Бу кэрэ бэлиэ тэрээһини ыытарга көҕүлээччинэн уонна проект салайааччытынан Саха Өрөспүүбүлүкэтин култууратын туйгуна, Тааттатааҕы Ф.С. Аргунов аатынан оҕо ускуустубатын оскуолатын үҥкүү салаатын преподавателэ, И.Н. Гуляев аатынан Туора Күөл орто оскуолатын филиалын үрдүк категориялаах педагог-хореограба Семен Дмитриевич Андросов буолар.
Күрэх олоххо киирэригэр сүрүн тэрийээччилэринэн Булгунньахтаах оҕо ускуустубатын оскуолатын педкэллэктиибэ уонна дириэктэр Александра Ивановна Абрамова. Күрэххэ өрөспүүбүлүкэ араас муннуктарыттан: Таатта Баайаҕатыттан, Туора Күөлүттэн, Мэҥэ Хаҥаластан, Томпоттон, Бүлүүттэн, Намтан, Амматтан, Дьокуускайтан, Покровскайтан, Нөмүгүттэн уонна Булгунньахтаахтан кыра оҕоттон саҕалаан сиппит-хоппут эр дьоҥҥо тиийэ күөн көрүстүлэр.
Уол оҕо, эдэр ыччат уонна эр дьон үҥкүү кэллэктииптэрэ бииртэн биир интэриэһинэй, норуот, омук үҥкүүтүттэн саҕалаан үрдүк таһымнаах сольнай, дуэтнай, кэллэктиибинэн композициялары көрдөрдүлэр. Эр дьон үҥкүүтэ — бу күүс-уох, хоһуун быһыы уонна норуот тыынын ситимнэһиитэ.
Бу тыҥааһыннаах киирсии түмүгүнэн, биһиги Туора Күөллээҕи «Дьиэрэҥкэй» оҕо үҥкүү ансаамбыла I истиэпэннээх лауреат үрдүк аатын ситистибит!
Ону таһынан, ансаамбыл икки анал бириис хаһаайына буолла:
1. Сүрүн анал бириис — Саха Өрөспүүбүлүкэтин Национальнай үҥкүүтүн тыйаатырын анал наҕараадата.
2. Үҥкүү таһымын уонна уратытын иһин анал бириис.
Бу үрдүк ситиһиибит хас да киһи сыралаах үлэтин түмүгунэн буолар. Ол курдук, кэрэ көстүүлээх көстүүммүтүн тикпит иистэнньэҥнэрбитигэр (салайааччы М.С. Меркурьева), өрүү өйүүр күндү төрөппүттэрбитигэр, оскуолабыт директорыгар О.Н. Гуляеваҕа, куруук эрэллээхтик илдьэ сылдьар суоппарбытыгар Г.Г. Кононовка уонна бу күрэххэ сүрэхтээбит, биһигини бэлэмнээбит С.Д.Андросовка улахан махталбытын тиэрдэбит!
«Үҥкүүлээ эр хоһуун» күрэх инникитин өссө кэҥээн, эр дьон үҥкүүтүн сайыннарыыга улахан тирэх буоларыгар эрэнэбит.
Иван Николаевич Гуляев аатынан Туора Күөл 11-с кылааһын үөрэнээччитэ Эрчим Евграфов, "Таатта".
-
0
-
0
-
0
-
0
-
0
-
0
