Айаммыт устатын тухары көнө, киэҥ суолунан икки өттүбүтүгэр үрдүк мырааннартан саҕалаан, хаары бүрүнэн, саҕынньахтаах дьону санатар очуос хайалары сэргээн көрдүбүт. Суоппарбыт Василий Пестерев уопуттаах үөрүйэхтэринэн уруулун бэркэ тутар, төһө даҕаны ардыгар көлүөһэ алдьаннар, бэрт холкутук оҥоро охсон, айаммытын салҕаан, тэрээһин аһыллыытын куоттардарбыт даҕаны элбэх кэрэ өйдөбүллэри ыллыбыт.
Саҥа каток чахчы даҕаны тэлэбииһэргэ көрөр катоктарбытыттан уратыта суоҕун сөхтүбүт. Биллиилээх хоккеистары илэ харахпытынан көрдүбүт. Кинилэр бу кэрэ очуос таас көстүүлэриттэн дуоһуйбут көрүҥнээхтэр. Саха киһитэ Аан дойду спордун номохторун кытары хоккей курдук сахаҕа саҥа эрээри түргэнник киирбит көрүҥҥэ оонньообута, дьэ, сонун. Онон биир дойдулаахпыт, оҕо сааһыттан Бороҕоҥҥо каток оҥорон, спорт бу көрүҥүн бастакынан пропагандалаабыт Клим Алексеевынан киэн тутуннубут. Муус сыырга сырылааччы элбэх. «Буран» көлө киэргэтиилээх сыарҕанан баҕалаахтары хатааһылатар. Онтон да атын араас оонньуулар элбэхтэрэ. Шашлык, итии чэй, кофе дэлэй этэ.
Дэлэгээссийэбитин Танда бэтэрээннэрин сүбэтин бэрэссэдээтэлэ, ааспыт 2023 сыл түмүгүнэн улуус бастыҥ үлэлээх бэрэссэдээтэлэ Степан Константинович салайан илдьэ сырытта. Сүүрбэттэн тахса сыл Тулуна бэтэрээннэрин сүбэтин бэрэссэдээтэлинэн үлэлээбит Мария Сторожева саамай аҕа саастаахпыт, тэҥҥэ үөрэн-көтөн, бэрт эрчимнээхтик сырытта. Алгысчыт, ырыаһыт, Дүпсүн бэтэрээннэрин сүбэтин бэрэссэдээтэлэ Ульяна Босикова мааны куолаһа бу да сырыыга манньытта. Мин саас туһунан саҥа хоһооммун аахтым. Өрөспүүбүлүкэ бочуоттаах бэтэрээнэ, сэбиэскэй уонна уларыта тутуу кэмнэрин салайааччылара, баһылыктара Николай Сивцев (Өлтөх), Степан Фёдоров (Танда), Прокопий Трулин (Майаҕас) о.д.а көхтөөхтөр. Быыһыгар скандинавскай паалканан хааман да ылыы баар буолла. Муус скульптуралары көрбүппүт туспа кэрэ өйдөбүл. Киэһээ уот умайан Өлүөнэ очуостарын паарката өссө тубуста...
Бу курдук кэрэ өйдөбүлү бэлэхтээбит улуус бэтэрээннэрин сүбэтин бэрэссэдээтэлэ Олег Федоровка, оптуобуһунан хааччыйбыт үөрэх управлениятын начаалынньыга Степан Литвинцевкэ, улуус баһылыга Василий Аммосовка махтанан, күн, салгын уонна кэрэ айылҕа аргыстанан, эдэрдии эрчимнэнэн кэллибит.
-
2
-
0
-
0
-
0
-
2
-
0
