Манна 13 тас дойдуттан уонна дойдубут 27 эрэгийиэниттэн бэрэстэбиитэллэр түмүстүлэр. Сахабыт Сириттэн Ил Түмэн төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева кыттыыны ылар.
Санатан эттэххэ, пуорум сүрүн тиэмэтинэн «Төрүт омуктар биоараастаһыы уонна килиимэт контекстигэр» буолар. Былаһаакка былаас уорганнарын, эспиэртэр холбоһуктарын, уопсастыбаннай тэрилтэлэр, урбаан уонна төрүт омуктар бэрэстэбиитэллэрин биоараастаһыыны харыстааһын, килиимэт уларыйыытыгар дьүөрэлэһии, сокуону тупсарыы уонна аныгы айылҕаны харыстааһын быраактыкаларыгар үгэс буолбут билиини туһаныы боппуруостарын дьүүллэһиилэри түмэ тарпыт.
Пуорум үлэтигэр РФ Бэрэсидьиэнин Сибиирдээҕи федеральнай уокурукка боломуочуйалаах бэрэстэбиитэлэ Анатолий Серышев, Национальностар дьыалаларыгар федеральнай ааҕыныстыба салайааччыта Игорь Баринов, РФ сенатора, РФ Уһук Хоту, Сибиир уонна Уһук Илин төрүт олохтоох аҕыйах ахсааннаах омуктарын ассоциациятын бэрэсидьиэнэ Александр Новьюхов, ону тэҥэ төрүт омуктар бырааптарын көмүскүүр эйгэҕэ аан дойдутааҕы уонна Арассыыйатааҕы эспиэртэрэ кытталлар.
Бырагыраамаҕа пленарнай мунньах, тустаах тиэмэлэргэ кэпсэтиилэр, үгэс буолбут билиилэргэ анаммыт эспиэртэр сэминээрдэрэ, Холбоһуктаах Нациялар Тэрилтэлэрин биологическай араастаһыы Конвенциятын 17-с кэмпириэнсийэтигэр бэлэмнэнии сүбэ мунньах, ону тэҥэ төрүт олохтоох аҕыйах ахсааннаах омуктар бырааптарын көмүскүүр эйгэҕэ сокуон барылларын дьүүллэһии киирэллэр.
“Пуорум биология араастаһыытын харыстааһын уонна туһаныы эйгэтигэр Арассыыйа саҥардыллыбыт стратегиятын бэлэмнээһин кэмигэр ыытыллар, ону оҥорууга төрүт олохтоох аҕыйах ахсааннаах омуктар кытталлар. Былаһаакка докумуон сүрүн балаһыанньаларын дьүүллэһэргэ уонна бииргэ сүбэлэһиллибит этиилэри оҥорорго кыаҕы биэриэҕэ», — диэн эспиэртэр бэлиэтииллэр.
Пуорум күннэригэр «Аан дойду норуоттарын сомоҕолоһууларын Куубага» диэн хотугу многоборьеҕа аан дойдутааҕы бэстибээл, «Сибиир аргыһа» диэн Хотугу төрүт олохтоох аҕыйах ахсааннаах омуктар V эрэгийиэннэр икки ардыларынааҕы ыччат пуорума, «Хотугу баайдар. Арассыыйа маастардара уонна худуоһунньуктара – 2026» XXI аан дойдутааҕы быыстапка-дьаарбаҥка маастар-кылаастардаах уонна айар кэлэктииптэр толоруулардаах ыытыллыахтара.
Хаартыска: Голиковтар дьиэ кэргэннэрин архыыбыттан.
-
0
-
0
-
0
-
0
-
0
-
0
