Уопсастыба

Көрсүһүүгэ Федерация Сэбиэтин федеративнай тутулга, эрэгийиэннээҕи бэлиитикэҕэ, олохтоох салайыныыга уонна Хоту дьыалаларыгар кэмитиэтин бэрэссэдээтэлин бастакы солбуйааччы Галина Карелова, сенатор, Чукотка төрүт олохтоох аҕыйах ахсааннаах норуоттарын Ассоциациятын бэрэсидьиэнэ Анна Отке уонна Ил Түмэн сис кэмитиэтин бэрэссэдээтэлэ Елена Голомарева кытыннылар.
Кэпсэтии киинигэр II Хоту дойду дьахталларын пуорумугар Саха Сирин дэлэгээссийэтин кыттыытыгар бэлэмнэнии итиэннэ өрөспүүбүлүкэ төрүт олохтоох норуоттарын бырааптарын, тыын суолталаах интэриэстэрин таарыйар боппуруостар туруорулуннулар.
Елена Голомарева Ил Түмэн төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэтин ыытар үлэтин-хамнаһын туһунан сырдатта. Ылыллыбыт сокуоннар көҕүлээһиннэрин итиэннэ хоту дойдуну туруктаахтык сайыннарыыга, үгэс буолбут хаһаайыстыбаннай дьарыктары харааннааһыҥҥа туһулаан, аҕа ууһун общиналарын өйөөһүҥҥэ туох үлэ ыытылларын туһунан кэпсээтэ.
Ону истэн баран, Галина Карелова төрүт олохтоох хотугу норуоттар бырааптарын араҥаччылыырга анаммыт сокуоннары ырытан оҥорууга уонна хотугу норуоттар үгэс буолбут олохторун укулаатын харыстааһыҥҥа, салгыы сайыннарыыга Саха Өрөспүүбүлүкэтэ таһаарыылаахтык үлэлиирин сыаналаата. Сенатор Анна Отке эрэгийиэннэр үлэлэрин-хамнастарын сүрүннээһин уонна Уһук Илин субъектарын икки ардыларыгар бастыҥ үлэ уопутун атастаһыы улахан суолталааҕын бэлиэтээтэ.
Көрсүһүү кыттыылаахтара салгыы бииргэ үлэлээһин хардыыларын: сүрүннүүр сүбэлэри салгыыр, федеральнай быраап аахталарыгар этиилэри ырытан оҥорор итиэннэ эспиэрдиир өйөбүлү сайыннарар туһунан сүбэлэстилэр. Пуорумҥа дьүүллэһиигэ киллэриллиэхтээх бырайыактары ырыттылар.
Елена Голомарева Саха Өрөспүүбүлүкэтэ «Аартыка оҕолоро» федеральнай бырагыраама барылын оҥорон, 2018 с. Федерация Сэбиэтигэр киллэрбитигэр өйөөбүтүн иһин, Галина Кареловаҕа махтанарын биллэрдэ. «Аартыка оҕолоро» бырайыакка федеральнай бүддьүөттэн 500 мөл. солк. көрүллүбүтүн санатта. Оччолорго Галина Карелова Аартыка оҕолорун өйөөһүн дьаһала биир кэмнээҕинэн эрэ муҥурдаммакка, тиһиктээх буоларын турууласпыта итиэннэ «Аартыка оҕолоро» хос бырагыраама Аартыка социальнай-экэнэмиичэскэй сайдыытын федеральнай бырагырааматын иһинэн киллэриллэрин ситиспитэ. Оттон 2019 с. Национальностар дьыалаларыгар федеральнай ааҕыныстыба өйөбүлүнэн, Саха Өрөспүүбүлүкэтэ көҕүлээбит «Аартыка оҕолоро» бырайыага Аартыка сэбиэтигэр норуоттар икки ардыларынааҕы ыстаатыһы ылбыта.
Норуот дьокутаата маны таһынан, I Хоту дойду дьахталларын пуорума ылыммыт быһаарыытынан, 2025 сыл кулун тутар 19 күнүгэр «көс дьиэ үлэһитэ» диэн үлэ саҥа көрүҥэ федеральнай таһымынан бигэргэммитин санатта. Маннык ыстандаарт киллэриллиэр диэри төрүт хаһаайыстыбаннай дьарыктарын быһыытынан, дьиэ кэргэттэринэн көһө сылдьар ыаллар ийэлэригэр туох да социальнай мэктиэ көрүллүбэт, үлэ ыстааһа ааҕыллыбат буолан, кинилэр үлэнэн биэнсийэҕэ тахсар бырааптара суоҕа. Ол иһин, көс олохтоох дьахталлар үлэҕэ бырааптара сокуонунан көҥүллэнэрин итиэннэ олоххо киллэриллэрин туһугар хас да сыл устатыгар улахан үлэ ыытыллыбыта. Дьэ билигин кинилэргэ үлэ ыстаатыһа баар буолла, биэнсийэҕэ тахсар, ыарыйдахтарына больничнай илииһи төлөтөр, хат буоллахтарына уонна оҕолоннохторуна босуобуйа ылар, хамнастарыгар хотугу эбиилиги аахтарар кыахтанныллар.

-- Биһиги кыһалҕабытын билэр уонна өйүүргэ мэлдьи бэлэм судаарыстыбаннай таһымнаах дьону кытары көрсүһэр миигин сүрдээҕин кынаттыыр. Анна Отке эмиэ Федерация Сэбиэтин уопуттаах сенатора, төрөөбүт Чукоткатын интэриэһин хаһыс да ыҥырыыга туруулаһар, – диир Елена Голомарева.

Санатан эттэххэ,  II Хоту дойду дьахталларын пуорума бэс ыйын 30 – от ыйын 1 күннэригэр ыытыллар.  Бу туһунан Ил Түмэн пресс-сулууспата суруйар. 

Хаартыска: тустаах саайтан.