Тэрээһиҥҥэ өрөспүүбүлүкэ салайааччыта педагогтарга аналлаах туспа дьиэ тутуута Мииринэй улууһугар эрэ буолбакка, бүтүн Саха Сиригэр ураты бырайыак буоларын бэлиэтээтэ:
«Бүгүн манна, Мииринэйгэ, эһигини кытта улахан үөрүүнү үллэстэрбиттэн олус үөрэбин. Бу Мииринэй улууһун ураты бырайыага, онуоха, биллэн турар, улуус салалтатыгар улахан махталбын тиэрдиэхпин баҕарабын. Бу быһаарыы хайдахтаах курдук уустук этэй диэн өйдүүбүн. Ол эрээри бары бииргэ үлэлээн, боппуруостары быһааран, бүгүн учууталларга, бу дьиэҕэ олоруохтаах дьоҥҥо, күлүүстэри туттарыыга кэллибит. Биһиги өрөспүүбүлүкэбитигэр үөрэх систиэмэтин сайыннарыыга элбэх оҥоһуллар, манна, Мииринэй улууһугар эмиэ элбэх үлэ барар. Арассыыйа бэрэсидьиэнин Владимир Владимирович Путин национальнай бырайыактарын, «Биир ньыгыл Арассыыйа» баартыйа, муниципальнай бырагыраамалар уонна Мииринэй улууһугар үчүгэйдик көстөр норуот бырагырааматын өйөбүллэринэн киирэр үбүлээһиннэр биир сыалга — үөрэх систиэмэтин сайыннарыыга, инники диэки хардыылааһыҥҥа, бу эйгэҕэ үлэлиир дьон социальнай өттүнэн көмүскэллээх буолууларыгар, ол иһигэр кинилэр олорор усулуобуйаларын быһаарыыга — туһаайыллаллар. Онон итинник дьиэлэр өрөспүүбүлүкэ атын улуустарыгар эмиэ баар буолуохтара диэн олус эрэнэбин», — диэн Айсен Николаев бэлиэтээтэ.
Мииринэй улууһун баһылыга Александр Басыров дьиэ бастатан туран, үөрэх үлэһиттэрин олорор усулуобуйаларын тупсарыыга анаан тутуллубутун эттэ:
«Биһиги бу дьиэни анаан-минээн үөрэх үлэһиттэрбит, педагогтарбыт уопсайдар хосторуттан толору хааччыллыылаах дьиэлэргэ көһөллөрүн туһугар туппуппут. Бүгүн биһиги бэйэбит иннибитигэр туруоруммут сыалбытын ситистибит диэн этиэхпитин сөп. Тутааччы тэрилтэҕэ — «КМКПРОЕКТ» тутуу хампаанньатыгар, кини дириэктэрэ Николай Семёнович Конобуловка тутуу үлэтин түмүктээн, олорор дьиэни үлэҕэ киллэрбиттэригэр махталбын тиэрдэбин. Ураты махталбын Саха Өрөспүүбүлүкэтин Ил Дарханыгар Айсен Николаевка, Саха Өрөспүүбүлүкэтин Бырабыыталыстыбатыгар, АЛРОСА акционернай хампаанньатыгар — Мииринэй улууһун социальнай-экэнэмиичэскэй сайдыытыгар өйөбүллэрин, көмөлөрүн иһин тиэрдиэм этэ», — диэтэ Александр Басыров.
Саҥа киирбит дьон ааттарыттан өрөспүүбүлүкэ уонна улуус салалтатыгар махтал тылларын «Политехнический лицей» английскай тылын учуутала Елена Порядина эттэ:
«Мин Мииринэй улууһун үөрэҕин систиэмэтигэр 24 сыл үлэлээтим. Өрөспүүбүлүкэ Ил Дарханыгар уонна улуус баһылыгар маннык социальнай суолталаах бырайыагы — үөрэх үлэһиттэригэр аналлаах дьиэ баар буолбутугар махталбын тиэрдиэм этэ», — диэтэ.
Тоҕус этээстэрдээх олорор дьиэ Московская уулуссатыгар баар. Дьиэ уопсай иэнэ 3,2 тыһыынчаттан тахса квадратнай миэтэрэттэн тахсар. Манна 71 биир хостоох кыбартыыра баар, уопсай иэннэрэ 2,3 тыһыынчаттан тахса квадратнай миэтэрэ.
Эбийиэк бүддьүөт эйгэтин үлэһиттэрин олорор дьиэнэн хааччыйыы муниципальнай бырагырааматын чэрчитинэн тутуллубут. Бырайыагы үбүлээһин Мииринэй улууһун олохтоох бүддьүөтүттэн оҥоһуллубут.
Улууска испэсэлиистэргэ аналлаах аныгы олорор дьиэнэн хааччыйыыга үлэ салҕанар. Чуолаан, Мииринэйгэ Арассыыйа Бэрэсидьиэнин Владимир Путин сорудаҕынан «Уһук Илиҥҥи федеральнай уокурукка чэпчэтиилэрдэх арендалаан олорор дьиэлэр» бырагырааманан 158 кыбартыыралаах дьиэ тутуута бара турар. Эбийиэк үлэҕэ киирдэҕинэ, наадалаах идэлэргэ наадыйар испэсэлиистэр чэпчэтиилэээх куортамҥа кыбартыыралары ылыахтара. Бырайыагы олоххо киллэрии Мииринэй улууһун экэнэмиичэскэй уонна социальнай эйгэтин сүрүн салааларыгар каадырдары тардыыга уонна хааччыйарга көмөлөөх буолуоҕа.
Саргын Скрябин хаартыската, ЯСИА
-
0
-
0
-
0
-
0
-
0
-
0
