Бэстибээл бастакы түһүмэҕэр 262 сайаапка киирбититтэн, 60 бөлөх иккис түһүмэххэ ааһан, эрэгийиэннэринэн түмсэн күрэхтэстилэр. Саха Сириттэн Таатта улууһун Тыараһа нэһилиэгиттэн "Кылыһах" норуот бөлөҕө (салайааччы А.А.Сабарайкина) фольклор хайысхатыгар кыттан ЛАУРЕАТ үрдүк аатын ылла.
Дэлэгээссийэ салайааччытынан Өрөспүүбүлүкэтээҕи Норуот айымньытын дьиэтин дириэктэрэ Иван Федорович Иванов бара сырытта. 12 киһилээх бөлөх тыыннаах доҕуһуолунан, кырыымпа, хомус, күпсүүр, сиксиир, айаан тыастарыгар доҕуһуоллатан фольклор алта көрүҥүн холбоон, өбүгэ саҕаттан кэлбит саха норуотун төрүт дорҕоонун, тылын-өһүн, ырыатын-тойугун дуораччы иһитиннэрдэ. Тойук, олоҥхо, норуот ырыата, чабырҕах, хомус дьүрүскэн тыаһа, оһуохай - барыта биир ситимҥэ киирэн, айылҕа уһуктуута көтөр-сүүрэр саҥата илэ бааччы иһиллэн, көрөөччү дууһатын кылын таарыйда.
Ол туоһутунан бэстибээл кыттааччылара бары биһирээбиттэрин биллэрдилэр, биирдиилээн кэлэн сөҕө-махтайа, сорохтор харахтара ууланыар диэри долгуйбуттарын туһунан санааларын үллэһиннилэр, ис сүрэхтэриттэн махтанан, илии тутуһан саха норуотун талба талааныгар сүгүрүйэллэрин эттилэр.
Гнесин аатынан РАМ профессора, Арассыыйа норуодунай артыыһа Александр Андреевич Цыганков бэрэссэдээтэллээх, биэс киһиттэн турар дьүүллүүр сүбэ хас биирдии нүөмэри кыраҕытык көрөн сыаналаата, бөлөх салайааччыларыгар "төгүрүк остуол" тэрийэн, санаатын үллэһиннэ. Биэс бөлөххө 2 мөл. солк. суумалаах Грант туттарылынна.
Тэрээһин быйыл дойдубутугар биллэриллибит Норуоттар сомоҕолоһууларын сылыгар ураты эйгэни үөскэттэ. Бииртэн биир хатыламмат чаҕылхай нүөмэрдэр түмүллүбүт түһүлгэлэрэ кыттааччыларга да, көрөөччүлэргэ да умнуллубат өйдөбүлү хаалларда. 39 сыл аннараа өттүгэр тэриллибит бөлөххө көлүөнэттэн көлүөнэҕэ сатабыл, үөрүйэх бэриллэн, чочуллан, сайдан, Арассыыйа таһымнаах күрэскэ бастыҥтан бастыҥнары кытта күөн көрсөр, күрэс былдьаһар чиэскэ тигистилэр.
Өбүгэ саҕаттан кэлбит саха норуотун талба талаана, ырыата-тойуга, тыла-өһө, тыаһа-ууһа салҕыы сайдарыгар "Кылыһахтар" сүҥкэн кылааттаах, өрөспүүбүлүкэ биир бастыҥ бөлөҕө буолалларын көрдөрдүлэр. Инникитин да кэлбит үөрүйэҕи сайыннаран, үрдүктэн үрдүк чыпчааллары дабайар, сайдар, саха норуотун баай култууратын тарҕатар соруктаахтар. Бэстибээлгэ кэлэллэригэр өйөөбүт бар дьонноругар, биир дойдулаахтарыгар барҕа махталларын тиэрдэллэр.
Галина Полускина
Хаартыска: "Кылыһах" бөлөх архыыбыттан.
-
0
-
0
-
0
-
0
-
0
-
0
