Абый улууһугар бу бырагырааманан 2022-2024 сс. 3 анал үөрэхтээх учуутал кэлэн, Муҥурдаах, Ураһалаах, Абый оскуолаларыгар үлэлии сылдьаллар.
Биология, химия учуутала идэлээх Сайаана Алексеевна Кычкина бу бырагырааманан Муҥурдаах оскуолатыгар ситиһиилээхтик үлэлиир.
– Мин үһүс сылбын төрөөбүт дойдубар, үөрэммит оскуолабар үлэлиибин. Чугас дьонум аттыбар буолан, миэхэ чэпчэки. Уруок таһынан консультация ыытабын — IX кылааска биологиҕа ОГЭ туттарар оҕолор бааллар. Төһө кыалларынан үөрэнээччилэрбин олимпиадаларга, араас куонкурустарга кытыннарабын. Кыра ситиһиилэр бааллар.
V кылаастарга кылаас салайааччытабын. Оҕолорбун олус сөбүлүүбүн. Оскуола иһинэн буолар тэрээһиннэргэ кыттабыт. Төрөппүттэр өйүүллэр, көхтөөхтөр. Түгэнинэн туһанан кинилэргэ махтанабын.
Үлэбэр наставнигым физика учуутала Екатерина Алексеевна Дохунаева көмөтүн бэлиэтээн этиэхпин баҕарабын.
«Үөэҕирии» нацпроект иһинэн үлэлиир кытыы оскуолалары каадырдарынан хааччыйыы бырагыраама баара олус үчүгэй. Эдэр исписэлиискэ улахан өйөбүл, тирэх буолар. Үөрэхтэрин бүтэрээри эбэтэр үлэ көрдөнөр эдэр педагогтары бу бырагырааманан хоту кэлэн үлэлээҥ диэн ыҥырабын. Быйыл биһиги оскуолабытыгар физика учууталыгар кубуота көрүллүбүт.
Ураһалаах агрохайысхалаах оскуолатыгар биология, химия учууталынан иккис сылын Сайыына Геннадьевна Слепцова үлэлиир.
— Мин Ньурбаттан төрүттээхпин. Оскуоланы Дьокуускай куоракка бүтэрбитим. Бу бырагырааманан 2023 с. үлэлии кэлбитим. Бастаан кэлбиппэр олохтоохтор наһаа истиҥник көрсүбүттэрэ.
Оскуолабыт коллектива дьоҕус, үксэ эдэр специалистар буолан, үлэлииргэ интэриэһинэй.
Үлэлиир, олорор усулуобуйа барыта үчүгэй. Арай интернет ситимэ мөлтөҕө мэһэйдиир. Сыана киин сиртэн ыарахан. Ол да буоллар үлэлиэххэ сөп. Тыа да сиригэр олорорго ыччакка сөптөөх усулуобуйа баар.
Вероника Семеновна Садовникова быйылгы үөрэх сылыгар Абый агрохайысхалаах оскуолатыгар нуучча тылын уонна литературатын учууталынан үлэтин саҕалаата.
– Саҥа таас киэҥ-куоҥ оскуолаҕа үлэлиир олус үчүгэй. Киһи сүргэтэ көтөҕүллэр. Үлэбэр туттуллар наадалаах аныгы тэрил барыта баар. Киинтэн ититиллэр биир хостоох квартира биэрбиттэрэ. Үлэлиир, олорор усулуобуйа барыта тэриллибитэ.
Уруоктарбыттан ураты, нуучча тыла сүрүн предмет буолан, эбиэт кэннэ ЕГЭ-ҕэ бэлэмнээн консультациялары ыытабын. Быйыл XI кылааска 9 выпускниктаахпыт. IX кылаастан 8 оҕо ОГЭ туттарар.
Үөрэнээччилэрим бары даҕаны билиигэ, саҥаҕа талаһар оҕолор, олус сөбүлээтим. XI кылааска нуучча тылын учуутала буолар баҕалаах үөрэнээччилээхпин. Кини литератураны умсугуйан үөрэтэр. Оҕолорго үөрэтэр предмеппэр интэриэһи тардан, чинчийэр үлэҕэ уһуйан, үлэлииргэ дьулуһуом.
«Хоту уонна Арктика улуустарын оскуолаларыгар үлэлиир педагогтары олорор дьиэнэн хааччыйыы» бырагыраама эдэр педагогтарга уонна хоту, ордук тыа сирин оскуолаларыгар, олус туһалаах диэн сыаналыыбын. Үөрэҕи саҥа бүтэрбит уопута суох эдэр исписэлиис бэйэтин идэтинэн үчүгэй үлэ булара уустук. Оттон хоту улуустарга оскуолалар, балыыһалар үлэһиттэрэ тиийбэт. Онон икки өттүттэн туһалаах.
Абый кэрэ айылҕатын, аламаҕай дьонун-сэргэтин олус сөбүлээтим. Дуогабарым да бүттэҕинэ, салгыы улэлии хаалыам диэн баҕа санаалаахпын.
Бу курдук тыа сиригэр хаачыстыбалаах үөрэҕи тэрийиигэ туһуламмыт бырагыраама, чахчы да, үтүө түмүктэрдээх буолуоҕар, оскуола үөрэнээччилэрэ чиҥ билиилэнэллэригэр, эдэр учууталлар баай уопуттаналларыгар тирэх буолуо диэн эрэнэбит.
2025 сылга Абый улууһугар 2 кубуота көрүллүбүт
Ураһалаах уонна Муҥурдаах оскуолаларыгар физика учууталлара
Докумуону муус устар 15 күнүгэр диэри туталлар.
Ким кыттыан сөбүй?
55 диэри саастаахүрдүк, орто үөрэхтээхорто, үрдүк үөрэх бүтэһик кууруһун устудуьоннара (6.11.2024 с. Ил Дархан Ыйааҕар уларытыылары киллэриинэн)кырата 5 сыл улууска баран үлэлиэн баҕалаах
Төлөбүр суумата: Уһук Илин уокурукка 2 мөл. солк. (онтон атыттарга 1 мөл. солк.)
Лариса Слепцова, Абый.
-
0
-
0
-
0
-
0
-
0
-
0
