Яков Егоров, норуот маастара:
- Мин Үөһээ Бүлүү Кырыкыйын оскуолатыгар оҕолору үөрэтэбин. Уһаммытым 40-тан тахса сыл буолла. Ол тухары уһана сылдьабын. Араас тиэмэҕэ барытыгар уһанабын – маска, муоска. Тимиргэ эмиэ кыратык уһанабын.
Үс сыллааҕыта «Баай Байанай» быыстапкаҕа кыттан бастаабытым. Арассыыйа таһымыгар куонкурустарга түөртэ, Манчаары оонньууларын чэрчитинэн ыытыллар «Талаан тыллар туоната» быыстапка-дьаарбаҥкаҕа эмиэ түөртэ кыттыбытым.
Өрөспүүбүлүкэ 100 сылыгар «Саха күүстээхтэрэ» диэн куубак чороону оҥорбутум. Манна мас тардыһа олороллоро, күүстээх киһи оҕус көтөҕөн иһэрэ, туста сылдьаллара дьүһүйүллүбүт. Ойууларын эмиэ бормашинанан кыспытым. Маһынан кытыйалары, ынах, тайах муоһунан олоҥхо тиэмэтигэр фигуралары оҥоробун. Кэтэн турар бэргэһэбин бу саҥа оҥордум. Ыйааһына син ыарахан. Киэргэлэ ынах муоһунан оҥоһуллубут.
Муос оҥоһуктар
Мин уратым диэн – тимир, муос курдары оҥортуубун. Уонна кириэһилэ оҥоробун. 7 арааһын оҥордум. Ону кытары мас фигуралары эмиэ оҥортуубун. Муоһунан саахыматтары оҥортуубун. Оҥоһуктар оһуордарын бормашинанан кыһабын. Маны өссө хараардыахпын сөп, оччоҕо отой үчүгэйдик көстөр. Батас угун тайах муоуһунан оҥоробун.
Тыаҕа олорорум быһыытынан байанай тиэмэтигэр кыыллары-көтөрдөрү оҥоробун. «Баай Байанай» быыстапкаҕа куруутун кыттабын. Уонна тайах муоһунан национальнай дьоруойбут Манчаарыны уобарас гынан кур оҥорбутум. Уотугар алгыы олороро, киниэхэ сүгүрүйэн тураллара. Аны туран, атыыга уонна сакааска муоһунан дэйбиирдэри оҥортуубун. Дойдубар бэйэ мусуойдаахпын. Онно элбэх оҥоһук баар.
-
0
-
0
-
0
-
0
-
0
-
0
