Бэҕэһээ Дьокуускай куорат Ю.А.Гагарин аатынан култуура киинигэр орто анал үөрэхтээһин Күнүн уонна өрөспүүбүлүкэҕэ систиэмэ тэриллибитэ 85 сылын бэлиэтиир үөрүүлээх тэрээһин ыытылынна. Киирэ түһээти кытары устудьуоннар тыыннаах муусуканан доҕуһуоллаах кэнсиэринэн көрүстүлэр. Этээс ахсын араас бэртээхэй быыстапкалры бэлэмнээбиттэр.
Үөрүүлээх тэрээһин арыллыытыгар дойду бэрэсидьиэнэ Владимир Путин эҕэрдэ суругун аахтылар. РФ үөрэҕириигэ миниистирэ Сергей Кравцов видеонан эҕэрдэтин көрдөрдүлэр. Судаарыстыбаннай Дуума дьокутаата Галина Данчикова эҕэрдэ тылларын тириэртэ.
Ил Түмэн билимҥэ уонна үөрэҕириигэ сис кэмитиэтин бэрэссэдээтэлэ, педагогическай наукалар дуоктардара, профессор Антонина Григорьева мустубуттары орто анал үөрэх салаата 85 сылынан истиҥник эҕэрдэлээтэ: “Дойдубут инники кэскилин тутааччылара саҥардыллыбыт бэртээхэй мастарыскыайдарга, аудиторияларга билиилэрин хаҥаталлар. Кинили уопуттаах настаабынньыктар үөрэтэллэр, билиилэрин иҥэрэллэр. Орто анал үөрэхтээһин бары үлэһиттэригэр улахан ситиһиилэри, кытаанах доруойаны баҕарабын”, -- диэн туран, Дьокуускайдааҕы мэдиссиинэ кэллиэһин бүтүн Арассыыйатааҕы куонкуруска кыайыыларынан эҕэрдэлээтэ.
Үөрэх уонна билим миниистирэ Нюргуна Соколова орто анал үөрэхтээһин Саха Сирин сүрүн каадыры оҥорон таһаарар былаһаакката буоларын эттэ: “Орто анал үөрэхтээһин систиэмэтэ биһиги өрөспүүбүлүкэбитигэр каадыры бэлэмнээһиҥҥэ сүрүн оруолу ылар, ылара даҕаны. Биһиги устудьуоннарбыт уонна настаабынньыктарбыт Арассыыйа таһымыгар кыайыыларынан киэн туттабыт. Үбүлүөй – история кэрчиктэрин санаан, ахтан ааһар эрэ кэммит буолбатах, бу аныгы кэмҥэ ордук ирдэнэр испэсэлиистэри бэлэмнээн таһаарага суолдьут, үлэ торумнуур күммүт”, - диэтэ.
Үөрүүлээх күн федеральнай куонкурустар призердара, кыайыылаахтара, настаабынньыктара уонна эспиэрдэрэ бэртээхэйдик арыллыы кэмигэр кытыннылар. Бу күн “Сыл маастара” бүтүн Арассыыйатааҕы куонкурус кыайылаахтарын уонна финалистарын туһунан сырдатар кинигэ сүрэхтэннэ.
Санатан эттэххэ, Саха Сиригэр 42 кэллиэс уонна техникум үлэлиир. Манна 24 тыһыынчаттан тахса устудьуон үөрэнэр. 2023 сылтан Ил Дархан Айсен Николаев көҕүлээһининэн үөрэх тэрилтэлэрэ сылын ахсын 40 мөл. солк. суумалаах граннары ылаллар. Быйыл демонстрационнай эксээмэҥҥэ 100 баалы ылбыт устудьуоннар 100-түү тыһыынча солкуобайынан наҕараадаланнылар. Кинилэри бэлэмнээбит настаабынньыктары эмиэ эҕэрдэлээтилэр.
Тэрээһин туһунан сиһилии "Ил Түмэн" хаһыат аныгыскы нүөмэригэр ааҕыҥ.
Хаартыскалар: Галина Матвеева түһэриилэрэ.
-
0
-
0
-
0
-
0
-
0
-
0
