Мунньах кыттыылаахтара «Азия оҕолоро» VIII норуоттар икки ардыларынааҕы успуорт оонньууларын кэмигэр киин куоракка уопсастыбаннай куттал суох буолуутун хааччыйыы, экстремизми сэрэтии, омуктар икки ардыларынааҕы сыһыаны сымнатыы боппуруостарын дьүүллэстилэр.
Ил Дархан туһааннаах биэдэмистибэлэри «Азия оҕолорун» кэмигэр успуорт эбийиэктэригэр эрэ буолбакка, спортсменнар түһэр, аһыыр, сынньанар сирдэригэр эмиэ куттал суох буолуутун толору хааччыйыыга болҕомтону ууралларыгар сорудахтаата.
Кини: «Бу оонньууларга хаһааҥҥытааҕар да элбэх дойдуттан кыттааччы кэлэрэ бэлиэтэннэ. Онон куттал суох буолуутун хааччыйыы - биһиги үлэбит былааныгар инники туруохтаах. Оонньуулар бары эбийиэктэрин, аэропортан саҕалаан, оҕолор аһыыр сирдэригэр тиийэ, харыстыырга биир кэлим соруктары толоруохтаахпыт», - диэн бэлиэтээтэ.
Итини тэҥэ, Ил Дархан Москубаҕа «Крокус Сити Холл» кииҥҥэ буолбут теракт кэнниттэн, террористическай уонна экстремистскэй кутталы сэрэтэргэ эбии миэрэлэри ылынарга соруктары туруорда.
Манна даҕатан эттэххэ, «Азия оҕолоро» VIII норуоттар ардыларынааҕы оонньуулары көрөргө билиэттэри официальнай сайт нөҥүө уонна спортивнай эбийиэктэртэн анал оператордартан атыылаһыахха сөп диэн хайы-үйэ иһитиннэрдилэр. Билииэттэр оонньуулар арыллыыларыгар, сабыллыыларыгар уонна спортивнай оонньуулары көрүүгэ тус-туһунан атыыланаллар. Онуоха билиэт атыылыыр 14 пуун үлэлиэҕэ, - диэтэ Тас дойдулары кытта сыһыаҥҥа миниистири солбуйаачы Сергей Хатылыков.
Оттон «Азия оҕолоро» оонньуулар уоттара билигин Бүлүү бөлөх улуустарынан сылдьар, маныаха аналлаах элбэх интэриэһинэй тэрээһиннэр ыытылла тураллар.
Хаартыска: "Кэскил" саайтыттан
-
0
-
0
-
0
-
0
-
0
-
0
