Судаарыстыбаннай Дуума дьокутаата Татьяна Буцкая олоххо элбэхтэ туттуллар буолбут “социальнай хааһына” (социальное казначейство) диэн өйдөбүлү быһаарда. Ол эбэтэр хас биирдии киһиэхэ судаарыстыба туох көмөнү ылыан сөбүн Госуслуги нөҥүө саната сылдьыахтаах, оттон гражданин судаарыстыбаннай өҥөлөрү биирдэ биэрбит электроннай сайабылыанньатынан толору туһана олоруохтаах.
Биэнсийэ иннинээҕи сааска үктэммит гражданнарга үлэтэ суох буолуу босуобуйатын үрдэтиллибит кээмэйинэн ааҕыы туһунан сокуон барылын Дуумаҕа РФ Бырабыыталыстыбата киллэрдэ. Үрдэтиллибит босуобуйаны анааһын гражданин учуокка хаһан турбутуттан тутулуга суох буолуохтаах.
Госдума дьокутааттара сокуоннай сааһын туола илик икки эбэтэр онтон элбэх оҕолоох ыаллары (устудьуон оҕолоро 24 сааһын туола илик буоллаҕына) НДФЛ нолуогуттан босхолуур туһунан сокуон барылын киллэрдилэр. Маны тэҥэ сир учаастагын, онно баар тутуулары атыылаабыттарын нолуогуттан эмиэ босхолуурга этиллэр. Ол эрээри дохуотугар атын хамсаабат баайа-дуола учуоттаныахтаах. Аны туран, бу чэпчэтии урбаанньыт буоларга туһаныллыа суохтаах.
***
Дьокутаат Мария Бутина РФ Бырабыыталыстыбатын Бэрэссэдээтэлэ Михаил Мишустин аатыгар ФСИН үлэһиттэрин хамнаһын улаатыннарар туһунан суругу ыытта. Кини бэлиэтииринэн, холуобунай-толорор систиэмэ үлэһиттэрэ эбээһинэстэрин таһынан эбии ноҕуруускалара элбэх, онон маннык быһаарыы сиэрдээх.
***
80 саастарыттан аҕам саастаах аймахтарын эбэтэр инбэлииттэри көрөргө-истэргэ бэриллэр социальнай төлөбүрү үлэлиир саастаах гражданнарга 15 тыһыынча солкуобайга диэри улаатыннарарга сокуон барылын ЛДПР дьокутааттара киллэрдилэр.
Маны тэҥэ, “костнай мозг” донордарыгар чэпчэтиилэргэ сокуон барылын бэлэмнээтилэр. Бу иһигэр уоппускаҕа сэттэ хонугу эбии, санаторийдарга путевкалары чэпчэтиилээх биэрии киирдэ. Бу туһунан Дуума доруобуйа харыстабылыгар кэмитиэтин салайааччытын солбуйааччы Сергей Леонов эттэ.
***
«Оҕолоох дьиэ кэргэннэргэ эбии судаарыстыбаннай өйөбүл» федеральнай сокуон 8-с уонна 10-с ыстатыйаларыгар уларыйыылар киириэхтэрэ.
Маныаха барыл маҥнайгы ааҕыыны ааста. Ол курдук, гражданнар ийэ хапытаалынан оҕолорун үөрэхтэрин төлүүллэрэ судургутуйда. Төрөппүттэр ийэ хапытаалынан эбии ыспыраапкалары хомуйбакка, онлайн төлүөхтэрин сөп буолла. Бу туһунан Госдума бэрэссэдээтэлэ Вячеслав Володин эттэ.
***
Уһук Хоту уонна тыа сиригэр үлэлээбит иһин эбии төлөрбүрдэри, итиэннэ биир төрөппүт суох буолбутунан ( потеря кормильца) биэнсийэни анааһын сайабылыанньата суох барыаҕа. Маныаха сокуон барылын маҥнайгы ааҕыыга ылыннылар.
Кэмитиэт бэрэссэдээтэлэ Валерий Гартунг бэлиэтииринэн, докумуон тиийбэт түгэнигэр, гражданин тус кэбиниэтигэр иһитиннэрии тиийэр. Ирдэнэр докумуоннар хомуллааттарын кытары, биэнсийэлэр тута (автоматически) ааҕыллыахтара.
-
0
-
0
-
0
-
0
-
0
-
0
