Олор истэригэр Алаҕар нэһилиэгин К.Е. Ворошилов аатынан холкуостан 52 ыал (152 киһи) Кэбээйи улууһун I Сииттэ нэһилиэгэр көһөрүллүбүтэ.
1942 сыл балаҕан ыйын 6 чыыһылатыгар айаҥҥа туруммуттара. Түөрт күнү быһа айаннаан, Аллараа Бэстээххэ тиийбиттэр. Онтон баарсанан устан, анаммыт сирдэрин булаахтаабыттар. Халлаан тымныйан, тоҥон-хатан, аччыктаан-хоргуйан, айаннарыгар эрэйи эҥэрдэринэн тэлбиттэрэ, сорохторо суорума суолламмыттара.
Сииттэҕэ 1944 сылга диэри олорон, кыайыы туһа диэн кыахтара баарынан үлэлээбиттэрэ.Төттөрү төннөн кэлиигэ, көһөр кыахтара суох буолан, Мэҥэ Хаҥалас оройуонун "Социализм Суола" холкуоһун көрдөспүттэр. Холкуос бэрэссэдээтэлэ Харитонов Никон Михайлович холкуос чилиэннэрин кытта мунньахтааннар, сыарҕалаах 20 аты тэрийэн ыытан, дьоммутун көһөрөн аҕалбыттара.
Көһөн кэлбит дьон Мэҥэ сиригэр олохсуйан, оҕолоро-сиэннэрэ билигин кинилэр олохторун салгыыллар.
Балыктаах бөһүөлэгэр Көһөрүллүү 80 сылын өйдөөн-санаан, ахтан ааһаары, биһиги эйэлээх олоххо олорорбут туһугар күүстэрин харыстаабакка үлэлээбит аҕа көлүөнэ дьоммутун кэриэстиир бэлиэ күн буолан ааста.
Кыайыы скверигэр Кэбээйигэ сылдьыбыт дьоммутугар анаан 2021сыллаахха Алаҕартан төрүттээхтэр оҕолоро-аймахтара кыттыһан оҥотторбут өйдөбүнньүк стела таһыгар ыраахтан-чугастан кэлбит дьон муһуннулар.
Нэһилиэк баһылыга А.В. Куприянов,үлэ бэтэрээнэ Е.С. Мохначевскай көһөрүллүүгэ сылдьыбыт дьоммут ааттарын аныгы эдэр көлүөнэ умнубатын туһугар санааларын эттилэр.
С.С. Чалкин оччолорго холкуос бэрэссэдээтэлэ Н.М. Харитонов туһунан, М.И. Говорова сахалары хоргуйууттан өрүһүйбүт И.Е. Винокуров туһунан кылгастык ахтыы оҥордулар.
Салгыы сынньалаҥ киинигэр мустубут ыалдьыттар бэйэлэрин төрөппүттэрин туһунан ахтан-санаан туран кэпсээтилэр. Ол курдук, Кэбээйигэ дьонун кытта сылдьыспыт, билигин 83 саастаах бэтэрээн учуутал Афанасьева Анна Алексеевна ахтыытын олус долгуйа иһиттибит.
Көһөрүллүүгэ сылдьыбыт дьон сыдьааннара дьоммутун-аймахтарбытын умнубаппытын, кинилэргэ сүгүрүйэрбитин биллэрэн, ааспыт бэлиэ тэрээһиҥҥэ кыһаллан туран көмөлөспүт кулууп үлэһиттэригэр (дириэктэр Л.В. Кычкина), баһылык Куприянов Александр Валерьевичка, видео-аудио- матырыйаалынан көмөлөспүт, киинэҕэ устан, бу бэлиэ күн үйэтитиллэригэр көмөлөспүт Егор, Галина Сотниковтарга махталларын тиэртилэр.
Кэлбит дьон наһаа истиҥ, ис сүрэхтэн этиллибит-кэпсэммит сэргэх көрсүһүү буолла диэн астынан тарҕастылар.
Мария Захарова,
Балыктаах, Мэҥэ Хаҥалас
- 3
- 0
- 0
- 0
- 0
- 0