Бу үөрүүлээх күн лауреат аатын сүкпүт, Нерюнгри улууһугар эспэрэмиэн быһыытынан үлэлиир “Аартыка” оскуола эбэҥки тылын уонна литературатын учуутала Клавдия Иннокентьевна Макарова кэпсээбитинэн, идэтигэр бэриниилээхтик үлэлээбитэ номнуо 51-с сыла буолбут.
Кини 1949 сыллаахха күн сирин Чульмаҥҥа көрбүт. 1976 сылтан Золотинкатааҕы оскуола-интэринээккэ учууталынан үлэлээн саҕалаабыт. Кэлин, 1999 сыллаахха, “Аартыка” оскуолаҕа төрүт норуоттар тылларыгар уонна култуураларыгар дириэктэри солбуйааччынан анаммыт.
Төрүт тыл сүппэтигэр, сайдарыгар, көлүөнэттэн көлүөнэҕэ тиэрдиллэригэр сүҥкэн кылаатын киллэрсэр дьонтон биирдэстэрэ. Эбэҥки тылыгар үөрэтэр араас тиэстэри, компакт-диискэлэри оҥорбут, “Эвенкийско-русский разговорник” тылбаасчыттаах кинигэ, «Эвэдыт таткалдярав», «Хрестоматия по литературе для эвенкийских школ» эспэримиэн учуобунньуктар ааптардара буолар. Кини кинигэлэрин Сахабыт Сиригэр эрэ буолбакка, Амурскай уобаласка, Бурятияҕа, Красноярскай кыраайга туһаналлар, оҕолору үөрэтэллэр.
Өр сыллах үлэтин түмүгүнэн үгүс наҕараадаларынан бэлиэтэммит. Ол курдук кини “Үлэтигэр уратытын иһин” (1988 с.) Ыччат Бүтүн Сойуустааҕы Ленинскэй Коммунистическай Сойууһун киин кэмитиэтин бэлиэтинэн, “Старшай учуутал” (1990 с.) наҕараадаламмыт, СӨ үөрэҕириитин туйгуна, РФ уопсай үөрэхтээһин Бочуоттаах үлэһитэ, РФ үтүөлээх учуутала, СӨ үөпсай үөрэхтээһин Бочуоттаах бэтэрээнэ.
-- “Үлэ киһитэ” наҕарааданан бэлиэтэммиппиттэн олус үөрдүм, долгуйдум. Оскуолам туһунан кэпсээтэххэ, Нерюнгри улууһугар “Аартыка” оскуолата эспэримиэн быһыытынан үлэлиир. Манна аҕыйах ахсааннаах хотугу норуоттар оҕолоро: эбээннэр, эбэҥкилэр, чукчалар уонна дьукаагырдар үөрэнэллэр. Мин эбэҥки тылын уонна литературатын учууталынан үлэлээбитим номнуо үйэ аҥаарыттан ордунна. Бу кэм устата үөрэнээччилэрбиттэн элбэх оҕо учуутал идэтигэр уһуйулунна. Киэн туттар үөрэнээччим, бүгүн миигин өйүү кэлбит үөрэнээччибинэн Фаина Матвеевна Лиханова буолар. Кини Арассыыйа биэс бастыҥ учууталын иһигэр киирбитэ, Аан дойду табаһыттарын ыстаабыгар үлэлиир, Версальскай үнүбүрсүөккэ магистратураҕа үөрэммитэ, онтон да элбэх ситиһиилэрдээх.
-
0
-
0
-
0
-
0
-
0
-
0
