Онтон бу бэлиэ күҥҥэ “сулуһа суох дьоруой” диэн ааттыыр биир дойдулаахпыт Иван Иванов анал байыаннай дьайыы толоонугар оҥорбут хорсун быһыытын ахтан-санаан ааһыаҕыҥ…
“Сунтар” диэн позывнойдаах дойдутун аатын чиэстээхтик сүкпүт Иван Иванов хорсун быһыытын туһунан киин көрдөрөр-иһитиннэрэр ханаалларга кэпсээбиттэрин таһаарабыт. Өстөөхтөр сүрүн айан суоллара ааһар Угледар куораты ылыыга Иван Иванов хорсун быһыыта суолталаах дьайыы буолбутун туһунан “Вести” биэриигэ Александр Рогаткин кэпсээбитин долгуйа көрбүппүт. Биир дойдулаахпытынан икки бүк киэн туттубуппут. Ол курдук, Иван Иванов 115 миэтэрэ үрдүктээх башняны эстэрэн, сири кытта тэҥнээбитэ. Бу үрдэл биһиги дьоммутугар элбэх кутталы үөскэтэрэ. Өстөөхтөр үрдүк башняҕа саһа сытаннар биһиги дьоммут диэки туох да харгыһа суох ытыалыыллара. Инньэ гынан элбэх дьон, тиэхиньикэ сүтүктэммиппит. Бу башняны ыллахха эрэ биһиги сэриибит иннин диэки айанныыр, ону тэҥэ өстөөхтөр айан суолларын толору баһылыыр эрэ кыахтанара. Ол иһин, бу башняҕа мындыр толкуйдаах, хорсун санаалаах, толоругас “Сунтар” позывнойдаах Иван Иванову разведкаҕа ыыталлар. Иван тутатына куттала суох суолу булар. Иккис сырыытыгар кинини кытта “Сан Саныч” диэн этэрээт хамандыыра Александр Елецкай барсар. Уолаттар бу башняҕа өстөөх сэбэ сэбиргэлэ, миинэтэ харалла сытарын көрөллөр. Маны эстэрдэххэ башня тута суулларын быһааран, дронунан эһэр тэрили ыыттаран, өстөөх стратегическай суолталаах эбийиэгин букатыннаахтык эстэрэн сууллараллар. Иван Иванов, бу сорудаҕы толоро сылдьан санныгар эчэйии ылан госпитальга эмтэнэ утаарыллар. Телевизорынан көстүбүт сюжекка Александр Елецкай “Сан Саныч” интервью биэрэр. Сорудаҕы толоруутугар соҕотох буолбатаҕын кэпсиир. Дойду аармыйатыгар улахан суолталаах сорудаҕы толорбуттарын иһин “Сунтаары” уонна “Сан Санычы” дойду Дьоруойугар түһэрбиттэрин этэллэр. Бу кэмҥэ Сунтаарга өссө биир Дьоруойданныбыт диэн өрөгөйдүү түһэбит. Ол эрээри, билигин даҕаны Иван Иванов бу хорсун быһыытын иһин үрдүкү наҕараадата кинини булбата… Иван Иванов чугас дьоно туоһуласпыттарынан “кумаахы үйэтигэр” наҕараадаҕа түһэрии сүтэн-оһон хаалыан сөп дииллэр. Хомойуох иһин, Иван Иванов биһиги кэккэбитигэр билигин суох. Угледар башнятын охторуу кэнниттэн атын сорудахха сылдьан сэрии толоонугар сырдык тыына быстыбыта. Орто дойду олоҕуттан күрэммитэ төгүрүк биир сыла ааста. Иван ситэ олорботох олоҕун кыргыттара салгыахтара. Кэргэнигэр Эльвираҕа, кыргыттарыгар дириҥ кутурҕаммытын холбуубут. Дьоруой сырдык аата үйэлэргэ умнуллуо суоҕа…
Сунтаар сирэ Аҕа дойду Дьоруойдарынан баай. Ол курдук, Дмитрий Егоров, Филипп Евсеев ааттара көмүс буукубанан дойду историятыгар сурулунна. Онтон Иван Иванов аата Дьоруойдары кытта эмиэ тэҥҥэ турар.
Сунтаар нэһилиэгин баһылыга, анал байыаннай дьайыы, “Саха сирэ — Дьоруойдар дойдулара” бырагыраама кыттыылааҕа Эдуард Филиппов бу күн суолтатын туһунан маннык этэр: “Дьоруой үрдүк аатын сүгүү, чиэстээхтик толоруу хас бирдии киһиэхэ бэриллибэт. Саха сирин Дьоруойдарынан бүттүүн дойду киэн туттар. Анал байыаннай дьайыыга өрөспүүбүлүкэттэн 12 киһи улахан наҕараадаҕа тиксибитэ элбэҕи этэр. Кинилэр бойобуой быһыыларынан дойдуга бэриниилээх буолууну, тапталы кэрэһэлииллэр. Ону тэҥэ, бу күн биһиги кэккэбитигэр суох Дьоруойдарбытын ахтан-санаан ааһар ытык иэспит буолар”.
“Сулуһа суох Дьоруой” Иван Иванов дойду историятыгар бэлиэ суолу хаалларбытын умнубаппыт… Кини үрдүкү наҕараадатын дьиэ кэргэнигэр туттарыахтара диэн эрэнэ хаалабыт.
Сонун төрдө уонна хаартыска: Сунтаар сонуннара, Мира АФАНАСЬЕВА
-
0
-
0
-
0
-
0
-
0
-
0
