Кыайыылахтар үлэ араас эйгэтин бэрэстэбиитэллэрэ буолаллар: култуура, бырамыысыланнас, ОДьКХ, мэдиссиинэ, бэтэрэнээрийэ, урбаанньыттар уонна тириэньэрдэр.
Ил Дархан бириэмийэтэ быйыл төрдүс төгүлүн туттарыллар. Бу сыллар усталарыгар Сахабыт Сирин 200 бастыҥ үлэһитэ бэлиэтэннэ. Бириэмийэ сүрүн сыала – үлэни өрө тутуу, идэҕэ маастарыстыбаны үрдэтии, киэҥ араҥаҕа билиһиннэрии уонна ыччаты патриотическай тыыҥҥа иитии.
Кыайыылаахтары Ил Дархан Айсен Николаев истиҥник эҕэрдэлээтэ: “Үтүө үгэс быһыытынан ыам ыйын 1 күнүн, Саас уонна Үлэ бырааһынньыгын көрсө биһиги Өрөспүүбүлүкэбит бастыҥ үлэһиттэрин чиэстиибит. Бүгүн манна, бу саалаҕа, араас идэ эйгэтиттэн бэрэстэбиитэллэр 16 улуустан уонна Дьокуускай куораттан муһуннулар. Лауреаттар истэригэр – тутааччылар, баһаарынайдар, балыксыттар, аграрийдар, машинистар, бырамыысыланнас үлэһиттэрэ, быраастар, педагогтар, урбаанньыттар бааллар. Кинилэри барыларын талбыт идэлэригэр үрдүк сатабыл, үтүө суобас, өр сыллаах бэриниилээх үлэ сомоҕолуур. Биһиги кинилэринэн киэн туттабыт! Өр сыллаах ситиһиилэрин, инникигэ көрүүлэрин, билиилэрин, сатабылларын, эдэр көлүөнэҕэ ону тиэрдэллэрин көрөн сөҕөбүт. Үлэҕэ тус сыһыаннара барыбытыгар холобур буолар”, -- диэн эттэ.
Ил Дархан бэлиэтээбитинэн, тургутуулаах кэмҥэ биһиги Өрөспүүбүлүкэбит дойдубутугар чиҥ тирэх уонна экэниэмикэ сайдыытын биир киинэ буолла.
“Анал байыаннай дьайыы байыастарын бары күүспүтүн түмэн өйүүбүт. Таһаарыылаах үлэбитинэн кыайыыны чугаһатабыт. Арҕаа дойдулар саансыйаларыгар бэриммэккэ, баарбытын оннунан хааллардыбыт, сүрүн оҥорон таһаарар көрдөрүүлэрбитин тупсарабыт, сир баайын хостооһуҥҥа историянан мэктиэлэммит көрдөрүүлэри куоһарабыт”, - диэтэ.
-
0
-
0
-
0
-
0
-
0
-
0
