Уопсастыба

Луиза Михайловна РСФСР үөрэҕириитин туйгуна, Саха Өрөспүүбүлүкэтин бочуоттаах бэтэрээнэ, Учууталлар учууталлара, Орто Амма нэһилиэгин бочуоттаах олохтооҕо.
Кини  2005 сыллаахха, оскуолаҕа үлэлээн бүтэн баран, нэһилиэккэ бэтэрээн сэбиэтин бэрэссэдээтэлинэн талыллан үлэлээбитэ. Өбүгэлэриттэн бэриллибит дьоҕура аһыллан, ииһинэн үлүһүйбүтэ. Бу дьоҕур киниэхэ аҕатыттан бэриллибитэ. Аҕатын аймахтара Романовтар удьуорунан бэриллибит дьоҕурдара рөрөспүүбүлүкэҕэ биллэр ааттардаахтар.

Луиза Михайловна иискэ үлэтин чаппараах тигиититтэн саҕалаабыта. Тикпит чаппараахтарын «Сандал саас», «Самаан сайын», «Кырыа кыһын», «Көмүс күһүн» диэн сүрэхтээбитэ. Салгыы икки кэмпилиэк кычымнаах чаппараахтары тикпитэ.

Талааннаах киһи бары өттүнэн сатабыллаах буолар. Ол курдук, бэтэрээннэргэ «Сандал» хомусчуттар түмсүүлэрин тэрийэр. Кэргэнигэр Василий Васильевичка, бэйэтигэр сыанаҕа кэтиллэр сахалыы көстүүмнэри, кыргыттарыгар анаан үлэҕэ кэтэллэригэр кэһиэччиктэри, кыра дьоҕус суумкалары тикпитэ. Идэтэ кэҥээн, дьоҕура сайдан, аны сабынан баайар идэлэммитэ. Сабынан кыһыҥҥы сыҥаахтаах бэргэһэлэри баайбыта.

Тикпит таҥастара барыта көрдөрүүгэ турда. Кини иистэнэриттэн, быысапкалыырыттан дуоһуйууну ылар. Бэйэтэ этэринэн кэмэ кэлэн, дьоһуннаахай 60 сааһыгар үктэнэригэр дьоҕура арыллан иискэ сыстан, өбүгэтин дьоҕурун олоххо киллэрбит үтүө-мааны Далбар Хотун буолар.

Бу быыстапка эдэр көлүөнэ ыччаппытыгар иитэр уонна үөрэтэр суолталаах буолла. Быыстапка кыттыылаахтара саха төрүт аһын амсайдылар, бииртэн-биир кэрэ көстүүлээх таҥастары көрөн астыннылар. Онон эдэр көлүөнэ ыччакка дьоҕурдарын эрдэ арыйан, сайыннаран дьарык оҥостоллоругар сүбэлээтэ , ыллыктаах тылын анаата. Өр сылларга үлэлээбит-хамсаабыт оскуолатыгар сахалыы сандалыны бэлэх уунна.

Тарбаҕар талааннаах, иис дьикти дьарыктаах Луиза Михайловна ыччаттарга туһаайан этэр баҕа санаата туоллун диэн туран иистэнньэҥ ийэҕэ, эбэҕэ махтанныбыт.