Бүгүҥҥү күн «Саха сахатынан кэрэ» диэн тэрээһинин аата аан дойдутааҕы музейдар күннэрин быйылгы «Музей түүнэ» тэрээһиннэрин сүрүн тиэмэтинэн «Родное» диэн аатынан бүтүн Арассыыйа үрдүнэн ыытылларынан маннык ааттанна. Онон улуус историятын түмэлин быйылгы бырааһынньыктааҕы тэрээһинэ сахалыы куту уһугуннарар, иҥэрэр сыаллаах ыытылынна.
Түмэл икки этээһин былаһын тухары сахалыы эйгэҕэ киллэрэр түһүмэхтэр олус интэриэһинэйдик тэрилиннилэр. Ол курдук улуус дьахталларын Сүбэтин чилиэнэ Изабелла Саввинова кыбытыгынан тигиини үөрэтэн көрдөрдө, хабылыкка, хаамыскаҕа улуустааҕы күрэстэр призердара Василий Егоров сымса хамсаныылаах оонньууга, «Олоҥхо дьиэтин» исписэлииһэ Матрена Герасимова саламаат астыырга үөрэттилэр, «Элгис» түмсүүттэн Александра Черкашина эмтээх оттортон утах арааһын амсатта. Оттон «Ийэ тыл ситимэ» түмсүү чилиэннэрэ саха таабырыннарыгар, өс хоһоонноругар, сахалыы былыргы тэриллэр ааттарын таайыыга күрэс ыытан кыттааччылар билиилэрин тургуттулар. Итиэннэ ат толору симэҕин СӨ норуотун маастара Екатерина Бочкарева сырдатан, дириҥ культурабытын билиһиннэрдэ.
Түмүккэ В.В. Никифоров-Күлүмнүүр аатынан култуура дыбарыаһын хореограба Ольга Петрова сахалыы оһуор үҥкүүтүн күргүөмүнэн үҥкүүлэтэн, саха буолан сандаарыахха диэн түмүк санааны тэрээһин кыттыылаахтара иҥэриннилэр.
Сонун төрдө уонна хаартыска: Светлана Сивцева, "Мүрү саһарҕата".
-
0
-
0
-
0
-
0
-
0
-
0
