Общество

Өрөспүүбүлүкэ салайааччылара, Ил Түмэн дьокутааттара Өрөспүүбүлүкэ судаарыстыбаннаһын Күнүн көрсө биллиилээх государственнай диэйэтэл төрөөбүт нэһилиэгэр Хатырыкка тахсыылара Өрөспүүбүлүкэ судаарыстыбаннаһа төрүттэниитигэр олук уурбут политическай диэйэтэллэрбитигэр дириҥ ытыктабыл уонна кинилэргэ сүгүрүйүү бэлиэтэ буолан сыл ахсын үтүө үгэскэ кубулуйан салҕанан барар.

Тэрээһиҥҥэ өрөспүүбүлүкэ салайааччылара, норуот дьокутааттара Александр Атласов, Антонина Григорьева, Георгий Балакшин, Федот Филиппов, Максим Аммосов аатынан Хатырык орто оскуолатын үөрэнээччилэрэ, Нам улууһун нэһилиэгин баһылыктара, улуус дьокутааттара, эдэр ыччата кыттыыны ыллылар.

Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов мустубут дьону Саха Өрөспүүбүлүкэтин Судаарыстыбыннаһын күнүнэн Ил Түмэн аатыттан эҕэрдэлээтэ.

Кини Максим Аммосов, Исидор Барахов, Былатыан Ойуунускай, Степан Васильев курдук чаҕылхай дьоннор Саха сирэ Арассыыйа састаабыгар Автономнай өрөспүүбүлүкэ быһыытынан кииириитин хорсуннук турууласпыттарын, олохторун толук ууран туран дойдуларын инники кэскилин торумнаабыттарын аҕынна уонна кинилэргэ бу күҥҥэ сүгүрүйэр ытык иэспит диэн эттэ.

Кэлин олус уустук 90-с сылларга экономика кризиһэ ытарчалыы ылан турар кэмнэригэр Саха сирэ саҥалыы дьаһанарыгар М.Е. Николаев быһаарыылаах дьаһаллара улахан оруолу ылбыта. К.Е. Иванов, историяҕа киирбит ХII ыҥырыылаах Верховнай Сэбиэт дьокутааттара суверенитет туһунан Декларацияны ылыныылара саҥа Саха Сирэ саҥалыы сайдарыгар улахан оруолу ылбытын санатта. Бу историческай докумуон өрөспүүбүлүкэбит инникитин тутулуга суох сайдарын түстээбитэ. Ити уустук сылларга дойду үрдүнэн экономика укулаата ыһыллан турар кэмигэр олохтоох нэһилиэнньэни дьарыктаах оҥорууга ыытыллыбыт сайылыктааһын политиката, тыа сиригэр өйөбүл, гранильнай промышленноһы сайыннарыы уонна онно ыччаты тардыы, дойдуга тапталы иҥэрии, духуобунаһы, төрүт үгэстэри сайыннарыы о.д.а. үлэ күүскэ барбытын аҕынна.

"Нам улууһа" муниципальнай оройуон баһылыга Юрий Слепцов Нам улууһун историята Саха сирин судаарыстыбаннаһа сайдыытын кэрдиис кэмнэрин кытта ыкса сибээстээҕин аҕынна уонна бу чахчылары үйэтитэр, ону үүнэр көлүөнэбитигэр тиэрдэр - биһиги ытык иэспит буолар диэн эттэ.

«Күн бүгүн Сахабыт сирэ, төрөөбүт улууспут чэчирии сайдарыгар барыбыт күүспүтүнэн улахан бырайыактар олоххо киирэллэр. Ол курдук, федеральнай, регионнааҕы, улуус таһымыгар араас хабааннаах программалар тиһиктэринэн үлэ-хамнас тигинэччи ыытыллар. Чулуу уолаттарбыт бааллара буоллар төрөөбүт түөлбэлэрэ хайдахтаах курдук олоҕу кытта тэҥҥэ хардыылаан үүнэ-сайда турарын көрөн үөрүө этилэр. Бу буолар биһиги кинилэр иннилэригэр ытык иэспит», – диэн этиитин түмүктээтэ.

Бу күн Ил Түмэн дьокутааттара сэрии уустук сылларыгар, тыйыс санааны ылынар быһаарыылаах кэмнэргэ норуотун туһугар бэриниилээхтик үлэлээбит, охсуспут, норуоттан үүнэн тахсыбыт, сут-кураан уустук сылларыгар норуотун чиэһин туруулаһан туран көмүскээбит, улахан хоргуйууттан быыһаабыт уһулуччулаах государственнай уонна политическай деятель Илья Егорович Винокуров пааматынньыгар сибэкки дьөрбөтүн уурдулар.

Маны таһынан, Ил Түмэн дьокутааттара үөрүүлээх быһыыга-майгыга судаарыстыбаннай наҕараадалары туттардылар, сокуоннай саастарын туолбут ыччаттарга пааспардары туттарыыга кытыннылар, ыччаттар, оскуола оҕолорун ыйытыктарыгар эппиэттээтилэр. Бу тэрээһиҥҥэ үүнэр көлүөнэ ыччаттар, оскуола оҕолоро хото мустубуттара харахха быраҕыллар.

Александр Атласов мустубут ыччаттарга туһаайан дойдуларын историятын дириҥник үөрэтэллэригэр, сүүрбэлэриттэн эрэ тахсыбыт эдэркээн уолаттар ити кытаанах киирсиигэ көҥүл санаа модун күүһүн түөстэринэн тэлэннэр, суостаах кэмтэн саллыбакка норуоттарын иннигэр улахан эппиэтинэһи ылынан Саха сирин Судаарыстыбаннаһын олохторун толук ууран туран туруорсубуттарын хаһан да умнубаттарыгар ыҥырда. Улуу удьуор сырдык ситимэ саҥа көлүөнэ дьоҥҥо салҕанан барарыгар баҕа санаатын этэн туран кинилэргэ эрэлин биллэрдэ.

Ил Түмэн пресс-сулууспата

Василий Кононов хаартыскаҕа түһэриилэрэ