналларыгар, лиидэр буолар дьоҕурдарын уонна ханнык идэҕэ сыстаҕастарын билэллэригэр көмөлөһүөхтэрэ. Үс нэдиэлэ устата оҕолор өрөспүүбүлүкэ араас муннугуттан кэлэн «Робототехника», «Web-дизайн», «Современные танцы» куруһуоктарга дьарыктаныахтара.
«Связист» уонна «Кэскил» лааҕырдар иккис сменаларыгар 200 тахса оҕо сынньанар. Оҕолор күҥҥэ биэстэ туһалаах, тотоойу аһылыгы аһыыллар. Иитэр-үөрэтэр үлэни «Саха сирин кэнчээри ыччата» өрөспүүбүлүкэтээҕи тирэх киин педагогтара уонна баһаатайдара ыыталлар. Иккис сезон сменалара атырдьах ыйын 4 күнүгэр диэри барыахтара.
-
1
-
0
-
0
-
0
-
0
-
0
