Итинтэн 6677 оҕо дьиэ кэргэнэ 100 тыһыынча солкуобайдаах “Үйэ оҕолоро” хапытаалы ылбыттар. Санатан эттэххэ, бу хапытаал быйыл Саха АССР тэриллибитэ 100 сылынан бу сылга күн сирин көрбүт оҕолорго бэриллэр. Ол гынан баран, Ил Дархан быһа эпииргэ тахсыбытыгар, дьон-сэргэ бу бырайыак эһиил өссө салҕанарыгар көрдөспүтэ. Онон, баҕар, 2023 сылга баар буолуон сөп.
Бу 100 тыһыынча солкуобайы олорор усулуобуйаны тупсарарга, тырааныспар атыылаһарга, кэтэх хаһаайыстыбаны сайыннарарга, оҕо үөрэнэригэр уонна эмтэнэригэр туһанар көҥүллэнэрэ. Билигин өссө хайысхата кэҥээтэ. Ол курдук, оҕо аатыгар уурунуу кылаатын арыйыахха, Арассыыйа устун сынньана барарга айан ороскуотун эбэтэр путевка сыанатын төлүөххэ, оҕо олоҕун, доруобуйатын страховкалыахха сөп.
Билиҥҥи туругунан “Үйэ оҕолоро” хапытаал харчытын 1388 дьиэ кэргэн туһаммыт. Олор уопсай суумалара 122 мөлүйүөнтэн тахса солкуобайга тэҥнэспит. Үксүлэрэ олорор усулуобуйаны тупсарыыга бараабыт -- 88 мөлүйүөн солкуобайы. Сорохтор тырааныспар атыылаһалларыгар -- 32 мөл. солк. Бааҥҥа бырыһыаҥҥа уурдарбыттар, страховкаҕа ыыппыттар эмиэ бааллар.
Оттон биһиги өрөспүүбүлүкэбит 100 сылыгар мөлүйүөн буолабыт диэн бигэ эрэллээх ол түгэни күүтэбит.
-
0
-
0
-
0
-
0
-
0
-
0
