Уопсастыба

Тус көрсүһүүлэргэ дьоннор араас кыһалҕалаах, этиилээх, ыйытыылаах уонна ону быһаартарарга эрэллээх кэлэллэр. Бүгүн биһиги бу ыйдааҕы көрсүһүүлэртэн ойо тутан, чуолаан уопсастыба болҕомтотун ордук эрэйэр боппуруостары сырдатабыт.
Ыал уһаайбалаах буолуохтаах
Ил Түмэн Бэрэссэдээтэлэ Алексей Еремеевы кытары көрсүһүүгэ элбэх оҕолоох ыал ийэтэ В. сырытта. Бу ыал Покровскайдыыр суол 7-с километрыгар баар «Аграрник» диэн кэммиэрчэскэйэ суох табаарыстыбаҕа олорор дьиэни бэйэтин күүһүнэн туттубут, ол эрээри, уһаайбатын сирин бу сыллар тухары кыайан докумуоннаппакка эрэйдэммит. Уһаайба дьиҥнээхтик туһанылларын, дьиэ-уот уонна атын да хаһаайыстыбаннай тутуулар баалларын үрдүнэн, боломуочуйалаах уорганнар сир учаастагын бас билиигэ биэрэри аккаастыыр эбиттэр.
Тус көрсүһүүгэ ыҥырыллыбыт Саха Өрөспүүбүлүкэтин Бас билиигэ уонна сиргэ сыһыаннаһыыга министиэристибэтин итиэннэ «Дьокуускай куорат» куораттааҕы уокурук дьаһалтатын сиргэ сыһыаннаһыыга ааҕыныстыбатын исписэлиистэрэ чопчулаан быһаарбыттарынан, сир учаастагын бас билиигэ биэриигэ хас да кэккэ түгэннэргэ аккаас бэриллиэн сөп эбит. Бастатан туран, сир учаастагын туһаныы көҥүллэммит көрүҥҥэ сөп түбэспэт түбэлтэтигэр. Иккиһинэн, кэммиэрчэскэйэ суох саад табаарыстыбатын сирин-уотун арааран быыһааһыҥҥа (межеваниелааһыҥҥа) быһаарыыны эрэйэр боппуруос үөскээтэҕинэ. Үсүһүнэн, тустаах эбийиэк, бу түбэлтэҕэ сир учаастага, территория ураты усулуобуйанан туһаныллар зонатыгар баар буоллаҕына. Ону таһынан, «саад дьиэтэ» диэн ыстаатыстаах эбийиэк бастайааннай олорор дьиэнэн билиниллэрин уонна онуоха сөптөөҕүнэн ааҕылларын туһугар, тустаах тиэхиньиичэскэй ирдэбилгэ сөп түбэһиэхтээх эбит.
Ил Түмэн Бэрэссэдээтэлэ исписэлиистэр быһаарыыларын болҕойон истэн итиэннэ В. аҕалбыт докумуоннарын сиһилии билсэн баран, элбэх оҕолоох ыал үбүн-харчытын кутан туран, дьиэ-уот туттубут учаастагар бэйэтин быраабын докумуоннаппакка сылдьара сыыһатын ыйда. Бу учаастагы элбэх оҕолоох ыалларга бэриллэр уһаайбалар кэрискэлэригэр киллэрэр туһунан боппуруоһу хаттаан көрөргө көрдөһөн, Саха Өрөспүүбүлүкэтин Бас билиигэ уонна сиргэ сыһыаннаһыыга министиэристибэтигэр итиэннэ «Дьокуускай куорат» куораттааҕы уокурук дьаһалтатын сиргэ сыһыаннаһыыга ааҕыныстыбатыгар сурук ыытта. Боппуруоһу тус хонтуруолугар ыларын туһунан иһитиннэрдэ.

Тулаайахтарга болҕомто
Элбэх оҕолоох ыал ийэтэ, төрүт олохтоох, аҕыйах ахсааннаах хотугу омук (эбээн) бэрэстэбиитэлэ Г. тулаайах-оҕолору олорор дьиэнэн хааччыйыы бырагырааматынан сүбэлэһэ кэлбит. Ону таһынан, кини дьиэ кэргэнэ уустук матырыйалынай балаһыанньаҕа киирбитинэн, эбии социальнай көмөҕө наадыйарын туһунан кэпсээтэ.
Алексей Еремеев киниэхэ тулаайах оҕолору уонна төрөппүт көрүүтэ-истиитэ суох хаалбыт оҕолору олорор дьиэнэн хааччыйыы бырагырааматын туһунан кэпсээтэ, маннык оҕолор кэрскэлэригэр киирэргэ төгүрүк тулаайах уонна төрөппүт көрүүтэ-истиитэ суох хаалбыт оҕолортон туох докумуоннар ирдэнэллэрин барытын быһааран биэрдэ. Түмүгэр, тустаах уорганнарга ыйытык ыытарын уонна ону хонтуруолга ыларын туһунан эттэ.

Хаартыска: Дьулус Винокуров