Общество

Вячеслав Володин иһитиннэрбитинэн, Дуума сокуон оҥорор бартыбыалыгар 1 тыһ. 174 сокуон барыла үөрэтиллэр. Олортон иккитэ иккис, 251 бастакы ааҕыыны ааспыттар уонна 921 бастакы көрүүгэ сылдьар.

Кини мунньах иннинэ Арассыыйа Бэрэсидьиэнин Владимир Путины кытары көрсөн кэпсэппитин, кэлэр сиэссиийэҕэ үлэ барылын торумнаабыттарын, ырыппыттарын туһунан иһитиннэрдэ. Дойду салайааччыта дьокутааттарга махтал тылларын тиэрдэн туран көдьүүстээх үлэни баҕарбыт.

“Владимир Владимирович Путин дойдубутугар парламентаризм сайдыытыгар, кыраасданнар бырааптара көмүскэллээх буолуутугар болҕомтотун уурар. Оттон биһиги үлэ хаачыстыбата үрдүүрүгэр сырабытын уурабыт”,  - диэтэ Вячеслав Володин.

Кини санаппытынан, күһүн дьокутааттар 2026 сыллааҕы уонна былааннанар 2027-2028 сыллардааҕы федеральнай бүддьүөт бырайыагын көрүөхтэрэ. Бырабыыталыстыба бүддьүөтү алтынньы 1 күнүгэр диэри көрүүгэ киллэрэр былааннаах. “Биһиги көрүүгэ бэлэммит”,  - диэн эбэн эттэ.

Социальнай хайысха быйыл даҕаны халбарыйыа суоҕа. Норуот дьокутааттарыгар олохтоохтортон киирбит этиилэр, туруоруллубут боппуруостар федеральнай бүддьүөт көрүүтүн кэмигэр болҕомтоҕо ылыллыахтара. “Биһиги араас фракциялартан үлэлиибит. Дьокутааттарга киирбит этиилэр тустаах кэмитиэттэргэ ырытыллан бэбиэскэҕэ туруохтаахтар”, - диэн эттэ.

-- Анал байыаннай дьайыы кыттыылаахтара туох баар ирдэнэллэринэн хааччылыахтаахтарын учуоттуохтаахпыт, уонна маныаха  көдьүүстээх быһаарыныылары ылыныахтаахпыт,  - диэн туран, бу боппуруос дьокутааттар үлэлэригэр биир сүрүн хайысха буолуохтааҕын санатта.

Ол курдук, билиҥҥи туругунан Анал байыаннай дьайыы кыттыылаахтарын өйүүргэ 139 сокуон ылыллан турар, маны сэргэ 27 сокуон барыла көрүүгэ сылдьар. Бу көҕүлээһиннэр истэригэр социальнай мэктиэлэри кэҥэтии, байыаннай сулууспалаахтары үөрэхтээһин о.д.а. киирэр.

“Судаарыстыбаннай Дуума бэбиэскэтэ норуоту кытары көрсүһүүлэргэ этиллибит кыһалҕалары быһаарартан турар. Этиилэри анааран көрдөххө, оҕо доруобуйатын харысхала, демография боппуруостара, тыа сирин сайыннарыы, доруобуйа харыстабылын уонна үөрэҕирии эйгэтин каадырынан хааччыйыы инники кирбиигэ турар”, - диэтэ. 

Маны сэргэ, кыраасданнары түөкүттэртэн көмүскээһин сокуонунан бигэргэтиллибит буолуохтааҕа дьокутааттар үлэлэригэр инники күөҥҥэ сылдьыахтааҕын ыйда: “Технологиялар  күүскэ сайдар кэмнэригэр бу улахан ис хоһоонноох тиэмэ буолар, онон сиэттэрэн болҕомтобут уҕараабат. Күһүҥҥү сиэссийэ саҕаланыаҕыттан үлэ салҕаныа”,  -диэн бэлиэтээтэ.

Сиэссийэ түмүктэниитэ оҥоһуу өй технологияларын кэтээн көрүүгэ, бэрээдэктээһиҥҥэ, салайыыга улахан хабааннаах парламент  истиилэрэ ыытыллыа. Миграция бэлиитикэтигэр эмиэ болҕомто күүһүрүө.

“Күһүҥҥү сиэссийэ кэмигэр биһиги бырабыыталыстыбаны кытары аска-үөлгэ куттал суох буолуутун, үлэ  көдьүүһүн улаатыннарыы, Волга өрүс экология өттүнэн табыгастаах буолуутун курдук  боппуруостары ырытыахпыт”,  - диэн толордо.

Хаартыска: Судаарыстыбаннай Дуума саайтыттан