Уопсастыба

Эспэнээттэри НХМ пуондатыгар биэриигэ Сөбүлэһии докумуонугар худуоһунньук кыыһа Варвара Георгиевна Куличкина уонна СӨ Нассынаалынай уус-уран түмэлин генеральнай дириэктэрэ Влада Владиславовна Тимофеева илии баттаатылар. Тэрээһиҥҥэ түмэл кылаабынай научнай үлэһитэ Ася Львовна Габышева кыттыыны ылла. Бу дьоһуннаах тэрээһиҥҥэ худуоһунньук сиэнэ, А.Л.Штиглиц аатынан Санкт-Петербурдааҕы художественнай-бырамыысыланнай академия устудьуона Юлия Куличкина, суруналыыстар уонна худуоһунньук аймахтара сырыттылар.

Ася Львовна худуоһунньук дьиэ кэргэнигэр махтанан туран, РФ үтүөлээх, Саха сирин норуодунай худуоһунньуга, СӨ искусстволарын үтүөлээх диэйэтэлэ, Наука уонна искусство Петровскайдааҕы академиятын дьиҥнээх чилиэнэ Георгий Николаевич Родионов (1945-2026) айан хаалларбыт сыаната биллибэт кэрэ айымньыларыгар, муосчут үлэлээбит ураты ньымаларыгар тохтоото. Биллиилээх маастар үлэлэрэ өрөспүүбүлүкэтээҕи, Бүтүн Арассыыйатааҕы уонна араас дойдуларга Норуоттар икки ардыларынааҕы быыстапкаларга үгүстүк кыттыбыттара. Оттон түмэл генеральнай дириэктэрэ Влада Тимофеева Георгий Родионов айылҕаттан айдарыылаах худуоһунньугун сэргэ талааннаах педагог, уһуйааччы буоларын, онон кини олоҕо оҕолоругар, сиэннэригэр, айбыт үлэлэригэр уонна элбэх ахсааннаах үөрэнээччилэригэр дьоһуннаахтык салҕанарын бэлиэтээн эттэ.
Биллэрин курдук, Георгий Родионов, сахаттан бастакы идэтийбит худуоһунньук Петр Петрович Романов, сахаттан бастакы муосчут Семен Николаевич Пестерев, саха бастакы балерината Аксения Васильевна Посельская курдук, айылҕаттан айдарыылаах, угус талааннаах дьоннордоох Чурапчы улууһун II Мэлдьэхси нэһилиэгиттэн силис тардар. Ийэтэ Варвара Осиповна Пестерева 1942 сыллаахха Чурапчы холкуостарын хоту күүс өттүнэн көһөрүүгэ ыыппыттарын кэннэ Мэлдьэхсигэ собус соҕотох хаалбыт "Тахсыбыт Сардаҥа" холкуос бэрэссэдээтэлинэн үлэлээн, дьонун-сэргэтин көрөн-истэн, сэрии ыар сылларын туорааннар, 1947 сыллаахха кини салайар холкуоһа өрөспүүбүлүкэ биир бастыҥ үлэлээх хаһаайыстыбата буоларын ситиспитэ. Холкуос ССКП обкомун Көһөрүллэ сылдьар Кыһыл Знамятынан наҕараалаламмыта. Варвара Осиповна Пестерева Саха АССР II Ыҥырыылаах Үрдүкү Сэбиэтин дьокутаатынан быыбардаммыта. Георгий аҕата Николай Григорьевич Родионов Аҕа дойду Улуу сэриитин бэтэрээнэ, икки уордьаннаах буойун-учуутал, үйэтин тухары учууталынан, оскуола дириэктэринэн үлэлээбитэ. Ити курдук хорсун, үтүө үлэһит дьоннордооҕо талааннаах худуоһунньук, айдарыылаах муосчут Георгий Родионов. Кини Дьокуускайдааҕы Художественнай училищены уонна Саха госуниверситетын, СГУ аспирантуратын ситиһиилээхтик үөрэнэн бүтэрбитэ. Таптыыр кэргэнинээн Римма Николаевналыын түөрт оҕолорун атахтарыгар туруортаан, үлэһит, ыал оҥортообуттара. Георгий Николаевич өр сыл П.П.Романов аатынан Дьокуускайдааҕы Художественнай училищеҕа уонна М.К.Аммосов аатынан ХИФУ-га преподавателинэн, уһуйааччынан үлэлээбитэ, педагогическай наука кандидата. Уопуттаах педагог үөрэнээччилэрэ билигин Саха сиригэр, дойду араас куораттарыгар айымньылаахтык үлэлии-хамсыы сылдьаллар. Спорт бэтэрээнин, марафонец, Арассыыйа уонна Саха Өрөспүүбүлүкэтин спордун маастарын быһыытынан эмиэ кинини өйдүүр-саныыр, умнубат киһи элбэх.
Родионовтар Дьокуускайга көһөн кэлиэхтэрин иннинэ үгүс сыл хоту Эдьигээҥҥэ, Кыстатыамҥа олорбуттара, үлэлээбиттэрэ-үөрэммиттэрэ. Ийэлэрэ, эбэлэрэ, ССКП чилиэнэ Варвара Осиповна Пестерева Кыстатыамҥа Сельсовет бэрэссэдээтэлинэн өр, үтүө суобастаахтык үлэлээбитэ. Хоһуун дьоннордоох, ураты кэрэ айылҕалаах Эдьигээнин худуоһунньук олус таптыыра. Оскуолаҕа үөрэппит оҕолорун ахтара. Ол да иһин, Георгий Родионов айар үлэтигэр биир саамай таптыыр, чугас тиэмэтинэн тамайа сүүрэр табалардаах, булчут-балыксыт үтүө дьоннордоох, сэргэх ыччаттаах, ып-ыраас, мап-маҥан хаардаах, киэҥ нэлэмэн хотугу дойдута этэ.

Татьяна Маркова.
Ааптар хаартыскаҕа түһэриилэрэ.