Таатта улууһун делегациятыттан нэһилиэк топонимикатын үйэтитээччи, Октябрьскай нэһилиэк кырдьаҕас олохтооҕо Гаврил Вырдылин ситиһиилээхтик кыттан, лауреат аатын ылары ситистэ. Кини конференция туһунан маннык кэпсээтэ
-- Сылтан сыл кыраайы үөрэтии дириҥээн иһэрэ, кыттааччылар ахсааннара элбэҕинэн уонна үөрэтэр, чинчийэр тиэмэ кэҥээн иһэринэн биллэ, көстөр. Быйылгы конференция үс секцияҕа араарыллан ыытылынна. Түҥ былыргыны үөрэтэн аахпыттара интириэһи тарта. Мин 1926 сылтан саҕалаан нэһилиэгим историятын кэпсиир “Үйэлээх ситим” бырайыакпынан кытынным, барыта архив докумуоннарыгар олоҕуран. Бырайыакпын өрөспүүбүлүкэ нэһилиэктэрэ олус сэҥээрэллэр, өбүгэ сирэ барыбытын долгутар буоллаҕа. Былырыын Ньурбалар ыҥыран бырайыакпын кэпсээн турабын. Быйыл Үөһээ Бүлүүлэри кытта Чурапчылар сэҥээрдилэр, сүбэ ыллылар, группабар киирдилэр. Быйылгы конференцияҕа Таатта кыраайы үөрэтэр мусуойа (сал. М.А.Попова) уонна Нам делегацията олус интэриэһинэй быыстапкалары туруордулар. Чинчийии үлэтэ уһун сыллаах үлэни эрэйэр, маннык үлэни СӨ Бырабыыталыстыбата өйүүр буолбута, хас биирдиибитин үөрдэр, тирэхтиир. Сыл түмүгүнэн СӨ Бырабыыталыстыбатын бэрэссэдээтэлэ Сергей Местников бастыҥ үлэлээхтэри, олохторун кыраайы үөрэтиигэ анаабыт чулуу дьоммут Егор Шишигин, Егор Андросов,Георгий Федоров, Тарас Никонов, Иннокентий Кривошапкин ааттарынан уопсастыбаннай бириэмийэлэри үчүгэй үлэлэрдээх араас улуустартан сылдьар краеведтарга туттартаата. Конференцияҕа кыттааччылар ортолоругар оскуола үрдүкү кылаастарын оҕолоро, эдэркээн ыччаттар бааллара, олус интэриэһинэй дакылааттары бэлэмнээн кэпсээбиттэрэ биһигини үөртэ. Маннык түгэх өбүгэлэртэн сыыйыллан кэлэр саха историята өссө да дириҥник чинчиллиэҕэ диэн эрэллээх тарҕастыбыт, - диэн конференцияны сырдатта.
Сыл-хонук ааһан, кэм кэми солбуйан, үйэлэр кирбиилэрэ үөрэтиллэн, төрөөбүт дойдубут историята тиллэн, чинчиллэн иһиэхтин.
-
9
-
0
-
0
-
0
-
0
-
0
